குடல்வால் அழற்சி(APPENTICITIS)

மருத்துவம் : விதி நம்பிக்கையை விலக்கிய அதி நவீன மருத்துவங்கள்! [25]

குடல்வால் அழற்சி

(APPENTICITIS)

நோயின் அறிகுறிகள்:

அடி வயிற்றில் வலி: குடல்வால் நோய் ஏற்படும்பொழுது முதல் அறிகுறியாக அடிவயிற்றில் வலி ஏற்படும். இந்த வலி மிகவும் கடுமையாக இருக்கும். அடிவயிற்றின் வலது பக்கத்தில் வலி அதிகமாக இருக்கும். அப்பகுதியை தொட்டாலே வலி இருக்கும். வலது அடி வயிற்றில் ஏற்படும் வலி தொப்புளைச் சுற்றி பரவும். நேரம் செல்ல, செல்ல வயிற்றுப் பகுதி முழுதும் பரவும். 6 முதல் 24 மணிவரை கூட இவ்வலி தொடரும் நிலைக்கூட ஏற்படலாம். பல நேரங்களில் வலி மாத்திரைகளுக்குக் கூட கட்டுப்படாத வலியாக இவ்வலி இருக்கும்.

அடிவயிற்றில் வீக்கம்: அடிவயிற்றில் வலியோடு வீக்கமும் ஏற்படும்.

குமட்டல், வாந்தி: வலி, வீக்கம் அடிவயிற்றில் ஏற்படும் நிலையில் குமட்டல் ஏற்படும். வாந்தியும் ஏற்படும்.

குமட்டலும், வாந்தியும் வயிற்றில் ஏற்படும் பல நோய்களிலும் தெரியும் ஒரு பொது அறிகுறியானாலும், அடிவயிற்றில் வலி, வயிற்றில் ஏற்படும் வீக்கத்தோடு கூடிய குமட்டல் ஏற்பட்டால் குடல்வால் அழற்சி என்று சந்தேகிக்கலாம்.

பசியின்மை: பசியின்மை, உணவைக் கண்டாலும், உண்ண வேண்டும் என்று தோன்றாமை போன்றவை ஏற்படும்.

குடலியக்கத் தொல்லை: மலச்சிக்கல் அல்லது வலது அடிவயிறு வலியோடு ஏற்படுதல்.

வயிற்றுப் பிடிப்பு: வலியோடு கூடிய வயிற்றுப் பிடிப்பு ஏற்படும். இந்நிலை ஏற்பட்டால் உடனடியாக மருத்துவரை அணுக வேண்டும். இல்லாவிட்டால் உயிரையே இழக்க வேண்டிய நிலைகூட ஏற்படும்.

காய்ச்சல்: ஆரம்ப நிலையில் லேசான காய்ச்சல் ஏற்படலாம். மருத்துவம் செய்யப்படாத நிலையில் இரத்த நச்சூட்டம் ஏற்பட்டால் காய்ச்சல் மிக அதிகமாகும். மருந்துகளால்கூட கட்டுப்படாத நிலை ஏற்படும்.

களைப்பு: உடல் களைத்துவிடும்.

சோர்வு: சோர்வு ஏற்படும்.

நீர்மச் சமச்சீரின்மையால் மேற்கூறிய அறிகுறிகள் அதிகமாகும்.

மரணம்: மருத்துவம் சரியான நேரத்தில், சரியாகச் செய்யாவிடில் குடல்வால் வெடித்து, சீழ் வயிற்று உறை உள்புறம் முழுமைக்கும் நோய்த் தொற்று ஏற்பட்டு மரணம் நிகழும்.

நோயறிதல்: குடல்வால் அழற்சியை அறுதியிட்டு, சோதனைகள் மூலம் அறிதல் மிகவும் கடினம். அறிகுறிகள் வயிற்றில் ஏற்படும் பல நோய்களுக்கான அறிகுறிகளோடு ஒத்து இருப்பதால் அடிப்படையான சோதனைகள் அனைத்தும் செய்ய வேண்டும்.

¨    இரத்தப் பரிசோதனை: இதன்மூலம் இரத்தத்தில் வெள்ளையணுக்களின் எண்ணிக்கை அதிகம் இருப்பின், நோய் தொற்றுக்கான நிலைப்பாட்டினையும், அழற்சியையும் உறுதி செய்யலாம்.

¨    சிறுநீர் சோதனைகள் மூலம், சி-றுநீரில் தொற்று உள்ளதா என அறிவர்.

¨    ஊடுகதிர் நிழற்படம் மூலம் பாதிப்பு மற்ற உறுப்புகளில் உள்ளதா என்பதை அறிய முடியும்.

¨    ஒலி, எதிரொலி ஆய்வு (Ultra sound) மூலம் நோயறியும் வாய்ப்பு ஏற்படும்.

¨     CT ஸ்கேன் மூலம் ஓரளவு நோயறிய முடியும்.

¨    நோய் அறிகுறிகளை வைத்தே பெரும்பாலும் இந்நோயை மருத்துவர்கள் அறிவர்.

¨    சோதனைகள் ஓரளவு உதவும்.

மருத்துவம்: குடல்வால் அழற்சி நோயில்  அறுவை மருத்துவத்தால் குடல்வால் முழுமையாக அகற்றப்பட்டுவிடும். ஆபத்து ஏதுமில்லாத அறுவை மருத்துவம் இது. இது “குடல்வால் அகற்றம்’’ (Appendicectomy) என்று அழைக்கப்படுகிறது. நோயின் தன்மையும், வீரியத்தையும் பொறுத்து உடனடியாக அறுவை மருத்துவம் செய்ய வேண்டிய நிலை ஏற்படும். பெரும்பாலும் “தண்டுவட மரப்பு ஊசி’’ (Spinal-Local Anaesthesia) போட்டே இவ்வறுவை மருத்துவம் செய்யப்படுகிறது. சிறுவர்களுக்கு செய்யும் பொழுது ‘முழு மயக்க மருந்து’ (General Anaesthesia) செலுத்தி செய்யப்படும். அறுவை மருத்துவம் முடிந்து இரண்டு, மூன்று நாள்கள் மருத்துவமனையில் இருக்க வேண்டும்.

தற்பொழுது நவீன மருத்துவ முறையாக “வயிறு உள்நோக்கி’’ (Laproscopy) மூலம் செய்யும் அறுவை மருத்துவம் சிறப்பாகச் செய்யப்படுகிறது. அதிக தொல்லையற்ற மருத்துவமுறை இது. மருத்துவ மனையிலிருக்கும் நாள்களும் மிகக் குறைவு. அதிக ஆபத்தில்லாத, எளிமையான, வெற்றிகரமான மருத்துவ முறை இது. இன்றைய காலக்கட்டத்தில் மிக அதிகமாக இம்மருத்துவம் செய்யப்படுகிறது.

ஆனால், மருத்துவம் நோயின் தொல்லைகளுக்கு ஏற்பவும், உடலின் வீரியத்திற்கும் ஏற்பவும் மாறுபடும்.

வயிற்று உறை அழற்சி, இரத்த நச்சூட்டம், இரத்த நச்சூட்ட அதிர்வு, நீர்மச் சமச்சீரின்மை ஆகியவற்றை முதலில் சீராக்கும் முயற்சியையே மருத்துவர்கள் மேற்கொள்வர். நோயாளி உடல்நிலை சீரான தன்மை அடைந்த பின்பே அறுவை மருத்துவம் செய்ய முடியும்.

ஆரம்ப நிலையில் லேசான அறிகுறிகள் தெரியும்பொழுதே அறுவை மருத்துவம் செய்து கொள்வதே சிறந்த அணுகுமுறை. அதைத் தவிர்த்து, மருந்துக் கடைகளில், மருந்துகள் வாங்கி, மருத்துவர் அறிவுரைகள் இல்லாமல் உட்கொள்வது என்பது தவறான அணுகுமுறை. ஆபத்தான அணுகுமுறையும்கூட!

வயிறு வலியும், குமட்டல், வாந்தி, காய்ச்சல் போன்றவையும் ஏற்பட்டால் உடனடியாக மருத்துவ அறிவுரையைப் பெற வேண்டும்.

(தொடரும்)

 

‘வயிறு வலி’ என்பது, சரளமாக மக்கள் பயன்படுத்தும் வார்த்தை. வயிறு வலியோடு, வாந்தி, குமட்டல் போன்றவை ஏற்படும்பொழுது கட்டாயம் மருத்துவ அறிவுரை பெறுதல் வேண்டும்.

சிறுநீரகக் கற்கள், சிறுநீர்க்குழாய் கற்கள், குடல்வால் அழற்சி, பித்தப்பை கற்கள், சிறுகுடல் அழற்சி போன்ற பல நோய்களிலும் மேற்கண்ட அறிகுறிகளே முதலில் தெரியும். சரியான ஆய்வுதான் நோயை உறுதியாக்கும். எனவே, மருத்துவ அறிவுரையை ஒரு கட்டாயத் தேவையாக நினைக்க வேண்டும்.

குடல்வால் அழற்சியில், குடல்வாலில் வீக்கம் ஏற்பட்டு, குடல்வால் வெடித்து, உடல் முழுதும் நோய்க் கிருமிகள் பரவும் ஆபத்தும், அதன் காரணமாய் மரணமும் நிகழும் ஆபத்து உள்ளதால் எச்சரிக்கையோடு ‘வயிறு வலி’யை நாம் அணுக வேண்டும்.

நேரத்தில் செய்யப்படும் மருத்துவம் எளிதானது. நன்மை பயக்க வல்லது. உயிரைக் காக்கக் கூடியது!

-மரு.இரா.கவுதமன்

- உண்மை இதழ் 1-15. 3. 21

இரைப்பை அழற்சி (GASTRITIS)

மருத்துவம் : 

விதி நம்பிக்கையை விலக்கிய அதி நவீன மருத்துவங்கள்! (22) 

மரு.இரா.கவுதமன்

சிக்கல்கள் (Complications):

இரைப்பை அழற்சியில், மருத்துவம் சிறந்த பயனைத் தரும். மருத்துவம் செய்யாமல் புறக்கணித்தால்தான் பலவிதச் சிக்கல்கள் ஏற்படும். அழற்சி அப்படியே நீடித்தால் நாளடைவில் இரைப்பையில் புண்கள் (Ulcers) ஏற்படும். அந்தப் புண்களிலிருந்து இரத்தக் கசிவு உண்டாகும். அழற்சியினால் உண்டாகும் வாந்தியோடு இரத்தம் வரும் (Hematemesis). உணவோடு இரத்தமும் கலந்து, சிறு குடலுக்குச் செல்வதால், உணவு செரித்த பின், மலமாக மாறி வெளியேறும்பொழுது, மலம் கருமையாக வெளியேறும். நாளடைவில் புண்கள், இரைப்பைப் புற்று நோயாக மாறும் நிலையும் ஏற்படும். அதுபோன்ற நிலையில் உணவு முழுமையாக எடுத்துக்கொள்ள முடியாது. இரைப்பைச் சுவர்கள் மிகவும் மெலிதாகி விடும். நொதியச் சுரப்பிகள் சிதைந்து விடும். உணவு சரியாகச் செரிக்காது. உணவும், உடல் செயல்பாட்டிற்குத் தேவையான அளவு கிடைக்காத நிலையில் உடலின் எல்லா உறுப்புகளும் பாதிக்கப்பட்டு, செயல்திறன் குறைபாடு ஏற்படும். அதனால் உடல் நலிவுறும், மெலியும். இதனால் களைப்பு, நீர்ச்சத்துக் குறைபாடு (Dehydration) போன்றவை ஏற்பட்டு முழுமையாக இயக்கம் குறைந்துவிடும். நோயாளியை இந்த நிலையில் சீராக்கி, இயல்பு நிலைக்குத் திரும்பக் கொண்டு வருதல் இயலாத நிலையை உண்டாக்கிவிடும். மிகவும் வலியும், தொல்லையும் கூடிய மரணமே முடிவாகிவிடும்.

நோயறிதல்: பெரும்பாலும் அறிகுறிகளை வைத்தே, மருத்துவர்கள் நோயையும், அதன் நிலைப்பாட்டையும் எளிதில் கண்டுவிடுவர். ஆனால், மேலும் துல்லியமாகச் சில சோதனைகளை மேற்கொள்ள அறிவுறுத்துவர்.

¨           ஹெச். பைலோரி (H.Pylori) சோதனை: இந்த நுண்கிருமி உள்ளதா எனும் அறியும் சோதனை இது. இரத்தப் பரிசோதனை, மலப் பரிசோதனை, மூச்சுப் பரிசோதனை மூலம் இக்கிருமிகளின் இருப்பை எளிதில் அறியலாம். (மூச்சுப் பரிசோதனையில் நீரில், ஊடுகதிர் கரி (Radio active carbon) கலந்து குடிக்கச் செய்வர். ஹெச். பைலோரி கிருமிகள் கரியைத் தனியே பிரித்துவிடும். அது காற்று வழியே வெளியேறும். நோயாளி ஒரு பையில் மூச்சை வெளியிட வேண்டும். அதில் ஊடுகதிர் கரி இருக்கும். அப்படி இருப்பின் ஹெச். பைலோரி கிருமிகள் இருப்பு உறுதி செய்யப்படும்.

உள்நோக்கி சோதனை (Endoscopy):

வாய் வழியே ஒரு சிறிய குழாய் தொண்டை வழியே செலுத்தப்படும். அக்குழாயில் ஒரு சிறிய விளக்கும், படம் எடுக்கும் கருவியும் பொருத்தப்பட்டிருக்கும். உணவுக்குழாய், இரைப்பை, மேல் சிறுகுடல் போன்ற உறுப்புகளை முழுமையாக உள்நோக்கி மூலம் காண முடியும். உணவுக்குழாய் சுருக்குத் தசை (Sphincter)கள், இரைப்பைச் சுவரில் ஏற்பட்டுள்ள மாற்றங்கள், புண்கள், கட்டிகள், புற்றுநோய்க் கட்டிகள் ஆகிவற்றை தெளிவாகக் காணலாம். எந்தப் பகுதியிலாவது, புற்றுநோயைப் பற்றி சந்தேகம் ஏற்பட்டால், சிறிதளவு சதையைக் கூட சோதனை செய்ய இக்கருவி மூலமே எடுக்க முடியும்.

பேரியம் (Barium) படப்பிடிப்பு:

இயல்பாக ஊடுகதிர் நிழற் படங்களில் தசைகள் தெரியாது. எலும்புகளை மட்டுமே பார்க்க முடியும். அதனால் ‘பேரியம்’ என்னும் தனிமத் தூளை நீரில் கரைத்து, குடிக்கச் செய்வர். பிறகு நிழற்படம் எடுப்பர். உணவுக்குழாய், இரைப்பை, சிறுகுடல், பெருங்குடல், மலக்குடல் வரை பேரியம் செல்லும். உணவுப் பாதையில் எங்காவது குறைபாடு இருப்பின் நிழற்படத்தில் தெளிவாகத் தெரியும். இரைப்பையில் புண்கள் இருந்தால், இரைப்பைச் சுவர்களில் மென்மையாக இல்லாமல், அரித்து இருப்பது போலத் தோன்றும். கட்டிகளோ, புற்றுக் கட்டிகளோ இருந்தால் பேரியம் நிரம்பும்; குறைபாடு (Filling defect) தெரியும்.

பொதுவாக மேற்கண்ட சோதனைகள் மூலம், நோயின் அளவு, தன்மை, பாதிப்பு ஆகியவற்றைத் துல்லியமாக அறிய முடியும். இச்சோதனையின் தன்மைக்கேற்ப, மருத்துவம் செய்யும் முறைகளை மருத்துவர்கள் முடிவு செய்வர்.

மருத்துவம்:

இரைப்பை அழற்சிக்கான மருத்துவம் நோயின் அறிகுறிகளையும், நோயின் தீவிரத்தையும் பொறுத்தே அமையும். பெரும்பாலான நோயாளிகள் மருந்துக் கடைகளிலேயே மருந்து வாங்கும் பழக்கம் உடையவர்களாக உள்ளனர். இது மிகவும் தவறான பழக்கம். மருத்துவர்கள் அறிவுரையின்படியே  மருந்துகள் சாப்பிடுவதை வழக்கமாகக் கொள்ள வேண்டும். மருத்துவர்கள்தான் நோயின் தன்மை, தீவிரம் போன்றவற்றை அறிந்து, அதற்கேற்ப மருத்துவம் செய்வர்.

1.            உணவுக் கட்டுப்பாடு: காரமான உணவுகளை அறவே தவிர்க்கவும். அதிக கொழுப்புள்ள உணவுகளைத் தவிர்ப்பது நலம்.

2.            புகைப் பிடித்தலை முழுமையாக நிறுத்த வேண்டும்.

3.            மதுப் பழக்கத்தையும் கட்டாயம் நிறுத்த வேண்டும்.

4.            இரைப்பையில் அழற்சி ஏற்படுத்தும், லேக்டோஸ் உள்ள உணவுகளையும், ‘குளுடென்’ உள்ள உணவுப் பொருள்கள் (கோதுமை) தவிர்த்தல் நலம்.

5.            உணவு உண்ணும் முன் கைகளை நன்கு கழுவ வேண்டும்.

6.            எக்ஸ்ரே கதிர் வீச்சு, நச்சுப் பொருள்கள், வேதிப் பொருள்களைத் தவிர்க்க வேண்டும்.

7.            அமிலத் தன்மை கூட்டும் உணவுகளை எடுத்துக் கொள்ளக் கூடாது.

(எ.கா: எலுமிச்சைச் சாறு)

8.            வறுத்த உணவுகளைத் தவிர்க்கவும்.

9.            மன உளைச்சல் (Stress) ஏற்படாமல், மன நலம் காக்க வேண்டும்.

10.          உணவுப் பழக்க மாறுபாடுகள், இரைப்பை அழற்சியை தவிர்க்கும். இஞ்சித் தேநீர், தேனுடன் கலந்து உண்பது நலன் பயக்கும். வெங்காயம், பூண்டு, ஆப்பிள் போன்றவை, எச்.பைலோரி நுண்ணுயிர் பெருக்கத்தைக் கட்டுப்படுத்தும். தயிர், கேரட் சாறு, தேங்காய் தண்ணீர், பச்சைக் காய்கறிகள், பழச்சாறுகள் ஆகியவையும் இரைப்பை அழற்சியைத் தவிர்க்க உதவும்.

11.          வலி மாத்திரைகளின் நீண்ட நாள் பயன்பாடு இரைப்பை அழற்சியை உண்டாக்கினால் அவற்றை உடனடியாக நிறுத்த வேண்டும். இரைப்பை அழற்சி ஏற்படுத்தாத வலி மாத்திரைகளை மருத்துவர் அறிவுரைப்படி எடுத்துக் கொள்ளலாம்.

உணவுக் கட்டுப்பாடுகளால் சீராகாத இரைப்பை அழற்சி பெரும்பாலும் மருந்துகளால்  சீராக்க முடியும். முன்பெல்லாம் அழற்சியின் விளைவாக, வயிற்றுப் புண் ஏற்பட்டு, நாளடைவில் அதுவே வயிற்றுப் புற்று நோயாக மாறும் நிலை இருந்தது. இதனால் அதிகம் பேர் பாதிக்கப்படும் நிலை ஏற்பட்டது. அந்த நேரங்களில் இரைப்பையின் பாதிக்கப்பட்ட பகுதியையோ அல்லது முழு இரைப்பையையோ (Partial gastrectomy, total gastrectomy) எடுத்துவிடும் நிலை கூட இருந்தது. இரைப்பை அழற்சி தடுப்பான் மருந்துகள் கண்டுபிடிக்கப்பட்ட பின் இந்த நிலை வெகுவாக மாறிவிட்டது. அதுபோலவே அழற்சியிலிருந்து, புண்ணாக மாறும் நிலை குறைந்துவிடும் வாய்ப்பால், இரைப்பைப் புற்று நோயும் குறைந்துவிட்டது. புற்றுநோய் ஏற்படும் நேரங்களில் மேற்சொன்ன அறுவை மருத்துவத்தோடு, புற்றுநோய் முறிப்பான்களை (Anti-Metabolites)யும், ஊடுகதிர் மருத்துவமும் (Radiation) செய்வது தேவையான இருக்கும்.

பொதுவாக இரைப்பை அழற்சிகளுக்கு, அமில முறிப்பான்களை (Antacids) பயன்படுத்தலாம். எச். பைலோரி நோய்த் தொற்றுக்கு, உயிர்க் கொல்லி (Anti-biotics)கள் மருத்துவர் அறிவுரைப்படி எடுத்துக் கொள்ளலாம். இரத்தச் சோகையினால் ஏற்படும் அழற்சி, பி12 ஊசி மருந்துகள், மாத்திரைகளால் எளிதில் கட்டுக்குள் வரும். எச்-2 தடுப்பான்கள் (Pantaprazole) போன்ற மருந்துகளும் சிறந்த பயனைத் தரும்.

எந்த நோயும் ஆரம்ப நிலையில் கவனித்து, மருத்துவம் செய்தால் சிறந்த பலனைத் தரும். நோயும் முழுமையாக நன்றாகும். உணவுக் கட்டுப்பாடுகள் நோய் வருவதைத் தடுக்கும். ஆரம்ப நிலை அழற்சி, மருந்துகள் மூலம் கட்டுப்படுத்த முடியும்.

(தொடரும்)

- உண்மை இதழ், 1-15.2.21

Home -> 2011 இதழ்கள் -> ஜூன் 01-15 -> கொதிக்கும் ரத்தம்

2011 உண்மை இதழ்கள் -> ஜூன் 01-15 -> 

கொதிக்கும் ரத்தம்

மனிதர்களுக்கு மட்டுமல்லாமல் எல்லா உயிரினங்களுக்கும் ரத்தவோட்டம் இருக்கிறது. தாவரங்களுக்கு ரத்தம் என்பது தண்ணீர்தான். எல்லா விலங்குகளுக்கும் ரத்தம் சிவப்பாக இருப்பதில்லை. சில உயிரினங்களுக்கு வெள்ளையாகக்கூட இருக்கிறது. பதினாறாம்  நூற்றாண்டு வரை உடலில் ரத்தம் இருக்கிறது என்று தெரியுமே தவிர அது சுற்றோட்டம் (circulation)ஆகிக் கொண்டிருக்கிறது என்பது மருத்துவர்களுக்குக் கூடத் தெரியாமல்தான் இருந்தது.

இங்கிலாந்தில் வாழ்ந்த வில்லியம் ஹார்வி ( ஏப்ரல் 1, 1578 -  ஜூன் 3, 1657 )என்பவர்தான் இதயம் ஒவ்வொரு முறையும் துடிக்கும்போது இரண்டு அவுன்ஸ் ரத்தம் வெளியேற்றப் படுவதையும் நிமிடத்திற்கு எழுபத்திரண்டு முறை துடிப்பதையும் ஒரு நாளைக்கு ஆயிரத்து அய்நூறு காலன் ரத்தம் அதன் வழியாக செல்வதையும்  கண்டறிந்தார். இதயத்திலிருந்து ரத்தம் தமனிகளின் மூலமாக வெளிச்சென்று சிரைகளின் மூலமாய் அது மீண்டும் இதயத்தை அடைகிறது என்பதையும் வில்லியம் ஹார்வி கண்டறிந்து உலகிற்குச் சொன்னார்.

இந்த ரத்தச் சுற்றோட்டம் குறிப்பிட்ட அழுத்தத்தில் இருக்கவேண்டும். குறையினும் மிகையினும் நோய் செய்யும்!

18 அல்லது அதற்கு அதிகமான வயதையுடைய வயதுவந்தோருக்கு பின்வரும் இரத்த அழுத்த வகைப்பாடு பயன்படுத்தப்படுகிறது. கீழே உள்ள அட்டவணை   2 அல்லது அதற்கு அதிகமான அலுவலக வருகையின் போது சரியாக அளவிடப்பட்ட அமர்ந்த நிலையில் எடுக்கப்பட்ட  இரத்த அழுத்த அளவுகளின் சராசரியை அடிப்படையாகக் கொண்டுள்ளது.

வயதுவந்தோருக்குரிய இரத்த அழுத்தத்தின் வகைப்பாடு

நம்முடைய ரத்த அழுத்தம் இயல்பான நிலையில் இருந்தால் நல்லது. ஆனால், எல்லோரும் எல்லா நேரத்திலும் அமைதியாக இருந்துவிட முடியாது. தனிப்பட்ட வாழ்க்கையில் ஏற்படும் பிரச்சினைகள், அலுவலகப் பிரச்சினைகள், தொழிலில் ஏற்படும் நட்டம், நம்பிக்கைத் துரோகம்,உலக நடப்புகள், ஆகிய காரணங்களால் நம்முடைய ரத்த அழுத்தத்தில் மாறுதல் ஏற்படும்.

ரத்த அழுத்தத்தைக் கட்டுப்படுத்துவதற்காக எந்த உணர்ச்சியும் இல்லாத ஜடமாக வாழ்ந்துவிட முடியாது.
"நகையே அழுகை இளிவரல் மருட்கை
அச்சம் பெருமிதம் வெகுளி உவகை என்று
அப்பால் எட்டே மெய்ப்பாடென்ப "

என்பது தொல்காப்பியம் கூறும் மனவெழுச்சிகள் (emotions). சூழலுக்கேற்ப நம்முடைய உணர்சிகளை வெளிப்படுத்தித்தான் ஆகவேண்டும். அதை அழுத்தி வைக்கவோ அளவுக்கதிகமாக வெளிப்படுத்தவோ கூடாது. மனதிற்கு மகிழ்ச்சியளிக்காத நிகழ்வுகள் நடக்கும்போது ரத்த அழுத்தம் நிச்சயம் அதிகரிக்கும். அம்மாதிரியான நிகழ்ச்சிகள் நடக்காமல் தடுப்பது என்பது இயலாத காரியம். ஆனால், மனதையும் உடலையும் பயிற்சிகள் மூலம் பக்குவப்படுத்தி குருதியழுத்தத்தைக் குறைத்துக்கொள்ள முடியும்.

சத்தமில்லாமல் ஒரு யுத்தம்

உயர் ரத்த அழுத்தம் உள்ள பலருக்கு (95%) அதன் அறிகுறி தெரிவதில்லை.

அதனால்தான் இதை அமைதிக் கொலையாளி (silent killer) என்கிறார்கள். உயர் ரத்த அழுத்தம் ரத்தக் குழாய்களைச் சுருக்கி ரத்தவோட்டத்தைத் தடை செய்கிறது. இதனால் இதயமும் சிறுநீரகமும் பாதிக்கப்படுகிறது. சில நேரம் மூளையையும் தாக்குகிறது. இதனால் இதயத்திற்கு அதிக வேலைப்பளு ஏற்படுகிறது. இதன் காரணமாக உடல் செயலிழப்பு, இதய செயலிழப்பு, சிறு நீரக செயலிழப்பு, நெஞ்சுவலி போன்றவை ஏற்படுகின்றன.

மேற்கண்ட பிரச்சினைகள் வராமல் தவிர்க்க, முப்பது வயதிற்கு மேற்பட்டவர்கள் மூன்று மாதத்திற்கு ஒருமுறை ரத்த அழுத்தப் பரிசோதனை செய்துகொள்ள வேண்டும். மருத்துவரின் ஆலோசனைப்படி அவரவர் களுக்கு ஏற்ற உடற்பயிற்சி,உணவு அட்டவணையை தயார் செய்துகொண்டு அதை தினசரி பின்பற்ற வேண்டும்.

உயர் ரத்த அழுத்தத்திற்கான சில தவிர்க்க  இயலாத காரணிகள் முதுமை: முதுமை காரணமாக ஏற்படும் உயர் ரத்த அழுத்தத்தைத் தவிர்க்க முடியாது. இனம்: ஆப்ரிக்க அமெரிக்கர்கள் (கறுப்பினத்தவர்) போன்ற ஒருசில இனங்களில் மற்ற இனத்தாரைக் காட்டிலும் இளம் வயதிலேயே ரத்த அழுத்தம் தாக்குகிறது.

சமூக அந்தஸ்து: கீழ் நடுத்தர மக்களுக்கும் கல்வியறிவு குறைந்தவர்களுக்கும் சமூகத்தில் உயர்நிலையில் இருப்பவர்களைக் காட்டிலும் உயர் ரத்த அழுத்தம் சிக்கலை ஏற்படுத்துகிறது.

பரம்பரை: குடும்பச் சொத்தாக அனைவருக்கும் இந்நோய் வருவதுண்டு.

கர்ப்பக் காலம்: நிறைய பெண்களுக்கு கருவுற்றிருக்கும் காலத்தில் உயர் ரத்த அழுத்தம் வருவதுண்டு. பேறு காலத்திற்குப் பின் இயல்பாகிவிடும்.

உயர் ரத்த அழுத்தத்திற்கான சில மாற்றக் கூடிய  காரணிகள்

உடற்பருமன்: அதிக்கபடியான உடல் எடை உயர் ரத்த அழுத்தத்திற்கான முதன்மைக் காரணமாகும்.

சோடியம் உப்பு: சோடியம் சென்சிடிவ் என்ற நுட்பமான உணர்ச்சி  உள்ளவர்களுக்கு  உட்கொள்ளும் உப்பின் அளவிற்கேற்ப ரத்த அழுத்தம்  அதிகரிக்கவோ குறையவோ கூடும்.சோடியம் உப்பு, உணவின் மூலமாகவும் சில வலி நிவாரணி மருந்துகள் மூலமாகவும் உட்செல்கிறது.

மது: அதிக அளவில் தொடர்ந்து மது அருந்துபவர்களுக்கு ரத்த அழுத்தம் அதிகரிக்கும்.

மருந்துகள்: கருத்தடை மாத்திரைகள், உணவுக் கட்டுப்பாடு (diet) மாத்திரைகள், மற்றும் ஒவ்வாமைக்கான மருந்துகள் ரத்த அழுத்தத்தை அதிகரிக்கும்.

வேறு சில காரணங்கள்: புகைப் பிடித்தல் அல்லது புகைப்பவர்களின் அருகில் தொடர்ந்து இருத்தல்.

சர்க்கரை நோய். (சாப்பிடாத போது 125 mg /dL க்கும் அதிகமாக  இருந்தால்.)

சிறுநீரகக் கோளாறு.

உழலுழைப்பு இல்லாமை, உட்கார்ந்தே வேலை செய்பவர்கள்.
45 வயதைத் தாண்டிய ஆண்கள்.

55 வயதைத் தாண்டிய பெண்கள்.

கருத்தடை மாத்திரை உட்கொள்பவர்கள்.

மேற்கண்ட காரணிகளைத் தவிர்ப்பதன் மூலம் ரத்த அழுத்தத்தைக் கட்டுப்படுத்தலாம்.

ரத்த அழுத்தம் அதிகமாக இருப்பதற்கான அறிகுறிகள் என்ன?

பொதுவாக ரத்த அழுத்தம் அதிகரித்திருப்பதற்கான அறிகுறிகள் எதுவும் தெரிவதில்லை. வழக்கமான உடற் பரிசோதனைகளின் போது இதைத் தெரிந்து கொள்ளலாம். உங்கள் நெருங்கிய உறவினர் களுக்கு உயர் ரத்த அழுத்தம் இருப்பின் அதற்கான வாய்ப்பு உங்களுக்கும் அதிகம் என்பதைக் கவனத்தில் கொண்டு அவ்வப்போது சோதனை செய்து கொள்ளுங்கள். மேலும், மன உளைச்சலைத் தரும் நிகழ்வுகளால் தொடர்ந்து தூக்கமின்றியும் தவிப்பாகவும் இருக்கும்போது சோதனை செய்து மருத்துவரின்  ஆலோசனையின்படி நடப்பது நல்லது.

உயர் ரத்த அழுத்தத்திற்கான சிகிச்சைகள் என்ன?

உயர் ரத்த அழுத்தத்திற்கு முக்கியமாக வழக்கமான வாழ்க்கை முறையிலிருந்து (life style)  சில மாற்றங்களைச் செய்ய வேண்டும். தேவைப்பட்டால் மருந்துகள் எடுத்துக்கொள்ளலாம்.

1. உடல் எடையைக் குறைத்தல்.

2. புகைப் பிடிப்பதை நிறுத்துதல்.

3. ஆரோக்கியமான உணவு முறை

4. உணவில் உப்பைக் குறைத்தல்.
(தமிழ்நாட்டு மக்கள் ஏன்தான் இவ்வளவு  அதிக உப்பும் சர்க்கரையும் சாப்பிடுகிறார்கள் என்று தெரியவில்லை!)

5. நாள்தோறும் முறையான உடற்பயிற்சி.

6. மது அருந்துவதைக் குறைத்தல்.

இதனுடன் மருத்துவர்கள் பரிந்துரைக்கும் மருந்துகளையும் எடுத்துக்கொள்ளலாம். எச்சரிக்கை! மருத்துவர்களின் ஆலோசனை இல்லாமல் மருந்துகளைக் கூட்டியோ குறைத்தோ உட்கொள்ளாதீர்கள்.

எந்த மாதிரியான உணவுகளை எடுத்துக் கொள்ளலாம்?

நலமான (ஆரோக்கியமான)உணவு, அதாவது DASH (Dietary Approaches to Stop Hypertension)  diet  எனப்படும் உணவு முறை ரத்த அழுத்தத்தைக் குறைப்பதற்கு மிகச் சிறந்த வழியாகும். இது வழக்கமாக உண்ணும் முறையிலிருந்து மாறுபட்டது. அதாவது,

* அதிக அளவு பழங்கள்,காய்கறிகள், மற்றும் கொழுப்புக் குறைக்கப்பட்ட பால் உணவுகள்.

* கொலஸ்ட்ராலை அதிகரிக்கும் எண்ணெயில் பொரிக்கப்பட்ட உணவுகளைத் தவிர்த்தல்.

* தானிய வகைகள், மீன், கொழுப்பில்லாத கோழிக் கறி ஆகியவை.

* இனிப்பு மற்றும் ஆட்டிறைச்சி, மாட்டிறைச்சி ஆகியவற்றைக் குறைவாக உண்ணல்.

* மக்னீசியம், பொட்டாசியம் , மற்றும் கால்சியம் ஆகியவை அதிகமுள்ள உணவுகளை எடுத்துக்கொள்ளல்.

இக்காலத்தில் இளைஞர்களையும் கூட இந்நோய் தாக்குவதால் 20 வயதிலிருந்தே ரத்த அழுத்தத்தைப் பரிசோதித்துக் கொள்வது நல்லது. அவர்களும் மேற்கண்ட உணவு முறைகளையும் உடற்பயிற்சிகளையும் மேற்கொள்வது கட்டாயம்.

தினந்தோறும் நம்மைச் சுற்றி பல அநியாயங்களும், மனக்குமுறல்களை உண்டாக்கும் நிகழ்வுகளும் நடந்துகொண்டு தானிருக்கின்றன. அவற்றை எதிர்த்துப் போராடவேண்டிய சமுதாயக் கடமையும் நமக்கிருக்கிறது. அப்போதெல்லாம் நம் குருதியழுத்தம் கொதி நிலைக்கு வரும் என்பதும் உண்மை. அந்த உணர்ச்சிதான் நமக்குப் போர்க்குணத்தைக் கொடுக்கிறது என்பதும் உண்மை. ஆனால், அந்தப் போர்க்களத்தில் நிலைத்து நிற்க நம் உடலையும் மனதையும் பக்குவப்படுத்த மேற்சொன்ன நல வழிகளைப் பின்பற்றி நீண்ட நாள் வாழ்ந்து   நாமும் சமுதாயமும் பயன் பெறுவோம்.

- க. அருள்மொழி

மருத்துவம்: விதி நம்பிக்கையை விலக்கிய அதி நவீன மருத்துவங்கள்! (22) இரைப்பை அழற்சி (GASTRITIS)

Home -> Unmaionline -> 2021 -> ஜனவரி 16-31, 2021 -> 

மருத்துவம்: விதி நம்பிக்கையை விலக்கிய அதி நவீன மருத்துவங்கள்! (22)

 

 

 

 

 

இரைப்பை அழற்சி (GASTRITIS)

மரு.இரா.கவுதமன்

‘இரைப்பை அழற்சி’ (Gastritis) மிகவும் அதிக அளவில் காணப்படும் ஓர் நோய். இந்தியாவில் ஆண்டுக்கு 10 லட்சம் பேர் இந்நோயால் பாதிக்கப்படுகின்றனர். பொதுவாக இரைப்பை அழற்சி பல காரணங்களால் ஏற்படும். இரைப்பைச் சுவர்களில் ஏற்படும் அழற்சியையே (Inflammation of the lining of the stomach) இந்நோய்க்குக் காரணம். இரைப்பைப் புண்கள் ஏற்படக் காரணமான நுண்கிருமிகளே இரைப்பை சுவர் அழற்சிக்குக் காரணிகளாக பெரும்பாலும் உள்ளன. வலி மாத்திரைகள் நீண்ட நாள்கள் பயன்படுத்துதல், மதுப் பழக்கம் போன்றவை இந்நோயை ஏற்படுத்தும். இரைப்பை அழற்சி சிலருக்கு திடீரென ஏற்படலாம். (Acute Gastritis) அல்லது லேசான வயிற்று வலியாகத் துவங்கி, கொஞ்சம் கொஞ்சமாக நாள்பட அதிகமாகலாம் (Chronic Gastritis). சரியான மருத்துவம் உரிய நேரத்தில் செய்யாவிடில், நாளடைவில் இரைப்பையில் புண்கள் ஏற்படும் நிலையிலும் அதுவே பிற்பாடு இரப்பைப் புற்று நோயாகி (Stomach Cancerஷீ) மாறும் நிலைகூட ஏற்படலாம். ஆரம்ப நிலை மருத்துவம் இந்நோயை முழுமையாகக் குணப்படுத்தும். புறக்கணிக்கப்பட்ட அறிகுறிகளும், சரியான மருத்துவம் செய்யாமையுமே நோயை, ஆபத்தான நிலைக்குக் கொண்டு செல்லுமே ஒழிய, பெரும்பாலும் ஆரம்ப நிலையில் எளிதாகவும், முழுமையாகவும் இந்நோயைக் குணப்படுத்த முடியும். இனி இந்நோயைப் பற்றிப் பார்ப்போம்.

நோய்க்கூறு: (Pathogenesis): இரைப்பை அழற்சி, இரைப்பைச் சுவரில் ஏற்படும் மாற்றமேயாகும். இரைப்பைச் சுவரில் ஏற்படும் காயங்களோ (Injury), அல்லது தளர்ச்சியோ (Weakness) அழற்சியை ஏற்படுத்தும். நிறைய காரணங்களாலும், சில வகை நோய்களும் அழற்சியை ஏற்படுத்தும். குரோன் நோய் (Crohn’s Disease), இணைப்புத் திசுப் புற்றுநோய் (Sarcoidosis) போன்றவை இரைப்பை அழற்சியை ஏற்படுத்தும்.

காரணிகள்:

¨           மன அழுத்தம், இரைப்பை அழற்சிக்கு ஓர் முக்கியமான காரணி.

¨           பெரிய அறுவை மருத்துவம், அடிபடுதல், தீக்காயங்கள், நோய்த் தொற்று இவற்றால் ஏற்படும் மன அழுத்தம்.

¨           புகைபிடித்தல்

¨           தன்னுடல் தாக்கு நோய் (Auto-immune Disease) இதை தன்னுடல் “தாக்கு இரைப்பை அழற்சி’’ (Auto immune gastritis) என்று மருத்துவர்கள் குறிப்பிடுவர்.

¨           நம் உடலில் உள்ள உயிரணுக்கள் (cells), இரைப்பையின் சுவர்களில் உள்ள “புறணி’’ (Lining) களைத் தாக்கும். இரைப்பையின் பாதுகாப்பு வளையம் (Protective Barrier) இதனால் பாதிக்கப்பட்டு, இரைப்பை அழற்சி ஏற்படும்.

¨           வேறு வகையான தன்னுடல் தாக்கு நோய்கள் இருப்பினும், அவை இரைப்பை அழற்சியைத் தூண்டி விடும். எடுத்துக்காட்டாக, “ஹெஸிமோட்டோ’’ (Hashimotto disease) நோய், நீரிழிவு நோய் (ஒன்றாம் வகை) (Type 1 Diabetes Mallitus), வைட்டமின் பி12 குறைபாடு (Vitamin B12 deficiency) ஆகியவை இரைப்பை அழற்சியை தூண்டிவிடும்.

¨           மனிதநோய் எதிர்ப்பு குறைபாடு (AIDS) நோய், குரோன்ஸ் (Crohn’s disease), ஒட்டுண்ணி நோய்த் தொற்று (Parasitic Infection) ஆகிய நோய்களும் இரைப்பை அழற்சியை ஏற்படுத்தும் தன்மையுடையவை.

¨           மதுப்பழக்கம்: மது, இரைப்பையின் உட்சுவரை அரிக்கும் தன்மை உடையது. இதனால் இரைப்பையில் சுரக்கும் நொதியங்கள் (Enzymes), இரைப்பையின் வெளிச்சுவர்களில் உள்ள சவ்வுப் படலத்தை (Mucasa) சிதைக்கும். அதனால் ஹைட்ரோ குளோரிக் அமிலம் நேரடியாக இரைப்பைச் சுவரில் படிந்து, இரைப்பை அழற்சியை ஏற்படுத்தும்.

¨           முதுமை (Old age) யில் இரைப்பைச் சுவர் வழமையை விட மெலிந்து விடும். சுவர்களின் பாதுகாப்பு அரண் மெலிந்து விடும். அதனால் எளிதாக எச்.பைலோரி (H. Pylori) என்கிற நோய்த் தொற்று ஏற்படும் நிலை ஏற்படும். முதுமையில் தன்னுடல் தாக்குநோய்களும் எளிதாக வரும் நிலையில் உள்ளதால் இரைப்பை அழற்சி எளிதில் ஏற்படும்.

¨           நோய்த் தொற்று: “ஹெலிகோபேக்டர் பைலோரி’’ (Helicobacter Pylori - H. Pylori) என்ற நுண்கிருமிகள் இரைப்பைச் சுவர்களில் படிவதால், அவை இரைப்பை அழற்சியை ஏற்படுத்தும் நிலை உண்டாகும். இந்நோய்த் தொற்று இரைப்பையிலும், உணவுப் பாதையிலும் பெரும்பாலோருக்கு இருந்தாலும், இரைப்பை அழற்சியை ஒரு சிலருக்கே உண்டாக்கும் தன்மை உடையதாக உள்ளது.

¨           உணவு (Diet): அதிகக் காரமான உணவு, மிக அதிகச் சூடாக தண்ணீர், தேநீர், காஃபி குடிப்பவர்களுக்கு நாளடைவில் இரைப்பையின் பாதுகாப்புத் திசுக்கள் சிதைந்து, அழற்சியை உண்டாக்கும்.

¨           வலி குறைப்பு மருந்துகள்: வலி குறைப்பு மருந்துகளை நீண்ட காலம் பயன்படுத்துபவர்கள் இந்நோயைப் பெறும் வாய்ப்பு அதிகம். இதயத் தமனி அடைப்பு நோய், வேறு இரத்தக் குழாய் அடைப்பு நோய்களுக்கு பயன்படுத்தும் “ஆஸ்பிரின்’’ (Aspirin), புரூஃபன் (Brufen), நேப்ரோக்ஸின் (Naproxin) போன்ற மருந்துகளும், ஸ்டீராய்டு, கலவாத அழற்சி எதிர்வினை மருந்துகள் (Non Steroid anti-inflammatory - NSAID) ஆகியவற்றின் நீண்ட காலப் பயன்பாடு, இரைப்பை அழற்சியை ஏற்படுத்தும்.

அறிகுறிகள்: நோயின் அடிப்படை அறிகுறிகள்:

*          மேல் வயிற்றில் மார்பு எலும்புக்குக் (Sternum) கீழ் வலி ஏற்படுதல்.

*          அடிக்கடி ஏப்பம்.

*          புளித்த ஏப்பம்.

*          நெஞ்சு எரிச்சல்.

*          வயிற்றுப் பகுதியில் எரிச்சல்.

*          வலி உணவு உண்ட பின் சரியாகி விடும்.

*          குமட்டல்.

*          வாந்தி.

*          உணவிற்குப் பின் ஏற்படும் வலி வாந்தி எடுத்த பின்பே சரியாகும்.

*          மேல் வயிற்றில் (Epigastirc) உண்டாகும் வலி, வயிற்றுப் பகுதி முழுவதும் பரவும்.

*          குறைந்த அளவு உணவு உண்டாலே வயிறு நிறைந்தது போன்ற உணர்வு.

*          நோய் அதிகமாகும் பொழுது, இடைவிடாத வலி.

*          இரைப்பையில் புண் ஏற்பட்டுவிட்டால், இரத்த வாந்தி ஏற்படும்.

*          மலம் கருப்பாக (இரத்தம் கலந்து) வெளியேறுதல்.

*          நோய் அதிகமாகும்போது இரைப்பைப் புண்ணாக மாறும் நிலை ஏற்பட்டால் அறிகுறிகள் மேலும் தீவிரமாகும்.

*          புற்று நோயாக மாறினால் அறிகுறிகள் அளவிறந்த தொல்லையாக நோயாளிக்கு உண்டாகும்.

*          உணவு உட்கொள்ள முடியாது.

*          நாள்பட்ட நோய் அருகில் உள்ள உறுப்புகளுக்குப் பரவும்.

                தாங்க முடியாத வலி

*          உடல் மெலிவு

*          பசியின்மை

*          நிமிரக்கூட முடியாத நிலை

*          முடிவாக மரணத்தையும் எதிர்கொள்ளல்.

(தொடரும்)

இரைப்பை, உணவுக்குழாய் பின்னோட்ட நோய் - நவீன மருத்துவங்கள்! (20)

-மரு இரா.கவுதமன்

இரைப்பையும் (Stomach), உணவுக் குழாயும் (Esophagus), நம் உணவு மண்டலத்தின் ஆரம்ப நிலை உறுப்புகளாகும். வாயின் உள்புறம், தொண்டையின் முடிவில் துவங்கி, வயிற்றில் முடியும் உணவுக் குழாய் 10 அங்குலம் (25 செ.மீ) நீளமுடையது. மூச்சுக்குழாய்க்கும், வயிற்றையும் பிரிக்கும் இடைத் தசைச் சுவரின் (Diaphragm - உதரவிதானம்) இடைவெளியின் வழியாகக் (Hiatus) கீழிறங்கி இரைப்பையோடு இணையும். தசைகளால் ஆன இக்குழாய், சுருக்கு தசை (Sphincter) யால் மூடப்பட்டிருக்கும். கீழ்நோக்கி அசையும் அடைப்பிதழ்கள் (Valves)) போல் இது செயல்படும். இதனால் இரைப்பைக்குச் செல்லும் உணவு, மீண்டும் உணவுக் குழாய்க்கு செல்லாது தடுக்கப்படும்.

இரைப்பை, ‘J’ வடிவில் அமைந்துள்ள, தசைகளால் ஆன பை. உணவுக்குழாய், இரைப்பையோடு இணைந்துள்ளதுபோல், இரைப்பை, சிறு குடலின் மேல் பகுதியான மேல்சிறு குடலுடன் இணைந்திருக்கும். (Duodenum) இரைப்பை அளவு உணவு கொள்வதற்கு ஏற்ப மாறுதல் அடைவதால், சரியாகக் கணிக்க முடியாது. இரைப்பையின், உணவுக் குழாய் தொடர்ச்சியில், உள்ளதுபோலவே, மேற்சிறு குடலின் இணைப்பிலும், சுருக்குத் தசைகள் அமைந்திருக்கும். இரைப்பையின் உள் சுவரில், கண்ணுக்குத் தெரியாத, நுண்ணிய நீர்ச் சுரப்பிகள் உள்ளன. எண்ணிக்கை அளவில், இவை 4,00,000 அளவு இருக்கும்.
இவை முதன்மைச் சுரப்பிகள் (Chief Secretory Cells), என்றும், சுவர்ச் சுரப்பிகள் (Parietal Secretory Cells) என்றும் இரண்டு வகைப்படும். முதன்மைச் சுரப்பிகள், நொதியங்களையும், சுவர்ச் சுரப்பிகள், ஹைட்ரோ குளோரிக் அமிலத்தையும் சுரக்கக் கூடியவை. நொதியங்களில், பெப்சின், ரெனின் (Pepsin, Renin) முதன்மையானவை. இரைப்பை இரு வளைவுகளைக் கொண்டது. அவை சிறிய மற்றும் பெரிய வளைவுகளாகும்.

மூன்று பாகங்களைக் கொண்டது. அடிக்குழி (Fundus) உடல் (Body), குடல்வாய்க்குழி (Autrun) என்று மூன்று பகுதிகளாகப் பிரிக்கப்பட்டிருக்கும். இரைப்பை, மேல் சிறு குடலுடன் இணையும் பகுதியில் அமைந்துள்ள சுருக்கு தசைகள், மேல் சிறு குடல் வழியே இரைப்பையிலிருந்து வெளியேறும் உணவின் அளவைக் கட்டுப்படுத்தும். இரைப்பையின் உள் சுவரில் ஏராளமான மடிப்புகள் இருக்கும்.

இவை ரூகே (Rugae) மடிப்புகள் எனப்படும். இரைப்பையில் உணவு சேரும்பொழுது, சுவர்கள் மேலும் விரிந்து அதிக அளவு உணவைக் கொள்ளும். இரைப்பையின் உட்சுவர் உள்ளே சதைப் பகுதி, சுரப்பிகள், வெளியே சவ்வுப் படலம் (Mucousa) ) ஆகியவையால் அமைக்கப்பட்டிருக்கும். உடல் பகுதியில் சுரக்கும் ஹைட்ரோகுளோரிக் அமிலம் ஆக்ஸின்டிக் (Oxyntic) உயிரணுக்களால் சுரக்கப்படுகின்றன. இந்த அமிலத்தால் உட்சுவரில் பாதிப்படையாமல் இருக்க சவ்வுப்படலம் பாதுகாப்பை வழங்கும். உடற்பகுதியில்தான் இந்த உயிரணுக்கள் (அமிலத்தைச் சுரப்பவை) அமைந்திருக்கும்.

அடிப் பகுதியில் பெப்சின், ரெனின் சுரப்பிகள் உள்ளன. நொதியங்கள் (Enzymes) செயல்பாட்டிற்கு ஹைட்ரோகுளோரிக் அமிலம் உதவுகிறது பெப்சின், ரெனின் சுரப்பிகள் உணவு செரிமானத்திற்கு உதவுகின்றன.

இரைப்பை, உணவுக்குழாய் பின்னோட்ட நோய் (Gastro esophageal reflux disease): இது ஒரு நீண்ட கால நோயாகும். இதன்போது இரைப்பையில் இருந்து, உணவுக் குழாய்க்கு இரைப்பைச் சுரப்புகள், உணவுகள் மேல் நோக்கித் தள்ளப்படும். (புளித்த ஏப்பம்). உணவுக் குழாய், இரைப்பை இணையும் இடத்தில் உள்ள சுருக்குத் தசைகள் இளகுவதால் இந்த நிலை உருவாகிறது. இரைப்பைச் சுவரில் உள்ள ஹைட்ரோகுளோரிக் அமிலமும் உணவுடன் சேர்ந்து உணவுக் குழாய்க்குள் வரும். அதனால் அங்கு அமைந்துள்ள சவ்வுப் படலம் பாதிக்கப்படும். இதனால் உணவுக்குழாய் அழற்சி ஏற்படும்.
வாரத்திற்கு இரண்டு முறைக்கு மேல் புளி ஏப்பம் ஏற்பட்டால், இந்நோயின் அறிகுறியாகக் கொள்ளலாம். தேசிய நீரிழிவு, செரிமானம், சிறுநீரக நோய்கள் நிறுவனம், அமெரிக்காவில் 20 சதவிகிதம் மக்கள் இந்நோயால் பாதிக்கப்பட்டுள்ளதாகக் கூறுகிறது. ஏழ்மையும், வறுமையும் கல்வியின்மையும் ஒருபுறம், ஏராளமான கொழுப்புள்ள உணவுகள் எடுத்தல், உடற்பயிற்சியின்மை, ஒரே இடத்தில் அமர்ந்து வேலை செய்தல் போன்றவையும் நம் நாட்டு மக்களிடையே அதிகம் ஏற்டக் காரணமாகின்றது.

அறிகுறிகள்:
நெஞ்சுப் பகுதியில் ஒருவிதமான சங்கடம்.
நெஞ்சு எரிச்சல்.

இந்தச் சங்கடமும், எரிச்சலும் கழுத்துப் பகுதிக்கும் பரவும்.
பொதுவாக இதை இதய எரிச்சல் (Heart burn) எனக் கூறுவர்.
வாயின் உட்புறம் காரம், கசப்பு உணர்வு தோன்றும்.

சில நேரங்களில் புளிப்புச் சுவையோடு கூடிய உணவு வாய் வரையில் வந்து செல்லும்.

சில பொழுதுகளில் உணவு விழுங்குவதில் இடைஞ்சல் ஏற்படும்.
சிலருக்கு மூச்சுத் திணறல் ஏற்படவும் கூடும்.

தொடர் இருமலால்கூட நோயாளி பாதிப்படையும் நிலையும் சில நேரங்களில் ஏற்படும்.

ஆஸ்துமா போன்ற நோய்கள்கூட பின்விளைவாக வரும்.

சரியாக மருத்துவம் செய்யாவிட்டால் நோய் ஆபத்தை உண்டாக்கும் நிலையும் ஏற்படும்.

உணவு இரைப்பையில் இருந்தாலும், இல்லாவிட்டாலும் அடிக்கடி ஏப்பம் வரும். இரைப்பைக் காற்று இயல்பாக அடிக்கடி ஏப்பமாக மாறி வெளியேறுவதை உணவுக்குழாய் சுருக்குத் தசை தடுத்து விடும். அத்தசை இலகுவாகி விடுவதால்தான் இந்நிலை.

சில நேரங்களில் ஏப்பமாகக் காற்று வெளியேறிவிட்டால், அது வெளியேறும் வரை, மூச்சுத்திணறல் கூட ஏற்படும்.
(தொடரும்...)

- உண்மை இதழ், 16- 31 .12 .20

நாள்பட்ட நுரையீரல் அடைப்பு நோய் (Chronic Obstructive Pulmonary Disease)

மருத்துவம் : விதி நம்பிக்கையை விலக்கிய அதி நவீன மருத்துவங்கள்! [19] - 

மரு.இரா.கவுதமன்

 

 

நோயின் அறிகுறிகள்:

¨           இருமல், தொடர்ச்சியான இருமல், வறட்டு இருமலாகவும் (Dry Cough), சளியோடு கூடிய இருமலாகவும் இருக்கக் கூடும்.

¨           சளி அதிகமாக தொண்டையிலும், நுரையீரலிலும் சேரும். சளி, தொண்டையிலும், மூச்சுக் குழலிலும் சேரும்பொழுது, உயிர் மூச்சுக் காற்று நுரையீரலுக்குள் செல்வதற்கு, இடைஞ்சல் உண்டாகும்.

¨           உயிர் மூச்சுக் காற்று (ஆக்சிஜன்) முழு அளவு உள்ளே செல்லாததால் மூச்சிரைப்பு ஏற்படும். இதை “காற்றுப் பசி’’ (Air Hunger) எனக் குறிப்பிடுவர்.

¨           மூச்சிரைப்பு அடுத்த நிலையில் ‘மூச்சுத் திணறலாக’ உருவெடுக்கும்.

¨           உயிர்மூச்சுக் காற்றின் தேவை அதிகரிப்பதால், ”குறுகிய வேகமான மூச்சு’’ (Rapid Breathing) உண்டாகிறது.

¨           காற்று பற்றாக்குறையை சரி செய்ய முடியாத நிலையில நோயாளி ஆழ் மயக்க நிலைக்குச் (Coma) சென்று விடுவார்.

¨           ஆஸ்த்மா என்ற மூச்சிரைப்பு நோயிலும், இதே அறிகுறிகள் இருக்கும். நோயறிகுறிகளை எளிதாகக் கட்டுப்படுத்த முடியும். ஆனால், நுரையீரல் அடைப்பு நோயில் அவ்வாறு கட்டுப்படுத்த முடியாது.

¨           நாள்பட்ட மூச்சிரைப்பு நோயில், நுரையீரல் திசுக்கள் அழிந்து விடுவதால், அவை மீண்டும் சீரடைவதில்லை என்ற நிலை ஏற்படுவதால், அவற்றின் அறிகுறிகள் எளிதில் சீராக்க முடியாத நிலை ஏற்பட்டு, மேலும், மேலும் நோய் முற்றி, முடிவில் நோயாளி மரணமடைந்து விடுவார்.

¨           ஏற்கெனவே இந்நோயால் பாதிக்கப்படுபவர்கள், புகைப்பிடிக்கும் பழக்கத்தைக் கைக் கொண்டிருந்தால் அது மேலும் மிகுந்த பாதிப்பை ஏற்படுத்தும்.

¨           தூசு, காற்றின் மாசு, வேதியியல் வாயு போன்றவையும், இதேபோன்று ஏற்கெனவே பாதித்து, அழிந்த நுரையீரல் திசுக்களை மேலும் அழிவு நிலைக்கே கொண்டு செல்லும்.

¨           ஓரளவு கட்டுக்குள் இருக்கும் நுரையீரல் அடைப்பு நோய், சில நேரங்களில், திடீரென அதிக அளவு மூச்சுத் திணறலை உண்டாக்கும். இதை “தீவிர நோய் தாக்குதல்’’ (Acute exacerebation) என்று குறிப்பிடுவர். இது பெரும்பாலும், நோய்த்தொற்று, காற்று மாசடைந்த இடத்திற்கு திடீரெனச் செல்வதால் ஏற்படுகிறது.

நோய் அறிதல்: (ஆய்வுகள்)

¨           ஊடு கதிர் நிழற்படம் (X-Ray): நுரையீரல் அடைப்பு நோய், நுரையீரலில் உண்டாக்கிய பாதிப்பை இதன் மூலம் அறிய முடியும்.

¨           நுரையீரல் செயல்பாட்டுச் சோதனைகள் (Lung Function Tests): நுரையீரலின் செயல்பாடுகள் இச்சோதனைகளால் அறிய முடியும்.

¨           நுரையீரலின் காற்றுக் கொள்ளளவு, நுரையீரலில் நிகழும் வாயு பறிமாற்றம் முதலியவற்றை இச்சோதனைகள் தெளிவாகக் காட்டும்.

¨           இச்சோதனைகள் சாதாரண நுரையீரல் அடைப்பா அல்லது அடைப்புடன் கூடிய இடைத் திசு காற்றுப் பரவல் (Emphysema) நோயா என்பதையும் இச்சோதனைகள் தெளிவுபடுத்தும்.

¨           கணினி அச்சு வரைவு: (CT-Computerised Tomography) மூலம் நுரையீரல் திசு அழிவினை துல்லியமாக அறிய முடியும்.

¨           காந்த அதிர்வு அலை வரவு: (Magnetic Resonance Imaging - MRI) இச்சோதனை மூலமும் நுரையீரல் திசுக்கள் எவ்வளவு அழிந்துள்ளன என்பதைத் துல்லியமாக அறிய முடியும்.

மருத்துவம்:

முதலில் நோய்க் காரணிகளை அறிய வேண்டும். சோதனைகள் மூலம், நோய்க் காரணம், நோய் பாதிப்பின் அளவு ஆகியவை மருத்துவர்கள் முதலில் முடிவு செய்வர். குறைந்தது மூன்று மாதங்களுக்குச் சளியுடன் கூடிய இருமல் ஏற்பட்டுப் பின்னர், அடுத்த வருடமே, மீண்டும்  அவ்வாறு ஏற்பட்டால், அவருக்கு நாள்பட்ட மூச்சுக் குழலழற்சி இருப்பதாக மருத்துவர்களால் எண்ணப்படுகிறது. அதனால் இதற்கான காரணங்களை முதலில் நீக்க வேண்டும். புகைப்பிடித்தலை அறவே நீக்க வேண்டும். வேறு ஒவ்வாமைக் காரணிகளையும் தவிர்க்க வேண்டும். தூசு, சுற்று சூழல் காற்று மாசு ஆகிய பகுதிகளில் இயங்கும்பொழுது முகக்கவசம் போன்ற பாதுகாப்புச் சாதனங்களைப் பயன்படுத்த வேண்டும். நோய்த் தொற்று ஏற்படாமல் பாதுகாப்புடன் இருக்க வேண்டும். நோய்த் தொற்றின் அறிகுறிகள் தெரியும் ஆரம்ப நிலையிலேயே அதை மருத்துவரிடம் காண்பித்து, தகுந்த ஆய்வுகள் மேற்கொண்டு மருத்துவம் செய்துகொள்ள வேண்டும். இது நுரையீரல் திசுக்கள் அழிவைப் பெருமளவு தவிர்க்கும். சில வகை வைரஸ், நுண் கிருமிகள் நோய்த் தொற்றைத் தவிர்க்க தடுப்பூசிகள் உள்ளன. அவற்றைப் பயன்படுத்துவதால் நோய் வருமுன் காத்துக் கொள்ளலாம். மனநல மருத்துவ அறிவுறுத்தல்கள், யோகா, மூச்சுக் குழல் தளர்த்திகள் (Bronchodialators), அறிகுறிகளை அகற்றும் மருந்துகள் (Symptomatic Drugs), நோயின் தீவிரத் தன்மைகளைக் குறைக்கும். இந்நோயை முழுமையாகக் குணமாக்க முடியாவிடினும், நோயாளியை ஓரளவு, தொல்லைகள் இன்றி வசதியாக வைத்துக் கொள்ளலாம். நீண்ட கால உயிர் மூச்சு மருத்துவம் (Oxygen Therapy), செயற்கை மூச்சுக் கருவிகள் (Ventilators) பயன்பாடு இவை நோயாளியின் வாழ்வை நீட்டிக்கும். எக்மோ (Extra Corporal Membrane Oxygenation - ECMO) கருவியின் மூலமும் மூச்சு நிற்காமல் தடுக்க முயல்வர். அதே சமயம் நுரையீரலைச் சீராக்கவும் முயல்வர். சிலருக்கு மாற்று நுரையீரலையும் பொறுத்தும் மருத்துவமும் செய்யப்பட்டு நலமடையும் நிலையும் ஏற்படும். நுரையீரல் இயங்காவிடில் மரணம் உறுதி என்கிற நிலையை மாற்றி, நுரையீரல் நின்றாலும் மனிதனை வாழவைக்கும் நிலையை மருத்துவம் செய்கின்றது. விதி முடிந்தவனையும், வேளைவந்தால் போக வேண்டும் என்பவனையும் மருத்துவம் காப்பாற்றுகிறது என்றால் மிகையல்ல!

(தொடரும்)

- உண்மை இதழ், 1- 15 .12 .20

விதி நம்பிக்கையை விலக்கிய அதி நவீன மருத்துவங்கள்! (18) நாள்பட்ட நுரையீரல் அடைப்பு நோய் (Chronic Obstructive Pulmonary Disease)

மருத்துவம் : 

மரு.இரா.கவுதமன்

நுரையீரலில் ஏற்படும் நாள்பட்ட நோய்களால், நுரையீரலில் உள்ள திசுக்கள் சேதமடையும். அதனால் நுரையீரல் முழு அளவு காற்று மாற்றம் செய்ய இயலாத நிலை ஏற்படும். இதையே “நாள்பட்ட நுரையீரல் அடைப்பு நோய்’’ (Chronic Obstructive Pulmonary Disease) என்கிறோம்.

ஒரு முறை இந்நோய் வந்து, நுரையீரல் திசுக்கள் அழிந்துவிட்டால், அத்திசுக்கள் மீண்டும் இயல்பு நிலைக்குத் திரும்பாது. மருந்துகளால் நோயின் அறிகுறிகளை மட்டுமே குறைக்க முடியுமே ஒழிய, நோயை முழுமையாகக் குணமாக்க முடியாது. சில நோயாளிகள் இந்நோயோடு, பல ஆண்டுகள் வாழ்கிறார்கள். சிலரோ வாழ்நாள் முழுதும் இந்நோயோடு, போராடிய வண்ணம் உயிர் இருக்கும் வரையில் வாழ்ந்தும் வருகிறார்கள். இன்றைய நிலையில் ஏறத்தாழ 1 கோடிப் பேர் இந்தியாவில் இந்நோயினால் பாதிக்கப்பட்டுள்ளனர். சரியான மருத்துவத்தின் மூலம் இந்நோயின் அறிகுறிகளைக் குறைத்து, ஓரளவு தொல்லைகளோடு வாழ முடியும்.

நோய் காரணிகள்:

நாள்பட்ட எல்லா வகை நுரையீரல் நோய்களும், நுரையீரல் அடைப்பு நோயில் வந்து நிற்கும். “மூச்சுக் குழல் அழற்சி’’, “நுரையீரலில் நீர் கோப்பு’’ (Pulmonary Oedema),  “இடைத் திசுக்களில் காற்று பரவும் நோய்’’ (Emphysema) போன்ற நோய்களால், நுரையீரல் அடைப்பு நோய் ஏற்படும்.

நாள்பட்ட மூச்சுக்குழல் அழற்சி: (Chronic Bronchitis)

புகைப் பிடித்தல், ஒவ்வாமையை உண்டாக்கும் பொருள்கள், தூசு, காற்று மாசு, மூச்சுக் குழல் நோய்த் தொற்று போன்றவை மூச்சுக்குழல் அழற்சியை உண்டாக்கும். மூச்சுக்குழல் வீங்கி, இயல்பான நிலையில் உள்ள திறப்பு, சுருங்கிவிடும். அதனால் காற்று அதன் வழியே நுரையீரலை அடைவதில் குறைபாடு ஏற்படும். இது குறுகிய, அதிவேகமான மூச்சு விடும் சூழலை உண்டாக்கும்.

நுரையீரல் நீர்கோப்பு:

சிறுநீரகக் கோளாறு, இதயக் கோளாறு போன்ற நோய்கள் தீவிரமடைவதால், அதன் பின் விளைவாக நுரையீரலில் நீர் கோத்துக் கொள்ளும். அதனால் நுரையீரல் செயல்பாடு பாதிப்படையும். இதன் காரணமாக மூச்சுத் திணறல், மூச்சிரைப்பு போன்றவை உண்டாகும்.

ஒவ்வாமை (Allergy),

தூசு, காற்று மாசு, வேதியியல் காற்று (Chemical Feemes) போன்றவையும் நாள்பட்ட நுரையீரல் அடைப்பை ஏற்படுத்தும். ஒவ்வாமை உண்டாக்கும் மகரந்தத் துகள்கள், நறுமணப் பொருள்கள் நீண்ட நாள்கள் மூச்சுக் காற்றின் மூலம், மூச்சுக் குழல் வழியே செல்லும்பொழுது, அதன் விளைவாக “மூச்சுக் குழல் இறுக்கம்’’ (Bronchospasam) ஏற்பட்டு, மூச்சு விடுவதில் தொல்லை ஏற்படும்.

டெல்லி போன்ற காற்று மாசு அதிகம் பாதிப்புள்ள நகரங்களிலேயே தொடர்ந்து தங்கி, வாழ வேண்டியவர்களுக்கு, நாளடைவில் இந்நோய் வர வாய்ப்பு ஏற்படும். சிலர் நீண்ட காலம் வேதியியல் தொழிற்சாலைகளில் (Chemical Factories) பணியாற்றும் சூழ்நிலை ஏற்படும். அதேபோல் சிலர் சிமெண்ட் தொழிற்சாலைகளிலும், சிமெண்ட் - அட்டை (Cement & Asbestose) தொழிற்சாலைகளிலும் பணியாற்றுவர். அவர்களுக்கு சிமெண்ட் துகள்கள், நுரையீரலில் ஒட்டிக்கொண்டு, அதன் செயல்பாட்டை குறைக்கும். வண்ணக் கலவை தொழிலாளர்களுக்கும் (Painters) நுரையீரல் பாதிப்பு ஏற்படும்.

நுரையீரல் இடைத்திசுக் காற்று பரவல் (Emphysema):

இது ஒரு நீண்டகால நுரையீரலில் வளர்ச்சியடைந்த நோய். இந்த நிலையில் நுரையீரல் திசுக்கள் அழிக்கப்பட்டிருக்கும். நுரையீரலில் உள்ள மெல்லிய காற்றறைகள் (alveolus) இந்நோயால் சிதைவடைவதால், காற்றறைகளில் உள்ள காற்று, காற்றறைகளின் இடைத்திசுக்களுக்குள் பரவும்.

இதனால் இயல்பாக காற்றறைகளில் ஏற்படும், காற்றுப் பரிமாற்றம் (Gaseous exchange) நிகழும். நுரையீரலுக்கு வரும் காற்று காற்றறைகளை விட்டு வெளியேறி, அதற்கு இடைப்பட்ட திசுக்களில் தேங்கும். இதனால் நுரையீரலின் சுருங்கி (காற்று வெளியேறும்பொழுது), விரியும் (காற்று உள்ளிழுக்கும்போது) தன்மை பாதிக்கப்படும். இதன் விளைவாக மார்பில் இறுக்கம், மூச்சுத் திணறல், மூச்சிரைப்பு, மூச்சடைப்பு போன்றவை ஏற்பட்டு, நுரையீரல் செயல்பாடு முடங்கி விடும் நிலை ஏற்படும்.

நோய் கூற்றியியல்:

நுரையீரல் நோய்கள் நீண்ட நாள்கள் இருக்கும்பொழுது, நுரையீரல் அடைப்பு நோயாக மாறும். முற்றிய, நாள்பட்ட நுரையீரல் அடைப்பு நோயுள்ளவர்களின் நுரையீரல் செயல்பாடு பாதிப்பினால், மூச்சுக் காற்று (ஆக்சிஜன்) இரத்தத்தில் கலப்பது குறைந்து, கரியமில வாயு (கார்பன்_டை_ஆக்ஸைடு)  நுரையீரல் மூலம் வெளியேற முடியாமல், இரத்தத்தில் தேங்கும். சில காலம் கழித்து, திசுக்களுக்கு உயிர் மூச்சுக் காற்று (ஆக்சிஜன்) குறைந்து, திசுக்கள் சோர்வடையும்.

மூளை உறுப்புகளும் முழுமையாகக் களைப்படையும். இதன் விளைவாக, இரத்தத்தில் ஏற்படும் காற்று சமமின்மையால் ‘உணர்விழப்பு’, ‘ஆழ்மயக்கம்’ (Coma) போன்ற நிலைகளுக்கு நோயாளி சென்றுவிடுவார். ‘மூளைச்சாவு’ (Brain Death) அடைந்துவிட்டால், நோயாளி மரணமடைந்து விடுவார்.

- உண்மை இதழ், நவம்பர் 16 -30 .20