விதி நம்பிக்கையை விலக்கிய அதி நவீன மருத்துவங்கள்! (11)இதயத்தமனி (அடைப்பு) நோய்

மருத்துவம் : 

மரு.இரா.கவுதமன்

இதயத்தமனி (அடைப்பு) நோய் coronary artery disease)

மாரடைப்பு (Heart Attack)

நாம் ஏற்கெனவே குறிப்பிட்டபடி, கருவுற்ற எட்டாவது வாரத்தில் இதயம் இரண்டு குழாய்களாக அமைந்து, பிறகு நான்கு அறை கொண்ட இதயமாக மாறுகிறது. அப்பொழுதே துடிக்க துவங்கும் இதயம், நம் மரணம் வரை இடைவிடாது துடித்துக் கொண்டே இருக்கிறது.

இதயம்தான் கருவில் உருவாகும் முதல் உறுப்பு. ஆரம்பத்தில் நிமிடத்திற்கு 120 முதல் 160 வரை இதயம் துடிக்கும், பேறு காலத்தில் துடிப்பு நிமிடத்திற்கு 130 ஆக இருக்கும்.

பின் குழந்தை வளர, வளர நிமிடத்திற்கு 72 முறை துடிப்பாக மாறி நிலை கொள்ளும். இயல்பான நிலையில் நிமிடத்திற்கு 72 முறை,  X ஒரு மணிக்கு 72 X 60 முறை, ஒரு நாளைக்கு 72 X 60 X 24 என்று நாம் வாழும் காலம் முழுதும் இதயம் இயங்கிக் கொண்டே இருக்கும்.

சுருங்கி, விரியும் தன்மையையே நாம் இதயத் துடிப்பாக உணர்கிறோம். அவ்வாறு இடைவிடாமல் இதயம் இயங்க வேண்டுமானால் அதற்கு தேவையான சக்தி இடைவிடாமல் கிடைத்துக் கொண்டே இருக்க வேண்டும். அந்த சக்தி இடைவிடாமல் கிடைக்க வேண்டுமானால் இதயத்திற்கு இரத்த ஓட்டம் தடையின்றி கிடைத்துக் கொண்டே இருக்க வேண்டும். தங்குத் தடையின்றி (ஒரு நிமிடம் கூட நில்லாமல்) கிடைக்கும் இரத்தம் மூலமே இதய இதயத்திற்கு தேவையான உயிர்க்காற்றும் (ஆக்ஸிஜன்), சத்தும் கிடைக்கிறது. அப்படி நில்லாமல் கிடைக்கும் இரத்த ஓட்டம் இதயத் தமனி (coronary Artery) மூலமே, இதயத்திற்கு கிடைக்கிறது.

இதயத் தமனிகள் (Coronary Arteries):

மகாதமனி (Aorta) (இடது வெண்டிரிக்கள், left ventricle) இடது கீழறையிலிருந்து வெளியேறும் இடத்தில், இதயத் தமனி பிரிகிறது. பிரிகின்ற இதயத் தமனிதான் முழு இதயத்திற்கும் தேவையான இரத்த ஓட்டத்தை கொடுக்கிறது.

மகாதமனியிலிருந்து பிரியும் இதயத்தமனி மேலும் இரண்டு பெரிய பிரிவுகளாக பிரிகிறது. இடது பெரும் இதயத் தமனி (left main coronary artery (also called left main track) வயது பெரும் இதயத் தமனி (right coronary artery - RCA) என்று இரு பிரிவுகளாக பிரிந்து இதயத்தின் இடது, வலது புறங்களுக்கு இரத்த ஓட்டத்தை ஏற்படுத்துகிறது. இடது பெரும் இதயத்தமனி மேலும் இரண்டாக பிரிகிறது. இதயச் சுற்றுத் தமனி (circumflex artery) இடது முன் கீழிறக்கத் தமனி (left anterior descending artery - LAD) என்று இரண்டாகப் பிரிகிறது.

சுற்றுத் தமனி, இடது மேலறை, இடது கீழறையின் (Left Ventricle) பக்கவாட்டிற்கும், பின் பகுதிக்கும் இரத்தம் கொண்டு செல்கிறது. முன் கீழறக்கத் தமனி, இடது கீழறையின் முன்புறம், கீழ்புறம், கீழறைகளின் இடைச்சுவர் ஆகிய பகுதிகளுக்கு இரத்தத்தை கொண்டு செல்கிறது. வலது பெரும் இதயத் தமனி (Right Coronary Artery - RCA) வலது ஓரத் தமனி  (Right Marginal Artery), பின் கீழறக்கத் தமனி (Posterior Descending Artery) என்று இரண்டு பிரிவாக பிரிந்து வலது மேலறை, வலது கீழறை, கீழறைகளின் அடிப்பகுதி, இடைச்சுவர்களின் (Septcem) பின்புறம் ஆகிய பகுதிகளுக்கு இரத்தத்தை செலுத்துகிறது. இந்த பிரிகின்ற தமனிகள் எல்லாம் ஒரு வலைப்பின்னல் போல் அமைந்து, இதயத்தின் அனைத்துப் பகுதிகளுக்கும் இரத்த ஓட்டத்தை, இடைவிடாமல் கிடைக்கச் செய்கின்றன.

துணைத் தமனிகள் (Collateral Vessels):

இவை இதயத்தில் அமைந்துள்ள சிறிய தந்துகிகள் (tiny blood vessels - capillaries) ஆகும். இதயம் இயல்பாக செயல்படும் பொழுது, இவை மூடி இருக்கும். இதயத்தமனி சுருக்க நோயில், இவை விரிந்து, இதயத்திற்கு தேவையான இரத்தத்தை செலுத்தத் துவங்கும். அதனால் இதய இயக்கத்திற்கு தேவையான இரத்தம் கிடைக்கும். இதனால் மாரடைப்பு தவிர்க்கப்படும். இனி இதயத் தமனி நோய்களை பார்ப்போம்.

இதயத் தமனி இரத்த ஓட்டக் குறைபாடு (Ischemia) : இதயத் தமனி வழியே இதயத்திற்கு தேவையான இரத்தம் குறைவின்றி தொடர்ந்து சென்று கொண்டே இருக்க வேண்டும். ஏதேனும் காரணமாக இரத்த ஓட்டம் குறைந்தால், இதயத்திற்கு தேவையான உயிர் காற்றும் (Oxygen) சத்தும் கிடைக்காமல் போகும். அதனால் இதயம் நின்று விடும் நிலை ஏற்படும். இதையே “மாரடைப்பு’’ (Heart Attack) என்று கூறுகிறோம். மிகவும் ஆபத்தமான நிலை இது. உடனடியாக மருத்துவம் செய்யாவிடில் மரணம் நிகழக் கூடிய நிலை ஏற்படும். இனி இது எப்படி நிகழுகிறது எனப் பார்ப்போம்.

மாரடைப்பு (Heart Attack): மிகவும் ஆபத்தான இந்நோய் எதிர்பாராமல் ஏற்படும். இதயத்திற்கு செல்கின்ற இரத்த ஓட்டம் திடீரென தடைபடுவதால் இதயம் துடிக்காமல் நின்று விடும். இதயம் செயல்படுவது நின்று போவதால் மூளை போன்ற முக்கிய உறுப்புகளுக்கும் இரத்தம் செலுத்த முடியாத நிலை ஏற்படும். அதனால் உடல் உறுப்புகள் அனைத்தும் செயல்படாமல் நின்று விடும். நோயாளி மரணமடைந்து விடுவார்.

“சற்று முன் கூட பேசிக் கொண்டிருந்தாரே, திடீரென்று சாய்ந்து விட்டார், இறந்து விட்டார்’’ என்றெல்லாம் பல முறை நாம் கேட்டுள்ளோம். இதுபோன்ற நிகழ்வுகளுக்கு பெரும்பாலும் காரணமாக இருப்பது இந்நோயேயாகும். மிகவும் அதிகளவில் மரணம் நிகழ்த்த கூடிய நோய் இது. ஆனால் இந்நோயை கண்டறிவதும், மருத்துவம் செய்வதும் முழுமையாக இந்நோயிலிருந்து நோயாளிகளை மீட்டு, நீண்ட வாழ்வு வாழ வகை செய்யலாம் இந்தியாவில் இந்நோயினால் வருடத்திற்கு ஒரு கோடி மக்கள் பாதிக்கப்படுகிறார்கள். இந்நோய்க்கான காரணங்களை பார்ப்போம்.

“நிலையான மார்பு வலி’’, “நிலையற்ற மார்பு வலி’’ மற்றும் மாரடைப்பு ஏற்பட வாய்ப்புள்ள நோயாளிகள் மிகவும் எச்சரிக்கையாக இருக்க வேண்டும். அவர்கள் சட்டைப் பையில் கீழ்கண்ட 3 மாத்திரைகளை வைத்திருக்க வேண்டும். அவர்கள் புழங்குமிடங்களில் (படுக்கையறை, உணவு உண்ணும் அறை போன்ற இடங்களில்) கைக்கு உடனே எடுக்கும்படியாகவும் இம்மாத்திரைகளை வைத்திருத்தல் நலம் பயக்கும். லேசானா நெஞ்சு வலி ஏற்பட்டாலும் உடனடியாக செய்கின்ற வேலையை, நிறுத்திவிட்டு (நடைப்பயிற்சி செய்து கொண்டிருந்தாலும்) உடனடியாக அருகில் ஓர் இடத்தில் அமைதியாக அமர வேண்டும். படுக்கை இருந்தால் படுத்துக் கொள்ள வேண்டும் உடனடியாக மாத்திரைகளை சாப்பிட வேண்டும். மருத்துவமனைக்கு செல்ல, அனைத்து முயற்சிகளையும் கைக்கொள்ள வேண்டும். தனியாக இருக்கும்பொழுது மார்பு வலி வந்தால், ஆழ்ந்து மூச்சித்திழுத்து, இரும வேண்டும். நெஞ்சுப் பகுதியை கைகளால் பிசைந்து கொடுக்க வேண்டும். மாத்திரைகளையும் உடனடியாக சாப்பிட வேண்டும்.

மார்பு வலியேற்படும் பொழுது உண்ண வேண்டிய மாத்திரைகள்:

ஆஸ்பிரின் 75 mg. (Aspirin 75 mg)

(இம்மருந்து இரத்தம் உறைதலை தடுக்கும்)

எனலார்பில் (Enalarpil - Vaootec)

(இம்மருந்து இரத்தக் குழாய்களை விரித்து கொடுக்கும். அதனால் இரத்த ஓட்டம் அதிக அளவு இதயத்திற்கு செல்லும்.)

அய்சாட்ரில் 5 (Isodril 5)

(இம்மருந்தை நாக்கின் கீழ் வைத்துக் கொள்ள வேண்டும். இதயத் தமனிகளை விரித்து அதிகளவு இரத்தம் இதயத்திற்கு செல்ல வழிவகுக்கும், மருந்து இது.)

 (தொடரும்...)

- உண்மை இதழ், ஜூன் 16 - ஜூலை 15.20

விதி நம்பிக்கையை விலக்கிய அதி நவீன மருத்துவங்கள்! (10)

மருத்துவம் : 

இதய நோயும் மருத்துவமும்

மரு.இரா.கவுதமன்

ஆபத்தான நிலை: இயங்கிக் கொண்டே இருக்கும் இதயத்தில் திடீரென மின்னோட்டம் நின்று விடக்கூடும். இதை “இதயத்துடிப்பு முடக்கம்” (Sudden Cardiac Arrest) என்று கூறுவர். திடீரென ஏற்படும் இந்த நிலையில் இதயம் முழுமையாக நின்றுவிடும். இதனால் இரத்த ஓட்டமும் நின்று, மரணம் நிகழும். தொடர்ச்சியாக 10 நிமிடங்களுக்கு மேல் மூளைக்கு இரத்தம் செய்யாவிட்டால் மூளை செயலிழந்து விடும். (Brain Death). இதயத் துடிப்பு முடக்கம் மிகவும் ஆபத்தானது. எந்த அறிகுறியும் உண்டாகாமல், பாதிக்கப்பட்டவர் திடீரென மயங்கி தரையில் சாய்ந்து, மயக்கம் அடையலாம்.  அது போன்ற நிலையில் யாரையேனும் காண நேரிட்டால், முதலில் நாடித்துடிப்பு இருக்கிறதா என்று பார்க்க வேண்டும். இதயத்திலிருந்து இரத்தம் செல்லுவது நின்று விட்டால் நாடித்துடிப்பு இருக்காது. இரண்டு உள்ளங்கைகளையும், பாதிக்கப்பட்டவரின் இடது மார்பில் வேகமாக அழுத்தவும். இரண்டுமுறை அழுத்தியதும், வாயோடு வாய் வைத்து செயற்கை மூச்சை செலுத்த வேண்டும். பின் மீண்டும் மார்பை அழுத்த வேண்டும். மருத்துவ உதவி வரும் வரை தொடர்ச்சியாக இதை செய்ய வேண்டும். (Cardio-Pulmonary Resuscitation)  சில நேரங்களில், இந்த மருத்துவ முறையிலேயே, மருத்துவ உதவி வருவதற்குள்ளேயே நோயாளியின் இதயம் மீண்டும் செயல்படத் துவங்கவும் கூடும். இம் முதலுதவி பல பேர் உயிரைக் காப்பாற்றியுள்ளது. தொடர்ந்து தரப்படும். மருத்துவம் மூலம் அவர் முழுமையாக குணமடையும் வாய்ப்பு ஏற்படும். (விதிமுடிந்து இதயம் நின்று போய், ஏறத்தாழ மரணம் அடைந்தவரை, முதலுதவியும், மருத்துவமும் எப்படி காப்பாற்றுகிறது!)

பிற மருத்துவ முறைகள்: இதய மேலறை உதறல் துடிப்பு (Atrial Fibrilation) சிலருக்கு இருக்கும். பெரும்பாலும் மருந்துகள் மூலமே இதை சரியாக்க முடியும். இதைப் போன்றே “கீழறைகள் மிகு இதயத் துடிப்பு” (Ventricular Tachyeardia)  சிலருக்கு ஏற்படலாம். இது மிகவும் ஆபத்தானது. இதனால் இதயத்தில் “குறு நடுக்கம்” (Fibrillation) ஏற்பட்டு, இதயம் நின்று விடலாம். இதை “குறு நடுக்க தடுப்பு” (Defibrillation) முறை மூலம் சரி செய்ய முடியும். சிலருக்கு அடிக்கடி இந்நோய் வரலாம். அவர்களுக்கு உடலிலேயே இக்கருவியை பொருத்திவிடுவதன் மூலம், இதயத்துடிப்பில் மாறுபாடு உண்டாகும் பொழுது தானாகவே செயல்பட்டு இதயத் துடிப்பை சீராக்கி விடும். இதே போன்று “இதயத் துடிப்பு சீர்மைக் கருவி” (Pace Maker) ஓர் அரிய கண்டுபிடிப்பு. இதயத் துடிப்புக் கோளாறுக்கான அடிப்படைக் காரணிகளை முதலில் கண்டறித்து அதை சீராக்குவர். இதில் நோயை சரியாக்க முடியாவிட்டால், நிரந்தரத் தீர்வாக இக்கருவியை பயன்படுத்துவர். இக்கருவி “மின்கலங்களால்” (Battery) இயக்கப்படுகிறது. இக்கருவியை தேவைக்கேற்ப தற்காலிகமாகவோ, நிரந்தரமாகவோ உடலில் பொருத்திவிடுவர். தற்காலிக கருவி உடலின் வெளிப்புறம் அமைந்திருக்கும். அதிலிருந்து, மின் இணைப்பு இதயத்திற்கு கழுத்துச் சிரை மூலமோ, தொடைச் சிரை வழியோ செலுத்துவர். கருவியிலிருந்து புறப்படும் மின் தூண்டல் இதயத் துடிப்பைச் சீராக்கும். நிரந்தர சீர்மைக் கருவியை காரை எலும்பிற்கு (Clavicle) கீழ் உடலில் நிரந்தரமாக பொருத்திவிடுவர். ஒரு சிறிய அறுவை மருத்துவம் மூலம், தோலுக்கு அடியில் இக்கருவி பொருத்தப்படும். இதிலிருந்து, கழுத்துச் சிரை வழியே இதயத்திற்கு தொடர்பு உண்டாக்குவர். இக்கருவி ஒரு கடிகாரம் போல் இயங்கும். எத்தனை முறை இதயத்தை துடிக்க வைக்க வேண்டும் என்று இதில் முறைப் படுத்தப்பட்டிருக்கும். இதனால் இதயத்துடிப்பு மாறுபாட்டால், உடன் இக்கருவி இயங்கி, இதயத் துடிப்பைச் சீராக்கும். மின் தூண்டல் தொடர்ச்சியாக இக்கருவி செய்வதால், இதயம் சீராக இயங்கும், தேவைக்கேற்ப மின் தூண்டலை வெளியிலிருந்தே மாற்றியமைக்கலாம். ஒரு முறை பொருத்தப்படும் இக்கருவி குறைந்தது 10 ஆண்டுகள் நல்ல நிலையில் இயங்கும். இப்பொழுது கம்பியற்ற சீர்மைக் கருவிகள் வந்துவிட்டது. அறுவை மருத்துவமின்றியே இதை பொருத்த முடியும்.

இதயத் துடிப்பு கோளாறுகளை மருத்துவம் மூலம் முழுமையாகக் கட்டுப் படுத்தலாம். ஆரம்ப நிலையில் எளிதாகக் கட்டுப்படுத்தலாம். நோய் முற்றிய பின்பும் இந்நோயை குணப்படுத்தாவிடில், மெதுவாக “இதயச் செயலிழப்பு” (Heart Failure) “இதயத் துடிப்பு முடக்கம்” (Cardiac Arrest) போன்ற நிலைகள் ஏற்படலாம்.

(தொடரும்...)

 

பதற்றம்: நான் ஒரு நிமிடம் பதறி விட்டேன் என நாமும் பலமுறை கூறியுள்ளோம். பலர் கூறவும் கேட்டுள்ளோம். பதற்றம் என்றால் என்ன? ஏன் ஏற்படுகிறது? காண்போமா? தேர்வு எழுதும் முன்போ, நேர்முகத் தேர்வுக்கோ, வேறு ஏதாவது காரணங்களால் பய உணர்வு தோன்றும் போதோ பதற்றம் ஏற்படுவதை நாம் அறிவோம். இது ஏன் நிகழ்கிறது என எப்போதாவது நாம் சிந்தித்திருக்கிறோமா? நம் உடல் ஒரு முக்கிய நிகழ்வை எதிர்நோக்க நம்மை ஆயத்தப்படுத்துகிறது. இத்தனை நடுக்கத்தோடு ஒரு வேளையை தொடங்கும் பொழுது, ஏற்படும் பதற்றம், வேலையில் மூழ்கியதும் கொஞ்சம், கொஞ்சமாகக் குறைந்து, நாம் இயல்பு நிலைக்கு திரும்புவோம். இந்த பதற்றம் நம்மை எச்சரிக்கை செய்து, மேலும் சிறப்பாக பணியாற்றச் செய்கிறது. ஆனால் சிலரோ, தங்கள் கவலைகளை கட்டுப்படுத்த முடியாமல் ஒரே பதற்றமான நிலையில் இருப்பதை நாம் அறிவோம். அவர்களால் தினசரி பணிகளைக் கூட சரியாக செய்ய முடியாமல் இருப்பதையும் நாம் அறியலாம். இது “பதற்றக் குறைபாடு” என்ற நோயாக இருக்கலாம். நாம் அனைவரும் ஏதோ ஒரு வகையில் பதற்றத்திற்கு ஆளாவதுண்டு. ஆனால் எதற்கெடுத்தாலும் பதற்றபடுவதும், பதற்றத்தோடு காலம் கழிப்பதும் ஆன நிலையில் உள்ளவர்கள் மனநல நிபுணரிடம் ஆலோசனை பெறுவது நல்லது.

பதற்றக் குறைப்பாட்டின் பொதுவான அறிகுறிகள்: வேகமான இதயத் துடிப்பு, மூச்சிறைத்தல், தசைகள் இறுக்கமாதல், மார்பு இறுகுதல், காரணம் சொல்ல முடியாத கவலைகளும், சமநிலையற்ற உணர்வும் தொடர்ந்து வருதல் தேவையற்ற செயல்களை எண்ணி, எண்ணி கவலைபடுதல் போன்றவை ஏற்படலாம்.

மருத்துவம்: பதற்ற குறைபாடு அறிகுறிகள் யாருக்காவது தொடர்ச்சியாக இருப்பது அறிந்தால் மன நல மருத்துவரிடம் ஆலோசனை பெறுதல் நல்ல பலனைத் தரும். யோகாவும் சிறந்த முறையில் பயனளிக்கும்.

பதற்றக் குறைபாட்டின் காரணிகள்: குடும்ப வரலாறு, பணியிட அழுத்தம், அன்பிற்குரியவரின் திடீர் மரணம், தைராய்டு, ஆஸ்துமா, நீரிழிவு நோய், இதய நோய்கள் போன்றவற்றால் கூட பதற்றக் குறைபாடு ஏற்படலாம். போதை பொருள்கள், மது போன்றவையும், சமூக பயம் ஆகியவையும் பதற்றக் குறைபாட்டை உண்டாக்கலாம்.             

சென்ற (ஏப்ரல் 16 - மே 15) 2020 இதழில் 35ஆம் பக்க மருத்துவரின் நேர்காணலில் எம்.பி.பி.எஸ் எனத் தவறுதலாக வெளியிடப்பட்டது. அதனை எம்.டி.எஸ் என மாற்றிப் படிக்குமாறு கேட்டுக் கொள்கிறோம்.

விதி நம்பிக்கையை விலக்கிய அதி நவீன மருத்துவங்கள்!

மருத்துவம் : 

 மரு.இரா. கவுதமன்

இதயத் துடிப்பு சீரின்மை (Arrhythmia) நோய்கள்:

இதயம் தன்னிச்சையாக செயல்படக் கூடியது. கண், கை, கால்கள் போல் இதயத்தை நமது விருப்பத்திற்கு இயக்க முடியாது. இதயத்தின் இயக்கத்தை கட்டுப்படுத்த தனிப்பட்ட நரம்பு மண்டலம் உள்ளது. இதற்கு “தன்னியக்க நரம்பு மண்டலம்’’ (Autonomous Nervous System) என்று பெயர். இந்நரம்பு மண்டலம் தவிர “உயிரி சுரப்பு நீர்’’களும் (Cardiac Enzymes) இதயத்தின் செயல்பாட்டை கட்டுப்படுத்துகின்றன. இதயத்தை கட்டுப்படுத்தும் நரம்புகளில் இரண்டு பிரிவுகள் உள்ளன. ஒரு பிரிவு (Sympathetic Nervous System)  இதயத் துடிப்பை அதிகமாக்கும். மற்றொரு பிரிவு இதயத் துடிப்பை குறைக்கும் ( Para Sympathetic Nervous System). “அட்ரினல்’’ (Adrenaline) சுரப்பும், தைராக்சின் சுரப்பும், இதயத் துடிப்பை அதிகமாக்கும். சிரைகளின் வழியே இதயத்திற்கு வரும் இரத்தம் அதிகமானாலும் இதயத் துடிப்பு அதிகமாகும்.

இதயத் துடிப்பு ஏற்படும் விதம்:

இதயத்திற்கு வரும் நரம்புகள் மூளையிலிருந்தும், தண்டு வடத்திலிருந்தும் (Spinal Cord) வருகின்றன. இவை இதயத்தின் முழு பகுதிகளிலும் பரவியுள்ளன. இவை இதயத்தின் வலது மேல் அறையில் உள்ள “மின் குமிழில்’’ (Sino Auricular Node) குவியும். இதிலிருந்து தொடர் மின்னோட்டம் ஏற்படும். இம்மின்னோட்டம் “மேலறை, கீழறை மின் குமிழு’’க்கு (Auriculo- Ventricular Node) பரவும். அங்கிருந்து பிரியும் நரம்பிழைகள் மூலம் வலது, இடது கீழறைகளுக்கு மின்னோட்டம் பரவும். இந்த மின்னோட்டமே இதயத் துடிப்பை உண்டாக்குகிறது. இதயச் சதைகள் சுருங்கி விரியவும், அடைப்பிதழ்கள் மூடி, திறக்கவும் இம்மின்னோட்டமே காரணமாகிறது. மின்னோட்டம் சீராக செயல்பட்டால், மேலறைகள் சுருங்கி, ஈரிதழ், மூவிதழ் அடைப்பிதழ்கள் திறந்து, இரத்தம் கீழறைக்குச் செல்லும். அப்பொழுது கீழறைகள் விரியும். கீழறை மீண்டும் சுருங்கும்பொழுது அங்குள்ள இரத்தம் நுரையீரல் தமனி வழியேயும், பெருந்தமனி (Aorta) வழியேயும் வெளியேறும். மேலறைகளும், கீழறைகளும் இப்படி மாறி, மாறி சுருங்கி, விரிதலை இம்மின்னோட்டமே முழுமையாகக் கட்டுப்படுத்துகிறது. இயல்பான நிலையில் மேலறை மின் குழியில் (Sino-Auricular Node) 72 முறை மின்னோட்டம் ஏற்படும். இந்த சுருங்கி, விரியும் செயல்பாட்டில் ஏற்படும் அடைப்பிதழ்கள் திறந்து, மூடும் வேளையில் ஏற்படும் ஒலியையே நாம் “இதய ஒலி’’ (Heart Sound) என்கிறோம்.

நன்றாக வேலை செய்யும் ஒரு நிமிடத்திற்கு 72 முறை துடிக்கும். இதையே “சீரான இதயத் துடிப்பு’’ (Rhytham) என்கிறோம். இதயத் துடிப்பு உடற்பயிற்சியின்போதும், கருத்தறித்த பெண்களுக்கும், கோபம், பயம், அதிர்ச்சி போன்ற உணர்ச்சிகளுக்கு ஆளாகும்போதும், உடலின் வெப்பநிலை அதிகரிக்கும்போதும் அதிகரிக்கும். சற்று நேரத்தில் இயல்பான நிலைக்கு (72 முறை) திரும்பி விடும். தூங்கும்பொழுதும், நீண்ட நேரம் ஓய்வெடுக்கும்பொழுதும் இதயத் துடிப்பு குறையும். சில நேரங்களில் இதயத் துடிப்பு 90 முறைக்கும் அதிகமாக இருக்கும். இதை “மிகை இதயத் துடிப்பு’’ (Tachycardia) என்றும், 60ற்கும் கீழாக போனால் “குறை இதயத் துடிப்பு’’ (Bradycardia) என்றும் மருத்துவர்கள் சொல்வார்கள். இந்த மின்னோட்டத்தில் ஏதாவது குறைபாடு ஏற்பட்டால், “இதயத் துடிப்பு சீரின்மை’’ (Arrhythmias) நோய்கள் ஏற்படும்.

                இதயத் துடிப்பை பொதுவாக 4 வகையாகப் பிரிக்கலாம். சீரான இதயத் துடிப்பு (Normal Heart Beat Regular), சீரற்ற இதயத் துடிப்பு (Irregular Beat Regular), சீரான, சீரற்ற இதயத் துடிப்பு (Regularly Irregular Beat Regular), சீரற்ற, சீரற்ற இதயத் துடிப்பு (Irregularly, Irregular Beat Regular) என மருத்துவர்கள் வகைப்படுத்துவர். இதில் சீரான இதயத் துடிப்பை பற்றி ஏற்கெனவே பார்த்தோம். மற்ற மூன்ற வகை இதயத் துடிப்பையும் “இதயத் துடிப்பு சீரின்மை நோய்’’ (Cardiac Arrhythmia) என மருத்துவர்கள் வகைப்படுத்துவர். இந்த நிலை மிகவும் ஆபத்தானது. ஆனால், மருந்துகள் மூலம் பெரும்பாலும் குணப்படுத்தலாம். இதயத்தில் செயல்படுகிற மின்னோட்டத்தில் குறைபாடு உண்டானால் இந்த நிலை ஏற்படும். மின் குமிழ்களில் மின்னோட்டம் உற்பத்தியாவதிலும், சீராக கடத்தப்படாததாலும், மேலறை, கீழறைகளின் சுருங்கி விரியும் தன்மையில் ஒழுங்கற்ற நிலை ஏற்படும்.

காரணிகள்:

நீண்ட நாள் மிகு இரத்த அழுத்தம் (Hypertension), புகை பிடிப்பது, குடிப்பழக்கம், இதய இரத்தக் குழாய் நோய்கள், இதய அடைப்பிதழ் நோய்கள், இதயத் தசை நோய்கள் போன்ற காரணங்களால் இதயத் துடிப்பு சீரின்மை நோய்கள் ஏற்படலாம்.

அறிகுறிகள்:

படபடப்பு, நாடித்துடிப்பில் ஒழுங்கின்மை, தலைபாரம், தலைச்சுற்றல், தளர்ச்சி, களைப்பு, மூச்சு வாங்குதல், மயக்கம் வருவது போன்ற நிலை, மயக்கம் போன்றவை ஏற்படும். கைக்குழந்தைகள் உடல்நிறம் நீலநிறமாக (Blue Baby) மாறும்.

தொடர் நிகழ்வுகள்:

பலநேரங்களில் இந்நோயின் அறிகுறிகள் வெளியே தெரியாமலே இருக்கும். நோய்க்கான அறிகுறிகள் ஏதும் தெரியாமலேயே பலர் வாழ்ந்து வருகின்றனர். மேற்குறிப்பிட்ட நோய்க்கான காரணிகள் மூலம் பலருக்கு இந்நோய் வெளிப்படும். நீண்ட நாட்கள் இருந்துவரும் இந்நோய் சில நேரங்களில் ஆபத்தை உண்டாக்கக் கூடும். முறையான இதய இயக்கம் (துடிப்பு) இல்லாத போது இதயத் தசைகளே பாதிப்படையும். மூளை, நுரையீரல், கல்லீரல், சிறுநீரகம் போன்ற முக்கிய உறுப்புகளுக்கு போதுமான அளவு இரத்தம் செல்லாத நிலை ஏற்படும். இதனால் அந்த உறுப்புக்களும் பாதிப்படையும். இதனால் “பக்கவாதம்” (Hemiplegia) சிறுநீரக செயலிழப்பு, செரிமானக் கோளாறுகள், முகம், கணுக் கால்களில் வீக்கம், மூச்சு திணறல், சோர்வு, செயல் பாடின்மை போன்ற கோளாறுகள் ஏற்படும். இரத்த சோகை போன்ற குறைபாடுகளும் ஏற்பட்டு மேலும் உடல் நிலையை மோசமாக்கும்

நோயறிதல்:

இதயத் துடிப்பு சீரின்மையை மருத்துவர்கள் நாடித் துடிப்பை கவனித்தே அறிவர். இதய “மின்னலைப் பதிவு” (Electro -Cardio-gram- ECG) மூலம், இதயத்துடிப்பு சீரின்மையை எளிதில் அறியலாம். சில நேரங்களில் மருத்துவரிடம், நோயாளிகள் “நெஞ்சு படபடப்பு அதிகம்” என்ற குறையோடு வருவர். மருத்துவரிடம் ஆலோசனை பெறுவதற்குள் இதயத் துடிப்பு இயல்பான நிலைக்கு வந்து விடலாம். அது போன்ற நேரங்களில் இதய மின்னலை பதிவு சரியாக இருக்கும். அவ்வகை நோயாளிகளுக்கு, 24 மணி நேர மின்னலை பதிவின் மூலம் நோயறிய முடியும். இது தவிர, எதிரொலி மின்னலைப் பதிவு (Echo Cardiogram) மூலமும் கோளாறை கண்டு பிடிக்க முடியும். இதயத் தசைகளில் ஏற்படும் மாற்றத்தை துல்லியமாக இச்சோதனை மூலம் அறியலாம். துடிப்பு குறைபாட்டையும், காரணத்தையும் கண்டறிய மார்பு ஊடுகதிர் நிழற்படம் (X-Ray), ‘டிரெட்மில் சோதனை’  (TMT), “ஹோல்டர் மானிட்டர் பரிசோதனை” (Holter Monitor Test), சாய்வு மேசை சோதனை (Tilt Table Test) என பல சோதனைகளை இதய நோய் நிபுணர்கள் செய்வர். இதன் மூலம் மிகு துல்லியமாக நோய் ஏற்படும் பகுதியை கண்டுபிடித்து விடுவர். நோயின் காரணங்களையும், அதன் விளைவுகளின் அடிப்படையிலும் மருத்துவ முறைகள் முடிவு செய்யப்படும்.

மருத்துவம்:

பொதுவாக எந்த வகை துடிப்புக் கோளாறு உள்ளதோ, அதற்கு ஏற்ப மருத்துவமுறை மாறுபடும். அதனால் நோயின் தன்மையிருந்த மருத்துவம் மேற்கொள்ளப்படும். மருந்துகள், ஊசி, இதயமின் அதிர்ச்சி மருத்துவம், உயிர்க்காற்று (Oxygen), சிரை வழி நீர்மங்களையும், மருந்துகளையும் செலுத்துதல், வடிகுழாய் ஆய்வு (Angiogram), மின்னோட்ட தடையை உண்டாக்கும் தேவையற்ற வளர்ச்சியை வடிகுழாய் மருத்துவம் மூலம் (Cardiac Ablation) சீராக்குதல், (பேஸ் மேக்கர்) இதயத் துடிப்பை சீர்மைக் கருவி (Pace-Maker) பொருத்துதல் போன்ற பல வகை மருத்துவங்கள், நோயின் தன்மைக்கேற்ப செய்யப்படுகின்றன. இவ்வகை மருத்துவமுறைகள் மிகச் சிறந்த பலனை தருகின்றன. கோடிக்கணக்கான நோயாளிகள் இதனால் பயனடைந்து நீண்ட வாழ்வு வாழ்கின்றனர்.

(தொடரும்)

 - உண்மை இதழ், 1-15.4.20

விதி நம்பிக்கையை விலக்கிய அதி நவீன மருத்துவங்கள் (9)

மருத்துவம் : 

மரு.இரா.கவுதமன்

இதய நோய்கள்:

1.            பிறவிக் கோளாறு இதய நோய்கள் (Congenital Heart Diseases)

2.            அடைப்பிதழ்  (Valvular Diseases) நோய்கள்

3.            இதயத் துடிப்பு சீரின்மை  (Arhythemia) நோய்கள்

4.            இதயத் தமனி அடைப்பு நோய் (Coronary Heart Diseases)

5.            இதய செயலிழப்பு  (Heart Failure) நோய்

என்று இதய நோய்கள் வகைப்படுத்தப்படுகின்றன.

பிறவிக் கோளாறு இதய நோய்கள்:

சில குழந்தைகள் பிறக்கும்போதே, இதயத்தின் அமைப்பில் குறைபாடோடு பிறக்கும். குறைபாடுகள் பலவகையில் இருக்கலாம். பொதுவாக “இதயச் சுவர்களில் குறைபாடு (Defects in heart walls)”, “அடைப்பிதழ் குறைபாடு (Defects in heart valves) ”, “இதய இரத்தக் குழாய்களில் குறைபாடு (Defects in blood vessels) என்று பிரிக்கலாம்.

குறைபாட்டுக்கான காரணங்கள்:

* குடும்பத் தலைமுறை (Families) யாக வரலாம்.

* கருவுற்ற காலத்தில் உட்கொள்ளும் (வேறு நோய்களுக்கு) சில மருந்துகளால் இதயக் கோளாறு ஏற்படலாம்.

* கருவுற்ற காலங்களில் அதிக அளவு மது அருந்துவதால் இந்நோய்கள் வர வாய்ப்புள்ளது.

* கருவுற்ற காலங்களில் அதிக அளவு ‘இரத்த சர்க்கரை அளவு குழந்தைகளின் இதய வளர்ச்சியைப் பாதிக்கலாம்.

அறிகுறிகள்: சில இதயக் குறைபாடு உள்ள குழந்தைகளுக்கு, எந்த அறிகுறிகளும் இல்லாமல், வயது ஏற, ஏற அறிகுறிகள் ஏற்படலாம்.

பிறந்த உடன் தெரியும் அறிகுறிகள்:

* கருநீல வண்ண உதடுகள், தோல், விரல்கள், கால் கட்டை விரல்கள்

* மூச்சு விடுவதில் கடினம்.

* பால் குடிப்பதற்கு சிரமப்படுதல்

* எடை குறைவு

*இதயப் பகுதியில் வலியும், அதனால் குழந்தை தொடர்ச்சியாக அழுதுகொண்டே இருத்தல்.

* குழந்தையின் தாமதமான வளர்ச்சி.

நாள்பட்ட அறிகுறிகள்:

* இதயத் துடிப்பு குறைபாடு

* தலைச்சுற்றல்

* மூச்சுவிடுவதில் தொல்லை.

* அடிக்கடி மயக்கமடைதல்.

* கால்களில் (பாதங்களில்) வீக்கம்

* களைப்பு

மருத்துவம்:

குறைபாடுகளுக்கு ஏற்றவாறு மருத்துவம் மாறுபடும். சில குழந்தைகளுக்கு குறைபாடு சிறியதாக இருப்பின் தானாகவே சரியாகிவிடும். குறைபாடுகள் அதிகளவு இருந்தால் மருத்துவமுறை மாறுபடும்.

மருந்துகள்:

மருந்துகள் மூலம் பெரிய அளவு பயனில்லை எனினும் இதய இயக்கத்தைச் சிறப்பாக்கும் மருந்துகள், இரத்த உறைவைத் தடுக்கும் மருந்துகள், இதயத் துடிப்பைச் சீராக்கும் மருந்துகள் எனப் பலவகை மருந்துகளும் மருத்துவர்களால் கொடுக்கப்படுகின்றன. அவை ஓரளவு இதயத்தின் இயக்கத்தைச் சீராக்கும் தன்மையுடையவையாகும். அதனால் உடனடி ஆபத்தை தவிர்க்கலாம்.

இதயத்தில் பதிக்கும் கருவிகள்:  (Heart Implants)

“இதயத் துடிப்பு சீர்மை கருவி’’ (Pacemaker), இதய உதறல் நீக்கி (Defibrillator) கருவி இவை இரண்டையும் தேவைக்கு ஏற்ப உடலிலேயே பொருத்தி இதயத்தின் இயக்கத்தைச் சீராக்கிவிடுவர். சீர்மைக் கருவி இதயத் துடிப்பைச் சீராக்கும். உதறல் நீக்கிகள், ஆபத்து ஏற்படுத்தும் இதயச் செயல்பாடு குறைபாட்டைச் சீராக்கும்.

வடிகுழாய் மருத்துவம்: (Catheterisation Procedure)

ஓரளவு குறைபாடு இருப்பின் இம் மருத்துவ முறை பயனை தரும். இம் முறையில் காலில் உள்ள இரத்தக்குழாய் வழியே ஒரு வடிகுழாயை இதயம் வரை செலுத்தி, சிறு கருவிகளை அதன் வழியே செலுத்தி, குறைபாட்டைச் சரி செய்வர். இதன் மூலம் அறுவை மருத்துவத்தைத் தவிர்க்கலாம்.

இதய அறுவை மருத்துவம்:(Open Heart Surgery)

பெரிய குறைபாடுகளை இம் மருத்துவ முறையின் மூலமே சரியாக்க முடியும். இதயத்தின் ஓட்டைகளைச் சீராக்குதல், அடைப்பிதழ்களைச் சீராக்குதல், இரத்தக் குழாய்களை விரிவாக்குதல் போன்றவை இதன் மூலம் சரியாக்கப்படுகிறது.

மாற்று இதயம்: சில குழந்தைகளுக்கு பல குறைபாடுகள் ஒன்றாக இணைந்து பெரும் கோளாறாக அமைந்துவிடும். இக்குறைபாட்டை மேற்சொன்ன எந்த மருத்துவ முறையாலும் சீராக்க முடியாது. அது சமயங்களில் மூளைச்சாவு அடைந்தவர்களின் (குழந்தைகளின்) இதயத்தைப் பொருத்தி அதன் மூலம் வாழ்வளிக்கலாம்.

பிறவி இதயக் கோளாறு உடைய குழந்தைகளில் பெரும்பாலும் மேற்சொன்ன ஏதாவதொரு மருத்துவ முறை மூலம் முழுமையாகச் சரியாக்கி, நீண்ட நாள் வாழ வைக்க முடியும். “விதி’’ என்று உட்கார்ந்திருந்தால், குழந்தையின் இறப்பைத் தவிர்க்க முடியாது.

அடைப்பிதழ் நோய்கள்: (Valvular Diseases) (பிறவிக் கோளாறால் ஏற்படுபவை)

இதயத்தின் வலது மேலறைக்கும், கீழறைக்கும் இடைப்பட்ட மூவிதழ் அடைப்பிதழிலும், இடதுபக்கம் ஈரிதழ் அடைப்பிதழிலும், நுரையீரல் தமனியில், மகாதமனியில் உள்ள அடைப்பிதழ்களில் ஏற்படும் நோய்களையே “அடைப்பிதழ் நோய்கள்’’ என்கிறோம்.

காரணிகள்: 1. பிறவிக் கோளாறு, 2. நோய் தொற்று, 3. நெஞ்சில் அடிபடுதல், 4. மூப்பு.

பிறவிக்கோளாறு: இதயத்தின் நான்கு அடைப்பிதழ்களும் சரியான முறையில் அமைந்திருப்பின், இரத்தம் சரியாக உடலின் பல பாகங்களுக்கும் சீரான முறையில் செலுத்தப்படும். ஆனால், சில குழந்தைகள் பிறக்கும்பொழுதே அடைப்பிதழ்களில் குறைபாட்டோடு பிறந்துவிடும். இது ஒரு அடைப்பிதழிலோ அல்லது ஒன்றுக்கு மேற்பட்ட அடைப்பிதழ் கோளாறாகவும் அமையக் கூடும். இந்தக் குறைபாட்டின் காரணமாக அடைப்பிதழ்களில் சரியாக மூடாத நிலை ஏற்படும். அந்த வேளைகளில் மேலறை சுருங்கினாலும், சுருங்காவிட்டாலும் கீழறைக்கு இரத்தம் போய்க் கொண்டே இருக்கும். இதனால் கெட்ட இரத்தமும், நல்ல இரத்தமும் கலக்கும் சூழ்நிலை ஏற்படும். அது மட்டுமின்றி கீழறையிலிருக்கும் இரத்தம் கீழறை சுருங்கும்பொழுது மீண்டும் மேலறைக்கே செல்லும் நிலை ஏற்படும். இதனால் உடலுக்குத் தேவையான இரத்தத்தைச் செலுத்த அதிகமாகச் சுருங்கி விரியும் நிலை ஏற்படும். இதயம் பருத்துவிடும் (Dilated Cardio Myopathy), இதய செயலிழப்பு (Heart Failure), மகா தமனியில் வீக்கம் (Aortic Aneurysms)போன்ற இதய நோய்கள் ஏற்படக்கூடும்.

அறிகுறிகள்: பிறவிக்கோளாறு இதய நோய்கள் பலருக்கு இடைப் பருவ வயதுவரைகூட உணர முடியாமல் போகலாம். அறிகுறிகள் தெரியத் துவங்கும் பொழுதே நோய் பற்றி அவர்களால் அறிய முடியும். நெஞ்சுவலி, தலைசுற்றல், மயக்கம், களைப்பு, மூச்சுத் திணறல், இதயத் துடிப்பு மாறுபாடு (Heart Murmers), படபடப்பு போன்றவை ஏற்படும். உடல் உழைப்பு அதிகமாகும்பொழுது மேற்சொன்னஅறிகுறிகள் தீவிரமடையும். இதுபோன்ற அறிகுறிகள் லேசாகத் தெரிந்தாலே இதய நோய் மருத்துவர்கள் (Cardiologist) எளிதாக தெரிந்துகொள்வர். பின் எக்ஸ்ரே, சி.டி.ஸ்கேன், இதய மின்னலைப் பதிவு (ஈ.சி.ஜி), ஒலி அலைப் பதிவு (Ultra Sound), வடிகுழாய் ஆய்வு(Catheterization) போன்ற ஆய்வுகளின் மூலம் கோளாறைத் துல்லியமாக மருத்துவர் அறிந்துகொள்வார். கோளாறின் தன்மைக்கேற்ப மருத்துவர், மருத்துவ முறையை முடிவு செய்வார்.

மருத்துவம்: லேசான குறைபாடுகளை மருத்துவம் மூலம் கட்டுக்குள் வைக்க முடியும். மகாதமனியில் அடைப்பிதழ் கோளாறை வடிகுழாய் வழியே ஒரு பலூனைச் செலுத்தி, அதை பாதிக்கப்பட்ட பகுதியில் நிலைநிறுத்தி, பலூனைப் பெரிதாக்கி தமனியை விரிவடையச் செய்வர். இதன் மூலம் இரத்தம் தடங்கலின்றிச் செல்லும்.  (Baloon Valvuloplasty) இது எதன் மூலமும் பலன் கிடைக்காதெனில் அறுவை மருத்துவம் செய்து அடைப்பிதழ்களைச் சரியாக்க முயல்வர் அல்லது புதிய அடைப்பிதழ்களை திறந்த இதய அறுவை மருத்துவம் மூலம் செய்து நோயையும், குறைபாட்டையும் சீராக்குவர். இம்மருத்துவ முறையால் ஏராளமானோர் பலனடைந்து, வாழ்வு நீட்டிப்பை பெற்றுள்ளனர்.

அடைப்பிதழ் நோய்கள்: நோய்க் தொற்றால் ஏற்படுபவை:

பிறக்கும்பொழுதும், பின்பும் சரியான முறையில் அடைப்பிதழ்கள் அமைந்திருந்தாலும், பிற்காலத்தில் நோய்த்தொற்றால் அடைப்பிதழ்களில் நோய் தாக்கி, அதன் இயங்கும் தன்மையில் குறைபாடு ஏற்படலாம். வாதநோய் (Rheumatic disease) தாக்குதலில் இதயம் பாதிக்கப்படலாம். “ஸ்ட்ரெப்டோகாக்கஸ்’’  (Streptococcus) நோய்த் தொற்றால் தொண்டை, பற்கள், ஈறுகள் பாதிக்கப்படலாம். அந்தப் பகுதியிலிருந்து நோய்க் கிருமிகள், இரத்தத்தின் மூலம் இதயத்திற்குள் ஊடுருவி அடைப்பிதழ்களைத் தாக்கும். அடைப்பிதழ்களில் இயக்கக் குறைபாடு ஏற்பட இந்நோய்த் தொற்று ஒரு முக்கிய காரணியாகும். காரணங்கள் எதுவாகிலும் அறிகுறிகளும், மருத்துவமும் ஒரே வகைதான்.

அடிபடுதல் அடைப்பிதழ் நோய்கள்:  (Traumatic Valvular Disease) மார்பு பகுதியில் ஏற்படும் ஊமைக் காயங்கள் (Blunt Injury) இதயத்தைத் தாக்கி அதனால் அடைப்பிதழ்கள் பாதிக்கப்படலாம். ஆழமான வெட்டுக் காயங்களும் இதய அடைப்பிதழ்களைப் பாதிக்கலாம். இது மிகவும் ஆபத்தானது. உடனடியாக மருத்துவம் செய்யாவிட்டால் மரணம் நிகழவே வாய்ப்புகள் அதிகம்.

முதுமை: முதுமையின் காரணமாகவும் அடைப்பிதழ் செயல்பாடுகள் குறையலாம். அறிகுறிகளும், மருத்துவமும் ஒரே வகைதான்!

- உண்மை இதழ், 16-31.3.20

விதி நம்பிக்கையை விலக்கிய அதி நவீன மருத்துவங்கள் (8)

மருத்துவம் : 

மரு.இரா.கவுதமன்

இதய நோய்களைப் பற்றி தெரிந்து கொள்வதற்கு முன் இதயத்தைப் பற்றி தெரிந்து கொள்வது அவசியம். இதயம் ஒரு வியப்பூட்டக்கூடிய உடல் உறுப்பு. முழுதும் தசைகளாலான இதயம் நம் நெஞ்சுக் கூட்டின் இடப்புறம் நெஞ்செலும்பிற்கு பின்புறம் அமைந்துள்ளது. கருத்தரித்தல் நிகழ்ந்து, 21 நாள்களிலேயே தோன்றும் முதல் உடல் உறுப்பு இதயம்தான். கருவின் இயங்கக்கூடிய முதல் உடலுறுப்பும் இதுதான். ஆரம்பத்தில் இரண்டு குழாய்களாக வளர்ச்சி அடையும் இது, பிறகு இணைந்து 4 அறைகளாக உருமாற்றம் பெறும். மூன்று வாரங்களில் இயங்கும் இதயம், கருவின் “இடைத்தோல் படை’’யிலிருந்து (Mesoderm) உருப்பெறுகிறது. கருவின் உட்புற செல்கள் மூன்று விதமாகப் பிரிகின்றன. “வெளித்தோல்படை’’ (Ectoderm), “இடைத்தோல் படை’’(Mesoderm), “உள்தோல் படை’’ (Endoderm) ஆகிய மூன்று பகுதிகளிலிருந்தே அனைத்து உறுப்புகளும் வளர்ச்சி அடைகின்றன.

இடைத்தோல் படையில் வளரும் இதயம் கரு உண்டாகி மூன்றாவது வாரத்தில் துடிக்கத் துவங்கி, நம் மரணம் வரை துடித்துக்கொண்டே இருக்கும். ஒரு நிமிடத்திற்கு 72 முறை துடிக்கும் இதயம், 60 வயதானவருக்கு, ஏறக்குறைய 2.5 மில்லியன் தடவை துடிக்கும். பெண்களுக்கு சுமார் 250 முதல் 300 கிராம் எடையும், ஆண்களுக்கு 300 முதல் 350 கிராம் எடையும் இருக்கும். இதயத்திற்கு இரத்தத்தைக் கொண்டு வரும் குழாய்கள் ‘சிரைகள்’ என்றும் இதயத்தில் இருந்து இரத்தத்தை உடலின் பாகங்களுக்கு எடுத்துச் செல்லும் குழாய்களுக்கு “தமனிகள்’’ என்றும் பெயர். இதயத்தில் நான்கு அறைகள் உள்ளன. அவை வலது (ஆரிக்கள்) மேலறை, இடது மேலறை, வலது கீழறை  (Ventricle), இடது கீழறை ஆகியவை ஆகும்.

மேலறைகளும், கீழறைகளும் “அடைப்பிதழ்’’-களால் (Valve) பிரிக்கப்பட்டுள்ளன. வலதுபுறம் அறைகளை “முக்கூர் அடைப்பிதழும்’’(Tricuspid valve), இடது புற அறைகளை “இருகூர் அடைப்பிதழும்’’ (Bicuspid Valve) பிரிக்கின்றன. இவ்வறைகளை “பிரிசுவர்’’(Septum) பிரிக்கிறது. இரண்டு மேலறைகளும் மெலிதாகவும், இரண்டு கீழறைகள் தடிமனாகவும் இருக்கும். இடது கீழறை, வலது கீழறையை விட அதிக தடிமனாக இருக்கும். உடல் முழுதும் இரத்தம் செலுத்த வேண்டிய வேலையை இடது கீழறை செய்வதால் அது அவ்வாறு அமைந்துள்ளது. இடது கீழறையிலிருந்து வெளியேறும் “பெருநாடி’’ (மகாதமனி_(Aorta) யில் அடைப்பிதழ்கள் (Valve) உள்ளன. வலது கீழறையிலிருந்து நுரையீரலுக்குச் செல்லும் நுரையீரல் தமனியிலும் அடைப்பிதழ்கள் உள்ளன. இவை  “அரைமதி அடைப்பிதழ்கள்’’ (Semilunar Valves) என்றழைக்கப்படுகின்றன. இதயத்தின் கீழ்புறமுள்ள அசுத்த இரத்தம், ‘கீழ்ப்பெருஞ்சிரை’ மூலமும், இதயத்திற்கு மேல்புறம் உள்ள அசுத்த இரத்தம் ‘மேல் பெருஞ்சிரை’ மூலமும் இதயத்தின் வலது மேலறையிலும் சேரும். நுரையீரலில் இருந்து வரும் நுரையீரல் சிரை, இதயத்தின் இடது மேலறையில் திறக்கும். நுரையீரலில் சுத்தகரிக்கப்பட்ட இரத்தம் இடது மேலறையில் சேரும். இதயத்தைச் சுற்றி இரண்டு உறைகள் (Pericardium) உள்ளன. மென்சவ்வால் ஆன இரண்டு உறைகளில் புறஉறை நார்ச்சவ்வாலும், அகஉறை நீர்ச்சவ்வாலும் ஆனது. இதனால் இதயத்திற்கு, அதிர்ச்சி ஏற்படாமல் தடுக்கப்படுகிறது. இதயத்திற்குத் தேவையான இரத்தம் ‘இதயத்தமனி’(Coronary Artery) மூலம் கிடைக்கிறது.

ஏற்கெனவே குறிப்பிட்டபடி நமது இதயம் பல கோடிமுறை துடிக்கிறது. இதயத்தின் அறைகள் சுருங்கி, விரிவதால் ஏற்படும் ஒலியே நாடித்துடிப்பாக மருத்துவர்கள் அறிகின்றனர். கருத்தரித்த 21 நாள்களில் துடிக்கின்ற இதயத்திற்கும், அதன் தொடர்ச்சியான இடைவிடாத இயக்கத்திற்கும் தேவையான உயிர்க்காற்றும் (Oxygen), சத்தும், இதயத் தமனி மூலமே கிடைக்கிறது. இதயத் தமனியின் மூலம் கிடைக்கும் இரத்த ஓட்டத்தில் அடைப்போ, குறைபாடோ ஏற்பட்டால் இதயச் செயல்பாடு நின்று, உயிருக்கே ஆபத்து ஏற்பட்டுவிடும். இதயத்திற்கு வரும் நரம்பு ‘வேகஸ்’ (Vagus) நரம்பாகும். இதயம் இரண்டு வகை நரம்புத் தொகுதிகளால், நரம்பு மண்டலத்தோடு இணைக்கப்பட்டுள்ளது. பரிவு நரம்புகள்(Sympathetic Nervous System), துணை பரிவு நரம்புகள் (Para sympathetic Nervous System) என இரண்டு வகை நரம்புகள் இதய செயல்பாட்டை வழி நடத்துகின்றன. பரிவு நரம்பியக்கம் இதயத் துடிப்பை அதிகரிக்கும். துணைப் பரிவு நரம்பியக்கம் இதயத் துடிப்பைக் குறைக்கும். இவை     அனைத்தும் இணைந்து ‘இதய நரம்புப் பின்னலை’ ஏற்படுத்துகின்றன (cardiac plexeus). மூளையிலிருந்து வருகின்ற வேகஸ் நரம்பிலிருந்தும் தானியக்க நரம்பு மண்டலத்திலிருந்தும்(Autonomous Nervous System) இந்த நரம்புகள் இதயத்திற்கு வருகின்றன. இதயம் சரியான முறையில் இயங்குவதற்கு இந்த நரம்புப் பின்னல்களே காரணம்.

இதயத்தின் இயக்கம்: உடலின் தலை, கழுத்து, மார்புப் பகுதிகளிலிருந்து கெட்ட இரத்தம் மேல் பெருஞ்சிரை மூலம் இதயத்தின் வலது மேலறையில் வந்து சேரும். அதேபோல் உடலின் மார்புக்கு கீழ்புறம் உள்ள உடலின் பாகங்களிலிருந்து வரும் கெட்ட இரத்தம் கீழ்ப் பெருஞ்சிரை வழியே இதய வலது மேலறைக்கு வரும். இதய மேலறைகள் இரண்டும் சுருங்கும்பொழுது வலது மேலறையிலிருக்கும் கெட்ட இரத்தம் முக்கூர் அடைப்பிதழைத் திறந்து கொண்டு வலது கீழறையை அடையும். வலது கீழறை சுருங்கும்பொழுது, கெட்ட இரத்தம் நுரையீரல் தமனியின் அரைமதி அடைப்பிதழைத் திறந்துகொண்டு, இரண்டு நுரையீரல்களுக்கும் செல்லும், அங்குள்ள நுரையீரல் பைகளில் நிரம்பியுள்ள உயிர் மூச்சுக்காற்று சிறு சிறு தந்துகிகளால் (Capillaries) உறிஞ்சப்பட்டு, தந்துகிகளில் உள்ள கரியமில வாயு(carbon-di-oxide) வெளியேறும். அதுவே நம் உடலிலிருந்து மூச்சுக்காற்றாக வெளியேற்றப்படுகிறது. (மூச்சு விடுதல்). இப்படி முழுமையாகச் சுத்திகரிக்கப்பட்ட நல்ல இரத்தம் நுரையீரல் சிரை (Pulmonary Vein) மூலம் இடது மேலறையை (Left auricle) வந்தடையும். மேலறைகள் சுருங்கும் வேளை இடது மேலறையிலிருக்கும் இரத்தம் இருகூர் அடைப்பிதழைத் திறந்து கொண்டு இடது கீழறையில் நிரம்பும். இதயக் கீழறை சுருங்கும்பொழுது பெருநாடி (மகாதமனி)யில் உள்ள அரைமதி அடைப்பிதழைத் திறந்து கொண்டு இரத்தம் அதன் வழியே வெளியேறி, உடலின் அனைத்துப் பாகங்களுக்கும் பரவும். மேலறை, கீழறை ஆகியவற்றின் சுருங்கி விரியும் தன்மையை இதய நரம்புப் பின்னல் ஒழுங்காக நிகழுமாறு கட்டுப்படுத்துகிறது. இவ்வாறு மேலறைகளும், கீழறைகளும் இயல்பாகச் சுருங்கி, விரியும் தன்மையினால் நம் உடலின் இரத்த ஓட்டம் சீராகச் செல்கிறது. இதயத்தின் அறைகள் சுருங்கி விரியும் பொழுது வெளியேறும் இரத்தம், அரைமதி அடைப்பிதழ்களைத் திறந்து செல்லும்-பொழுதும், முக்கூர், இருகூர் அடைப்பிதழ்-களைத் திறந்து, மூடும்பொழுது ஏற்படும் ‘ஒலி’யையே நாம் “லப்’’, “டப்’’ என்னும் இதயத் துடிப்பாகக் கேட்கிறோம். இதுவே தமனிகளில் “நாடித் துடிப்பாக’’ (Pulse) உணர்கிறோம்.

- உண்மை இதழ், 1-15.3.20

விதி நம்பிக்கையை விலக்கிய அதி நவீன மருத்துவங்கள்!(7)

மருத்துவம் : 

 - மரு.இரா.கவுதமன்

தொண்டை:

சிலருக்கு “குரல் மாற்றம்’’ ஏற்படலாம். பெரும்பாலும் “தைராக்சின்’’ (Thyroxine) சுரப்பு, தைராய்டு சுரப்பியில் குறைவு ஏற்படின் இந்த நிலை ஏற்படும். சில நேரங்களில் குரல் நாண்களில் ஏற்படும் அழற்சிகூட குரல் மாறுபாட்டை ஏற்படுத்தும். ஆனால், இது தற்காலிகமானது. சில சமயம் குரல் மாற்றம் மெதுவாகத் துவங்கி, கொஞ்சம், கொஞ்சமாக அதிகமாகி பேச்சே நின்று விடும் நிலைகூட ஏற்படலாம். இது மிகவும் ஆபத்தானது. பெரும்பாலும் குரல் நாண்கள், குரல் வளை (Larynx), குரல் வளை மூடி (Epiglottis) இவற்றில் ஏற்படும் அழற்சிகள் மருந்துகள் உட்கொள்வதால் ஓரிரு நாள்களில் சரியாகிவிடும். ஆனால், தொடர்ச்சியான தொண்டை கரகரப்பு, பேச்சில் ஒலி மாற்றம், தொண்டை வலி, நெறிகட்டுதல் போன்றவை இருந்தால் உடனே காது, மூக்கு, தொண்டை மருத்துவரிடம் காண்பிக்க வேண்டும். “பாலிப்’’ (Polyp) எனும் சாதாரண கட்டிகள் குரல்வளையில் ஏற்பட்டால் இதுபோன்ற நிலை ஏற்படலாம். சில நேரங்களில் தொண்டையில் ஏற்படும் புற்று நோயால்கூட இந்நிலை ஏற்படலாம். இவற்றை முன்பெல்லாம் பெரிய அறுவை மருத்துவம் செய்தே சரியாக்கக் கூடிய சூழல் இருந்தது. இது ஓர் ஆபத்தான அறுவை மருத்துவம். புற்று நோய்க்காக இம்மருத்துவம் செய்யப்பட்டாலும், நோய் மற்ற பகுதிகளில் பரவி இருக்கும் நிலையும் கூட சில நேரங்களில் ஏற்பட்டிருக்கும். அதனால் புற்று நோய் மீண்டும் வரும் நிலை இருந்தது. இன்றைக்கு உள்நோக்கி அறுவை மருத்துவம் (Endoscopic Surgery) இந்த ஆபத்துகளைப் பெருமளவு குறைத்துவிட்டது. ஆரம்ப நிலையில் கண்டறியப்பட்டால், புற்றுநோய்க் கட்டிகளையும், சாதாரணக் கட்டிகளையும் (Polyps) முழுமையாக இம்மருத்துவத்தின் மூலம் அகற்றி விடுகிறார்கள். ஆபத்தற்ற, எளிமையான இம்மருத்துவம் மிகவும் பயனுள்ள மருத்துவமாக இன்று நிலை பெற்றுள்ளது. இந்த முறையில் மருத்துவம் செய்து கொண்டவர்கள் ஓரிரு நாள்கள் மட்டுமே மருத்துவமனையில் இருந்தால் போதும். ‘விதிவசத்தால்’ வந்ததாக நம்பப்படும் தொண்டைப் புற்றுநோய் உள்நோக்கி அறுவை மருத்துவத்தால் சரிசெய்யப்படுவது மருத்துவ அறிவியலின் அரிய பண்பாகும்.

தைராய்டு சுரப்பு கோளாறுகள்:

இன்றைய மருத்துவ உலகில் அதிகம் பேசும் பொருளாக உள்ளது தைராய்டு சுரப்பு. நம் உடல் வளர்ச்சிக்கும், உடலில் உண்டாகும் வளர்சிதை மாற்றங்களுக்கும் காரணமானவை ‘நாளமில்லா சுரப்பிகள்’ (Ductless Glands) எனப்படும் சுரப்பிகளே ஆகும். இச்சுரப்பிகளில் உள்ள அதிக அளவு இரத்தக் குழாய்களில், சுரப்பிகளில் சுரக்கும் “சுரப்பு’’கள் நேரடியாக கலக்கும். நம் உடலில் பிட்யூட்டரி சுரப்பி (Pitutary Gland) , தைராய்டு சுரப்பி (Thyroid Gland), பாரா தைராய்டு (Para Thyroid Gland), தைமஸ் (Thymus), அட்ரினல் சுரப்பி (Adrenal Gland), கணையத்தின் லாங்கர்ஹான் திட்டுகள் (Laugerhan Isles of Pancreas), அண்டம் (Overies),  விந்தகம் (Testes) என அத்தனையும் இணைந்து “நாளமில்லாச் சுரப்பிகளில் சுரக்கும், சுரப்புகளும் இணைந்துதான் நம் உடலின் இயக்கம், சீரான வளர்ச்சிக்கு காரணிகளாகின்றன. இதில் அதிகம் பேசும் பொருளாக இருப்பது தைராய்டு சுரப்பிதான். இன்றைக்கு உலகில் தைராய்டு நோய்களால் பாதிக்கப்பட்டவர்கள்; மிக அதிகம். வருடத்திற்கு 10 மில்லியன் மக்கள் இந்நோய்களால் பாதிக்கப்படுகின்றனர்.

தைராய்டு சுரப்பி கழுத்தின் மேல்புறம், குரல்வளைக்கு கீழே, தைராய்டு குறுத்தெலும்பின் கீழ்புறம், மூச்சுக் குழாயின் (Trachea) இருபுறமும் அமைந்துள்ளது.  (Islhmus). தைராய்டு சுரப்பு “தைராக்சின்’’ என்ற சுரப்பை சுரக்கச் செய்யும். இச்சுரப்பு நம் உடலில் ஏற்படும் வளர்சிதை மாற்றம், உடல் வளர்ச்சி, உடல் வெப்பநிலை, இதயத்தை சீராக இயங்க வைத்தல், உடல் இயக்கத்தை சீராக வைத்தல் ஆகிய இன்றியமையாத பணிகளை கட்டுப்படுத்துகின்றது. தைராய்டு சுரப்பியில் உள்ள அதிக அளவு இரத்தக் குழாய்கள் மூலம் தைராக்சின் உறிஞ்சப்பட்டு உடல் முழுதும் பரவி, உடல் இயக்கத்தை ஒழுங்குபடுத்துகிறது. தைராக்சின் சுரப்பிக்கு “அயோடின்’’ (Iodine) மிகவும் தேவை. இது சுரப்பிற்கு வரும் இரத்தக் குழாய்களிலிருந்து, தைராய்டு சுரப்பி உறிஞ்சிக் கொண்டு, தைராக்சினை உற்பத்தி செய்யும். அயோடின் உறிஞ்சப்பட்டதும், “டிரைஜயடா தைரேனைன் (T3), தைரோசின் (T4) அமினோ அமிலங்களுடன் இணைந்து தைராக்சின் உற்பத்தி செய்யப்படுகிறது. பிட்யூட்டரி சுரப்பியில் தைராய்டு ஊக்குவிப்பு சுரப்பு வெளிப்படும். (Tyroid Stimulating Hormone - TSH). தைராய்டு சுரப்பியில் ஏதேனும் குறைபாடு ஏற்பட்டால் தைராய்டு ஊக்குவிப்பு சுரப்பு அதை சமன் செய்யத் துவங்கும்.

தைராக்சின் குறைபாடு: தைராய்டு நோய்களில் அதிகளவு பாதிப்பு, தைராய்டு குறைபாட்டினாலே ஏற்படுகிறது.

ஆரம்ப அறிகுறிகள்: தசைத் தளர்ச்சி, களைப்பு, குளிர் தாங்க முடியாமை, உளச்சோர்வு, தசை பிடிப்பு, மூட்டுகளில் வலி, முன் கழுத்துக் கழலை, வெளிரிய தன்மை, வியர்வையின்மை, தோல் உளர்தல் (Dry Skin), எடை ஏற்றம், உடலில் நீர் கட்டுதல் போன்றவை ஏற்படும்.

நாள்பட்ட அறிகுறிகள்: நினைவாற்றல் குறைதல், மந்தமான மூளை செயல்பாடு, முடியுதிர்தல், இரத்தசோகை, குரல் கடினமாதல் (கரகரத்து போதல், பெண்களுக்கு ஆண் தன்மையான குரல் போன்றவை, விழுங்குவதில் சிரமம், அதிக உறக்கம், ஆண்களுக்கு மார்பு பெரிதாகல் (Gynoeco Mastia),குறைவான பாலுணர்வு, மந்தமான சிறுநீரக செயல்பாடு, இதயத் துடிப்பு குறைவு, இதய சுருங்கு திறனில் பாதிப்பு, இரத்தத்தில் சர்க்கரை அளவு குறைபாடு போன்றவை ஏற்படும். உடலில், வளர்சிதை மாற்றம் பாதிக்கப்படும். நோயாளி ஒருவகை மந்தநிலையில், எதிலும் ஆர்வமின்றி காணப்படுவார்.

மருத்துவம்: பெரும்பாலும் (99%) மருந்துகள் மூலம் இந்நோயைக் குணப்படுத்தலாம். மிகப் பெரிதாக வளர்ந்துவிட்ட முன் கழுத்துக் கழலை  (Goitre) யைதான் அறுவை மருத்துவத்தின் மூலம்தான் சரி செய்வர். மருந்துகளை மருத்துவரின் ஆலோசனையின் பேரில்தான் உட்கொள்ள வேண்டும். மருத்துவர் கூறியுள்ள அளவுக்கு மீறியோ, குறைவாகவோ கட்டாயம் எடுக்கக் கூடாது. அது பின் விளைவுகளை உண்டாக்கும்.

தைராக்சின் அதிகமாதல்: தேவைக்கு அதிகமாக சிலருக்கு தைராக்சின் சுரக்கக் கூடும். இதனால் பதட்டம், அதிக வியர்வை, படபடப்பு, கைகள் நடுக்கம்  (Tremors), தூக்கமின்மை, அடிக்கடி மலம் கழித்தல், எடை குறைதல், சரியாக மாதவிடாய் ஆகாமை போன்றவை ஏற்படும்.

காரணங்கள்: “கிரேவ்ஸ் நோய்’’ பொதுவாக தைராக்ஸினை அதிகம் சுரக்கச் செய்யும். தைராய்டு சுரப்பில் ஏற்படும் கட்டிகள், முடிச்சுகள், நோய்த் தொற்று, சில வகை மருந்துகள் தைராக்சின் சுரப்பை அதிகரிக்கும். தைராய்டு புற்றுநோயின் காரணமாகவும் தைராக்சின் அதிக அளவு சுரக்கலாம்.

மருத்துவம்: பல நேரங்களில் மருந்துகள் மூலமும், சில நேரங்களில் அறுவை மருத்துவம் மூலமும் குணமாக்கலாம். தைராய்டு கட்டிகளை அறுவை மருத்துவம் மூலம் சரி செய்யலாம்.

(தொடரும்)

-உண்மை இதழ், 16-29.2.20

விதி நம்பிக்கையை விலக்கிய அதி நவீன மருத்துவங்கள்![6]

மருத்துவம் : 

மரு.இரா.கவுதமன்

தலைசுற்றல் (Vertigo) எப்படி ஏற்படுகிறது?

உள்காதில் கேட்கும் திறனைத் தரும் நத்தை ஓட்டெலும்போடு, உடலைச் சமநிலைப்படுத்தும் “லேப்ரிந்த்’’ (Labyrinth) என்னும் பகுதியும் உள்ளது. லேப்ரிந்தின் ஒரு புறம் நத்தை ஓட்டெலும்பும், மறுபுறம் அரைவட்ட குழாய்களும்  (Semi Circular Canals) உள்ளன. லேப்ரிந்த் எலும்பு லேம்ரிந்த், படல லேப்ரிந்த் என இரண்டு வகையாக அமைந்திருக்கும். எலும்பு லேப்ரிந்தில் சுற்றுப்புற நிணநீர் திரவமும், நடுவில் உள்ள படல லேப்ரிந்தில் உட்புற நிணநீர் திரவமும் இருக்கும். நம் உடல் அசைவுக்கு ஏற்ப உட்புற நிணநீர் திரவம் அசையும். அசைவின் வேகம், திசை, பரப்பு ஆகியவற்றைக் கொண்டு அரைவட்டக் குழல்களில் குறியீடுகள் தோன்றும். அக்குறியீடுகள் காது நரம்புகள் மூலமாக மூளையை அடையும். இத்தகவல் மூளைக்குச் சென்றதும் நாம் நிற்கிறோமா, நடக்கிறோமா என நம் அசைவுகளை மூளை அறியும். அதற்கேற்றாற்போல் உடல் தசைகளுக்கு ஆணையிட்டு, நம்மைச் சமநிலைப்படுத்தும். இந்தத் தொடர் செயல்பாட்டால் ஏதேனும் குறை ஏற்பட்டால் காதிலிருந்து தவறான தவகல்கள் மூளைக்குச் செல்லும். அதனால் மூளை குழம்பி தவறான தகவல்களை தசைகளுக்கு அனுப்பும். இதனால் தசைகள் இயல்பாக சமநிலையில் இயங்காது. அதனால்தான் “தலைசுற்றல்’’ ஏற்படுகிறது. தலைசுற்றல் ஏற்படும்பொழுது காதில் ஒரு வகை ஒலி கேட்கக் கூடும்  (Tinnitus). தலைசுற்றலில், மிதமானது, மத்திய வகை, தீவிரமானது என்று மூன்று வகை உள்ளது. மிதமான குமட்டலும், தலைசுற்றலும் சிறிது நேரமே இருக்கும். படுத்து ஓய்வெடுத்தால் சரியாகி விடும். மத்திய வகையில் தலைசுற்றலோடு வாந்தியும் இருக்கும். படுத்து ஓய்வு கொண்டால் இதுவும் சரியாகிவிடும். தீவிர வகையிலோ தலைசுற்றல், வாந்தி அதிகமாக இருக்கும். நடந்தால் மயங்கி விழுந்து விடுவோமோ என்கிற பயம் ஏற்படும். தலைசுற்றல் நோய் 80 விழுக்காடு காது கோளாறாலேயே உண்டாகிறது. இதை மருத்துவரின் சிகிச்சை மூலம் குணப்படுத்திவிடலாம்.

மினியர் நோய் (Meniere’s Disease)

உள் காதில் நிணநீர் திரவம் அதிக அளவு சுரந்தால் காதுக்குள் அழுத்தம் அதிகரிக்கும். இதனால் தலைசுற்றல் ஏற்படும். தூங்கும்போது கூட இது ஏற்படலாம். இது உடனே குறையாது. சில நேரங்களில் இரண்டு நாள்கள்கூட இருக்கும். குமட்டல், வாந்தி, காதில் இரைச்சல், காது மந்தம் ஆகியவை இருக்கும். படுக்கையிலேயே இருக்க வேண்டும் என்கிற உணர்வு இருக்கும்.

ஒரு புற தலைச்சுற்றல்:

சிலருக்கு கழுத்தை ஒருபுறம் திருப்பும் பொழுதோ, மேலேயோ, கீழேயோ பார்க்கும்பொழுதோ தலைச்சுற்றல் ஏற்படும். இதற்கு “ஒரு புற தலைச்சுற்றல்’’  (Benign Paroxysmal Positional Vertigo) என்று பெயர். இந்நோயில் காதில் இரைச்சலோ, செவிட்டுத் தன்மையோ ஏற்படாது.

மருத்துவம்:

காது, மூக்கு, தொண்டை மருத்துவர் இந்நோய் குணப்படுத்தலாம்.

 

தடுப்பு முறைகள்:

 

1.    உணவில் உப்பைக் குறைக்க வேண்டும்.

2.    அதிகக் கொழுப்புள்ள உணவைத் தவிர்க்க வேண்டும்.

3.    சரியான ஓய்வு, உறக்கம் அவசியம்.

4.    இரத்த அழுத்தம், சர்க்கரை நோய் கட்டுக்குள் வைத்திருக்க வேண்டும்.

5.    புகை, மதுப் பழக்கம் தவிர்க்க வேண்டும்.

6.    தலை சுற்றுவது போலத் தோன்றினால் உடனே படுத்துக்கொள்ள வேண்டும். கால்களை சற்று உயர்த்தி வைத்துக் கொள்ள வேண்டும்.

7.    ‘ரோலர் கோஸ்ட்’ போன்ற இராட்டினங்களில் அமர்ந்து சுழலக் கூடாது.

8.    படுக்கையிலிருந்து சட்டென எழுந்து நிற்கக் கூடாது.

9.    காது, மூக்கு, தொண்டை மருத்துவ ஆலோசனை மிகவும் முக்கியம்.

10.    சில குறிப்பிட்ட உடற்பயிற்சிகள் பலனளிக்கும்.

11.    சில வகை ‘யோகாசனங்கள்’ பயனளிக்கும்.

12.    மன அழுத்தம் குறைக்க வேண்டும்.

13.    மருத்துகளை மருத்துவரின் அறிவுரைப்படி உண்ண வேண்டும்.

மூக்கு:

சிலருக்கு இயற்கையாய் மூக்கு அழகில்லாமல் இருக்கும். கடவுள் அழகில்லாமல் இவர்களைப் படைத்துவிட்டதாகக்கூட கேட்டிருப்போம். இன்றைய மருத்துவம், இதுபோன்று கவலை உடையவர்களின் மூக்கைச் சீராக்கி, அழகுபடுத்துகிறது.

சிலருக்கு மூக்கெலும்பு வளைந்து காணப்படும். மூக்கின் இருபுறமும், நெற்றி எலும்போடு இணைந்து மூக்கெலும்பு இருக்கும். இருபுறம் உள்ள மூக்கெலும்பின் உள்புறம், மூக்கு இடை எலும்பு (Nasal Septum) இருக்கும். மூக்கின் நெற்றிப் பகுதியிலிருந்து மூன்றில் ஒரு பகுதியே மூக்கெலும்பு இருக்கும். மீதிப் பகுதிகளில் குறுத்தெலும்புதான் இருக்கும். மூக்கெலும்புகளின் அமைப்பில், சிறு அறுவை மருத்துவம் செய்வதன் மூலம், கடவுள் படைத்த (?) அழகற்ற மூக்கை மருத்துவர்கள் அழகாக்கிவிடுவர். (சில வருடங்களுக்கு முன்பு ஒரு பிரபல தமிழ் நடிகை மூக்கை அழகுபடுத்தும் அறுவை மருத்துவம் செய்து கொண்டு, பின் இந்திப் பட உலகில் கொடிகட்டிப் பறந்தார்.)

மூக்கின் இடை எலும்பு வளைவு (Septal Deviation), பல தொல்லைகளை உண்டாக்கும். இந்த வளைவு அதிகமாக இருந்தால், பாதிக்கப்பட்ட புறத்தில் மூக்குத் துவாரம் நெருக்கமாகி விடும். அதனால் அந்தப் பகுதியில் மூக்கடைப்பு ஏற்பட்டு, மூச்சுவிட கடினமாகி விடும். சில நேரங்களில் அடைப்பட்ட மூக்கின் வழியே உதிரப்போக்கும் ஏற்படுவதுண்டு. தூங்கும்பொழுது, ஒருவித ஓசை வரும். இது ஒரு பிறவிக் கோளாறு. பெரியவர்களுக்கு மூக்கெலும்பில் அடிபடுவதால், இந்தக் கோளாறு ஏற்படும். இதற்கும், மூக்கின் உள்புறம் ஒரு சிறிய அறுவை மருத்துவம் செய்வதன் மூலம், முழுமையாகச் சரிசெய்துவிடலாம்.

காற்றறை அழற்சி (Maxillary Sinusities):

முகத்தின் இரண்டு புறத்திலும், மேல் தாடை  (Maxilla) யில் இரண்டு காற்றறைகள் உள்ளன. அதேபோல் முன் மண்டை ஓட்டின் இருபுறமும் காற்றறைகள்  (Frontal Sinuses) உள்ளன. அதேபோல் கண்களுக்கு இடையே இரண்டு காற்றறைகள் (Ethomoid Sinuses),கண்களுக்கு பின்னால் இரண்டு காற்றறைகள்  (Sphenoid Sinuses) என மொத்தம் எட்டு காற்றறைகள் உள்ளன. நமக்குச் சளி பிடிக்கும்போது, இந்தக் காற்றறைகளில் சளி சேர்ந்து, காற்றறைகளில் அடைப்பு ஏற்படும். பெரும்பாலும் மேல்தாடை காற்றறைகள்தான் அதிக அளவு பாதிப்பு எற்படும். முன்பெல்லாம் காற்றறை அழற்சிக்கு அறுவை மருத்துவம் செய்து சீராக்குவர். இப்பொழுது எளிமையாக ‘உள்நோக்கிக் கருவி’ (Endoscope) மூலம் இவ்வழற்சியைச் சீராக்கி விடுகின்றனர். மூக்கு அறுவை மருத்துவத்தில் இவ்வுள்நோக்கிக் கருவி இப்புரட்சியையே ஏற்படுத்தியிருக்கிறது.

விபத்துகளில் அடிபடும்பொழுது, மண்டையின் அடிப்புறம், அடிபட்டால் மூளை, தண்டுவட நீர் (Cerebro-Spinal Fluid-C.S.F.)  மூக்கின் வழியே வரும். இது ஓர் ஆபத்தான அறிகுறி. இதை உள்நோக்கிக் கருவி மூலம் இப்பொழுது சரியாக்கி விடுகின்றனர். அதேபோல் மண்டை ஓட்டின் அடிப்புறத்தில் விபத்தால் அடிபட்டால் அதையும் இக்கருவி மூலம் சரியாக்கும் வாய்ப்பு உள்ளது. பிட்யூட்டரி எனும் நாளமில்லாச் சுரப்பி மண்டையோட்டின் அடிப்புறம் ஒரு குழிக்குள் (Sells Turcica) அமைந்திருக்கும். இதில் ஏற்படும் கட்டிகளைக்கூட (Endoscope) மூக்கு மருத்துவத்திலும், அடி மண்டை (Base of the skull) அறுவை மருத்துவத்திலும் ஒரு புரட்சியையே செய்துள்ளது என்றால் மிகையாகாது.

(தொடரும்...)

- உண்மை இதழ், 1-16.2.20