மருத்துவம் : விதி நம்பிக்கையை விலக்கிய அதி நவீன மருத்துவங்கள்!(5)

மரு.இரா.கவுதமன்

காது, மூக்கு, தொண்டை மருத்துவம்:

காது:

காதில் ஏற்பட்டுள்ள மருத்துவ மாற்றங்களை அறியும் முன், காதின் அமைப்பை நாம் அறிந்துகொள்ள வேண்டும். காது, புறச்செவி, நடுச்செவி, உட்செவி என்று மூன்று வகையாகப் பிரிக்கப்பட்டுள்ளது. காது மடல், செவிக்குழாய், செவிப்பறை மூன்றும் புறச்செவியில் அமைந்துள்ளன. நடுச்செவியில் மிகவும் நுண்ணிய சுத்தி எலும்பு, பட்டை எலும்பு, லாட எலும்பு ஆகியவை அமைந்துள்ளன. சுத்தி எலும்பு (Malleus) செவிப்பறையை ஒட்டியிருக்கும். அதை ஒட்டி பட்டை எலும்பும்  (Incus), அதை ஒட்டி லாட எலும்பும்  (stapes) அமைந்திருக்கும். தொண்டையிலிருந்து காதோடு ஓர் இணைப்புக் குழாய் இருக்கும். ‘ஈஸ்டேஷியன்’ குழாய் என்று அழைக்கப்படும் இக்குழாய், குரல் எழுப்பும்போது வாய் வழியே வரும் காற்றை உள்வாங்கி, காதுக்குள் செலுத்தும். இதன் மூலம் ஒலி சமநிலைப் படுத்தப்படும். உள்செவியில் அரைவட்டக் குல்லியங்கள்(semi circular ducts) மற்றும் நத்தைகூடு எலும்பும்(cochlea) அமைந்திருக்கும். இந்தப் பகுதியிலிருந்து காது நரம்புகள் துவங்கி (Auditory Nerve), மூளைக்குச் செல்லும். காது மடல் மூலம் ஒலி, செவிக்குழாய் வழியே செவிப்பறையில் மோதும். உடன் செவிப் பறை அதிரும். அதை ஒட்டியுள்ள எலும்புகள் மூலம், நடுச்செவியில் ஒலி அதிர்வை உண்டாக்கும். அங்கிருந்து நத்தை ஓட்டு எலும்புமூலம் காது நரம்பின் மூலம், மூளைக்குச் செல்லும். உடனே நம்மால் கேட்க முடிகிறது. இவை அனைத்தும் ஒரு நொடியிலும், பல மடங்கு குறைவான நேரத்திலே நிகழ்வதாகும்.

காது கேளாமை:

காது கேளாமை அதன் தன்மைகேற்ப இருவகைப்படும்.

பிறவிக் குறைபாடு: பிற்காலத்தில் ஏற்படும் குறைபாடு என அது ஏற்படும் காலங்களைப் பொருத்து வகைப்படுத்தலாம். நோய்க் கூறியல்படி “ஒலி கடத்துவதில் குறைபாடு’’, “நரம்பியல் குறைபாடு’’ என மருத்துவர்கள் இருவகையாக வகைப்படுத்துவர் (Conductive defect and Neural Defect). பிறந்த குழந்தைக்கு, காது கேளாமை. அதன் எதிர்காலத்தை மிகவும் பாதிக்கும்.

காதுகளைப் பாதுகாப்பது எப்படி?

எக்காரணம் கொண்டும் காதில், எண்ணெய் போன்ற பொருள்களை விடக்கூடாது. காதில் மெழுகு சேர்வது பாதுகாப்பானது. காதில் வரும் நோய் தொற்று, தூசு போன்றவை இம்மெழுகில் ஒட்டிக் கொள்ளும். அதனால் காதில் நோய் தொற்று தடுக்கப்படும். குச்சி, பின்கள் மூலம் கட்டாயம் இதை எடுக்க முயலக் கூடாது. திடீரென செவிப் பறையில் குத்தி, செவிப்பறை கிழிந்து விடும் ஆபத்து ஏற்பட்டுவிடும். காதில் வலி, சீழ் வடிதல் போன்றவை ஏற்பட்டால், மருத்துவரிடம்தான் காட்ட வேண்டுமே ஒழிய,  நாமாக எந்தவொரு கை வைத்தியமும் செய்து கொள்ளக் கூடாது. சில நேரங்களில் மெழுகு அதிக அளவில் சேர்ந்து, காதை அடைத்து விடும். அதனால் காதின் கேட்கும் திறன் குறையும். அதுபோன்ற சமயங்களில் காது மருத்துவரை அணுகினால், அதிகப்படியான மெழுகை வெளியே எடுத்து சரிசெய்து விடுவார். சளி பிடிக்கும்பொழுது, காது அடைத்துக் கொள்ளும். ஈஸ்டேஷியன் குழாயில் சளி சென்று விடுவதால் இது நிகழ்கிறது. பல சமயங்களில் பூஞ்சை தொற்று  (Fungal Infection) காதில் ஏற்படும். காதில் நீர் செல்வதால் இது அதிக அளவு ஏற்படும் வாய்ப்பு உள்ளது. எனவே, காதில் நீர் போகும் நிலையில், அதை வெளியேற்றுவது நல்லது. காதில் எந்தத் தொல்லை ஏற்பட்டாலும், காது மருத்துவரிடம் செல்ல வேண்டுமே தவிர, நாமாக மருந்துக் கடைகளில் மருந்து வாங்கிப் பயன்படுத்துதல், கை வைத்தியம் செய்தல் போன்றவற்றைத் தவிர்த்தல் நலம். சிறு தொல்லைகள் ஏற்படும் பொழுதே மருத்துவ ஆலோசனை செய்து கொண்டால் செவிட்டுத் தன்மை ஏற்படாமல் தவிர்க்க முடியும்.

நாம் குழந்தையிடம் பேசுவதை காது கேளாமை நிலையிருப்பின், பதில் சொல்ல முடியாத நிலை ஏற்படும். அதனால் பேச்சு முழுமையாக பாதிக்கப்படும். குழந்தையிடம் “அம்மா’’, “அப்பா’’ என்று நாம் சொல்லச் சொல்ல, அது திருப்பி சொல்லப் பழகும். அப்படித்தான் குழந்தையிடம், பேச்சுப் பயிற்சி வளரும். வளர வளர குழந்தை நாம் பேசுவதைக் கேட்டு, சொற்களை அறிந்து பேசத் தொடங்கும். காது கேட்காத நிலையில் இந்தப் பயிற்சி முழுமையாகத் தடைப்பட்டு, ஊமையாக மாறும் ஆபத்து ஏற்பட்டுவிடும். அதனால்தான் காது கேட்காத குழந்தைகள், ஊமைகளாகவும் மாறி விடுகின்றனர். நாம் ஒலி எழுப்பும் திசையில் குழந்தை திரும்புகிறதா என்று ஓர் எளிய சோதனையிலேயே இதை அறிய முடியும். உடனே காது, மூக்கு, தொண்டை மருத்துவரிடம் ஆலோசனை பெற வேண்டும். மருத்துவர் கடத்தல் குறைபாடா, நரம்பியல் குறைபாடா என ஆய்ந்து அதற்கான மருத்துவம் செய்வார். பிறந்த பொழுது காது நன்றாகக் கேட்டு, பிற்பாடு செவிட்டுத்தன்மை உண்டாக பல காரணங்கள் உண்டு. முதுமை, அடிபடுதல், திடீரென ஏற்படும் பெரும் சத்தம், நோய்த் தொற்று, மூளைக் காய்ச்சல், அம்மை நோய், சிலவகை மருந்துகள், நீரிழிவு நோய் போன்றவற்றால் காது செவிடாகிவிடும் நிலை ஏற்படும். சில நோயாளிகளுக்கு ஒலி கடத்தல் குறைபாடும், நரம்புக் குறைபாடு இரண்டும் இணைந்த குறைபாடாக சிலருக்கு ஏற்படக் கூடும். எந்த வகைக் குறைபாடும், மருத்துவர் மூலமே அறிய முடியும். ஒலி கடத்தல் குறைபாடு எதனால் ஏற்படுகிறது என மருத்துவர் கண்டறிவார். பிறகு அதற்கான மருத்துவம் செய்வார். செவிப்பறையில் துளையிருந்தால் சரி செய்து கேட்கும் திறனை ஏற்படுத்துவார்.

நடுச்செவியில் உள்ள நுண்ணெலும்புகளான சுத்தி, பட்டை, லாட எலும்புகளில் குறைபாடு இருந்தால், குறைபாடுள்ள எலும்பை நீக்கி விட்டு, செயற்கைக் கருவியைப் பொருத்துவார். இதனால் ஒலி அதிர்வு, உட்செவிக்குப் பரவி காது கேட்க வைக்க முடியும். ஒலி கடத்தல் குறைபாடு முழுமையாகச் சரியாக்கி, செவிட்டுத் தன்மையை முற்றாக நீக்க முடியும். நரம்பியல் குறைபாடு உள்ளதா என்பதை சில எளிய சோதனைகள் மூலம் கண்டறிய முடியும். இந்தக் குறைபாடு உடையவர்களைச் சரியாக்கவே முடியாது என்கிற நிலை இருந்தது. ஆனால், இதற்கும் இன்று மருத்துவம் வந்துவிட்டது. நரம்புகள் நத்தைக் கூட்டு எலும்பில் துவங்குவதால், அந்த நரம்புகளில் குறைபாடு உண்டானால் காது கேளாமை நிலை ஏற்படும். தற்சமயம் நத்தைக் கூட்டு எலும்பில், செயற்கைக் கருவியை (Cochlear Implant) பொருத்தி, அதன் மூலம் காது கேட்க வைக்க முடியும். காது கேட்கும் நிலைமை குழந்தைகளுக்கு உண்டாக்கிய பின் ‘பேச்சுப் பயிற்சியாளர்’ மூலம் பேச்சுப் பயிற்சி கொடுக்க வேண்டும். அதைச் செய்வதன்மூலம் ‘செவிட்டு ஊமை’ தன்மையை முற்றாக நீக்க முடியும்.

                                                                    (தொடரும்)

 - உண்மை இதழ், 16-31.1.20

மருத்துவம் - விதி நம்பிக்கையை விலக்கிய அதி நவின மருத்துவங்கள்! (4)

முகத்தில் உண்டான பெரிய கட்டியை அகற்றி

விலா எலும்பைப் பொருத்தி முகத்தை சீராக்குதல்

முக அறுவை மருத்துவம்:

முக அறுவை மருத்துவம் இன்றைய மருத்துவ உலகின் புதிதாக வளர்ச்சி அடைந்து வரும் ஒரு துறையாகும். விபத்துகளால் ஏற்படும் முக எலும்புகள் முறிவு, முகத்தில் ஏற்படும் நீர்க்கட்டிகள், கட்டிகள், புற்றுநோய், முகத்தைச் சீரமைக்கும் மருத்துவம் ஆகிய மருத்துவங்கள் இத்துறை அறிஞர்களால் கையாளப்படுகின்றன. பிளவுண்ட அன்னம், பிளவுண்ட உதடுகள் இவர்களால் சீராக்கப்படுகின்றன. நம்மில் பலர் எலும்புகளிலோ, தாடையிலோ அடிபட்டால் எலும்பு மருத்துவர்களிடம் செல்லுகின்றனர். ஆனால், அவர்களும், முக அறுவை மருத்துவர்களிடம்  செல்ல அறிவுறுத்துவர் அல்லது அவர்களையே அழைத்து மருத்துவம் செய்வர். (BDS என்னும் பல் மருத்துவம் படித்து முடித்த பின், 3 ஆண்டுகள் MDS படிப்பு படிக்க வேண்டும்.) அடிபட்டு நகர்ந்துவிட்ட முக எலும்புகளால், முக இயக்கம் செயலற்று விடும். பற்களின் இணைப்பு நகர்ந்து விடும்.

அதனால் உணவு உண்ண முடியாத நிலை ஏற்படும். வலி, உதிரப் போக்கு, வீக்கம், முகத் தசைகள் செயலிழப்பு, உணர்விழப்பு ஆகியவை ஏற்படக் கூடும். உயிருக்கே ஆபத்து ஏற்படுகின்ற நிலை கூட சில நேரங்களில் ஏற்படக் கூடும். இதற்கு உடனடி மருத்துவத் தலையீடு தேவை. முக அறுவை மருத்துவர்கள் வாய் வழியேவோ, முகத்தின் வெளிப்புறத்திலோ அறுவை மருத்துவம் செய்து, அடிபட்ட எலும்புகளை இயல்பான நிலைக்கு நகர்த்தி, கம்பிகள் மூலமோ, உலோகத் தட்டுகள் மூலமோ அசையாமல் பொருத்தி விடுவர். 6 முதல் 8 வாரங்களில் எலும்புகள் நன்கு இணைந்து விடும். இரு சக்கர வாகனங்களில் பாதுகாப்புத் தலைக் கவசமின்றி, அதி வேகத்தில் செல்லும் நம் இளைஞர்களே சாலை விபத்துகளில் சிக்கி இதுபோன்ற பாதிப்புகளுக்கு ஆளாகின்றனர்.

ஒருபக்கமாகக் கோணிய முகத்தை கால் எலும்பு

பொருத்தி சீராக்குதல்

சில நேரங்களில் முகம் மட்டுமன்றி, தலை எலும்புகளும் உடைந்து உயிரே போகும் நிலையும் ஏற்படும். குழந்தைகள் ஓடி, விளையாடும்பொழுது, கீழே விழுந்து அடிபடுவது இயல்பான நிகழ்வாகும். சில நேரங்களில் கீழ் தாடையின், நாடியில் (முகவாய்கட்டை) அடிபட்டுவிடும். உடனே நாம் குழந்தையை மருத்துவரிடம் கொண்டு செல்வோம். அவரும் முதலுதவியும், மருத்துவமும் செய்து அனுப்பி விடுவார். ஆனால், இதில் உள் மறைந்துள்ள ஆபத்து ஒன்றுள்ளது. நம் கீழ்த் தாடையை, மண்டையோடு இணைக்கின்ற மூட்டுகளை ‘கீழ்தாடை மூட்டுகள்’ என்று குறிப்பிடுவர்.

இவை பக்கத்திற்கு ஒன்றாக, காதின் முன்புறம் அமைந்திருக்கும். காதின் முன்புறம், ஒரு விரலை வைத்து, வாயைத் திறந்தால் இந்த மூட்டு நகர்வதை நாம் அறிய முடியும். இந்த மூட்டில் அமைந்துள்ள குறுத்தெலும்புகள்தான் கீழ்த்தாடை வளர்ச்சியடைவதற்குக் காரணமான முக்கிய உறுப்புகள். குழந்தைகளுக்கு, நாடியில் அடிபடும் பொழுது, நாடி எலும்பு பருமனாக உள்ளதால், அங்கே முறிவு ஏற்படாது. ஆனால், மூட்டுகளுக்கு அந்த அழுத்தம் பரவி, குறுத்தெலும்புகள் உடைந்து, தூள் தூளாகி விடும். அந்த மூட்டுக் குழிகளில் இரத்தம் சேர்ந்துவிடும்.

சேர்ந்த இரத்தம், உறைந்து, நாளடைவில் நாரிழைகளால் மாற்றம் பெறும். பிறகு ஒரு சில மாதங்களில் இந்த நாரிழைகள், நார்த்திசுக்களாக உருமாற்றமடையும். நார்த் திசுக்களில் கால்சியம் போன்ற சத்துப் பொருள்கள் சேர்ந்து, சிறிது காலத்தில் முழு வளர்ச்சியடைந்த எலும்புகளாக உருப்பெறும். உருமாற்றம் பெற்ற எலும்புகள் அப்படியே மண்டையோடு இணைந்துவிடும். இதனால் கீழ்த்தாடையை தனியாக இயக்க முடியாத நிலை ஏற்படும். அதனால் வாய் திறக்க முடியாமல் போய்விடும். வாயைத் திறக்க முடியாததால் உணவு உண்ண முடியாமல், திரவ உணவு மட்டும் எடுக்கும்படியான நிலை உண்டாகும். கொட்டாவி விடுதல், பேசுதல், இருமுதல் போன்றவை வாயை மூடிக்கொண்டேதான் செய்ய முடியும். கீழ்த்தாடையின் வளர்ச்சி  மய்யங்கள் இந்த மூட்டுகளின் குறுத்தெலும்புகளில்தான் அமைந்திருக்கும். குறுத்தெலும்புகள் சிதை வடைவதால் கீழ்த்தாடையின் வளர்ச்சி முழுமையாகப் பாதிக்கப்படும். அதனால் முக அழகு பாதிக்கப்படும்.

இடுப்பெலும்பை முகத்தில் பொருத்தி பறவை(புறா) முகத்தை சீராக்குதல்

கீழ்த் தாடை வளராத நிலையில் உள்ள முகத்தை மருத்துவர்கள் “பறவை முகம்’’ (Birds Face) என்று குறிப்பிடுவர். காதின் முன்புறம், அறுவை மருத்துவம் செய்து, முக அறுவை மருத்துவர்கள் வாயைத் திறக்க வைப்பர். பின்பு உடலில் வேறு பகுதிகளிலிருந்து, எலும்பை எடுத்து, முகத்தில் தாடையில் பொருத்தி முகத்தை இயல்பாக்குவர். அறுவை மருத்துவம் மூலமே இக்குறை பாடுகளைச் சரியாக்க முடியும். குழந்தைகள் கீழே விழுந்து, நாடியில் அடிபட்டு விட்டால், அது வாய் சரியாகத் திறந்து, மூடுகிறதா என்பதை முக்கியமாகக்

கவனிக்க வேண்டும். இம்மூட்டெலும்புகளின் சிதைவும், விளைவுகளும், உடனடியாகத் தெரியாததால், ஒரு ஆண்டுக்காவது, குழந்தை வாய் திறப்பதையும், மூடுவதையும் கவனிக்க வேண்டும். அதில் ஏதாவது குறைபாடு இருப்பின், உடனே முக அறுவை மருத்துவரிடம் ஆலோசனை செய்ய வேண்டும். அதன் மூலம் எதிர்காலத்தில் ஏற்படும் ‘வாயிறுக்கம்’ போன்ற தொல்லைகளைத் தவிர்க்க முடியும்.

பற்கள் துருத்திக் கொண்டிருக்கும் மேல் நாடியை சிறிதாக்கி சீராக்குதல்

சில குழந்தைகள் இவ்வாறு பாதிக்கப்பட்டு, ‘பறவை முகம்’ போன்ற நிலைக்குச் சென்று விடும். பார்க்க அழகில்லாமல் இருப்பர். அவர்களை முக அறுவை மருத்துவரிடம் காட்டினால், அவர் ஓர் அறுவை மருத்துவம் செய்து முகத்தை இயல்பாக மாற்றிவிடுவார். உடலின் இடுப்பெலும்பு, விலா எலும்பு, கால் எலும்பு போன்றவற்றில் இருந்து ஒரு சிறு பகுதியை எடுத்து, முகத்தில் பொருத்தி முகத்தை அழகாக மாற்றி விடுவார். சிலருக்கு மேல் தாடையை விட, கீழ்த்தாடை பெரிதாக வளர்ந்து, பார்க்க அழகில்லாமல் அமைந்துவிடும். அவர்களுக்கும் தாடையின் நீளத்தைக் குறைத்து, இயல்பான வடிவத்திற்கு முக அறுவை மருத்துவத்தால் சீராக்க முடியும். சிலருக்கு எலும்புகளில் குறைபாடுகள் இல்லாமல் பற்களின் அமைப்பில் மட்டும் குறைபாடு இருக்கும். பல் சீரமைப்பு மருத்துவத்தின் மூலம் பற்களை நகர்த்தி அழகாக்க முடியும். முதியவர்களுக்கு, எல்லா பற்களும் இழந்துவிடும் சூழ்நிலை ஏற்படும். அவர்களுக்கு பல் மருத்துவர் செயற்கை பற்கள் பொருத்துவார். இவை கழட்டி, மாட்ட வேண்டியதாக இருக்கும். கீழ்த்தாடையில் பொருத்தும் செயற்கைப் பற்கள் இயல்பாக பயன்பாட்டிற்கு வர சிலருக்கு நீண்ட நாள்களாகி விடும். இந்தச் சிக்கலை மாற்ற இப்பொழுது வாயிலேயே இருக்கும்படியான செயற்கைப் பற்களைப் பொருத்தக்கூடிய முறைகள் வழமைக்கு வந்து விட்டன. “இம்ப்ளாண்ட்’’ என்கின்ற சிறிய பொருளை எலும்போடு பொருத்திவிடுவர். அதனோடு செயற்கை பற்களை இணைத்து விடுவர். இந்த வகை மருத்துவம் நோயாளிக்கு மிகவும் வசதியாக இருக்கும்.

முகத்தில் ஏற்பட்ட அழகற்ற வடுக்கள், அழகைக் குலைக்கும் புள்ளிகள், முகப்பருக்கள் போன்றவற்றை எளிதாகக் குணப்படுத்த முடியும். “கடவுள் முகத்தை அழகில்லாமல் படைத்துவிட்டான்’’ என்கின்ற கூற்றை பொய்யாக்கும் வகையில், முக அறுவை மருத்துவத்தால் முகத்தை அழகாக இன்று ‘கடவுள்’ நம்பிக்கைக்குச் சவால் விடும் நிலை எற்பட்டுள்ளது என்பது மருத்துவத் துறையின் சாதனையல்லவா!

குறிப்பு : மேற்கண்ட படங்களில் உள்ள நோயாளிகளுக்கு முக அறுவை மருத்துவம் முழுவதும் கட்டுரையாளரால் செய்யப்பட்டது.

மரு.இரா.கவுதமன்

(தொடரும்)

- உண்மை இதழ், 1-15.1.20

விதி நம்பிக்கையை விலக்கிய அதி நவீன மருத்துவங்கள்![3]

மருத்துவம் : விதி நம்பிக்கையை விலக்கிய அதி நவீன மருத்துவங்கள்![3]

- மரு.இரா.கவுதமன்

‘குழந்தையின்மை’ (Sterile) சமூகத்தில் பெரிய இழிவாகக் கருதப்படுகிறது. ‘கடவுளின் சாப’மே இந்நிலைக்குக் காரணமாகக் கூறப்பட்டது. இந்நிலைக்குக் காரணமாக ‘பெண்கள்’ முழுமையாக பழி தூற்றப்பட்டனர். ‘மலடி’ என்று ஆணாதிக்க சமூகம் அவர்களை குற்றம் சாட்டியது. இக்கொடுமைக்கு புகுந்த வீட்டுப் பெண்களும் உடந்தையாக இருந்தனர். பல பெண்கள் ‘வாழா வெட்டி’கள் என்கிற பட்டத்துடன் பிறந்த வீட்டிற்கு துரத்தப்பட்டனர். இதை சாக்காக வைத்து, ஆண்கள் மறுமணம் செய்து கொண்டனர். ‘மலடி’ என்று பெண்களை இழிவுபடுத்திய சமூகம் ‘மலடன்’ என்று ஆண்களை ஒரு போதும் குறை சொன்னதேயில்லை. ஏன், ‘மலடன்’ என்னும் சொல்லாடலே இல்லையே! பெண்களுக்கு ஏற்பட்ட இந்த இழிவை, இன்றைய மகப்பேறு மருத்துவம் எப்படி மாற்றியது என்று காண்போமா?

இன்றைக்கு பல இடங்களில் “கருத்தரிக்கும் மய்யம்’’ (Fertility Clinic Centre) என்று நீங்கள் பார்த்திருக்கலாம். ‘இனி வரும் உலகம்’ என்னும் நூலில், தந்தை பெரியார், “ஆண், பெண் உறவில்லாமலேயே’’ ‘குடுவையில்’ குழந்தை பிறக்கும் காலம் வரும் என்று கூறியதை நீங்கள் அறிவீர்கள். இனி ‘கருத்தரித்தல்’ எப்படி நிகழ்கிறது என்று பார்ப்போம். கரு உண்டாக ஆண் கருவும், பெண் கருவும் இணைந்தால்தான் ‘கரு’ உருவாகும். ஆண்கள் பருவம் அடையக் காரணமாக உடலில் ஒரு சுரப்பு சுரக்கும். அதற்கு ‘ஆண்ட்ரஜன்’ (Androgen) என்று பெயர். சிறுநீரகங்களின் மேல் சிறிய அவரை விதை வடிவில் அமைந்துள்ள ‘அட்ரினல் சுரப்பி’களே இந்த சுரப்புக்குக் காரணம். ‘ஆண்ட்ர்’ (Andr) என்றால் கிரேக்க மொழியில் ஆண் என்று பொருள். அதை அடிப்படையாகக் கொண்டே இந்தச் சொல்லாடல் வழக்கத்துக்கு வந்தது. ஆனால், பெண்களின் சினைப்பையிலும் (Overies) இந்தச் சுரப்பு சிறிதளவு சுரக்கிறது. இந்தச் சுரப்பின் காரணமாக, விதைகளில் ‘டெஸ்டோஸ்டிரான்’ (Testosterone) என்கிற சுரப்பு சுரக்கிறது. இதன் காரணமாகவே ஆண்கள் ‘வாலிப’ப் பருவத்தை அடைகின்றனர். குரல் உடைதல், உடலில் பல பகுதிகளிலும், முடி வளர்தல் (மீசை, தாடி போன்றவை), உயிரணுக்கள் உற்பத்தி, விந்து உற்பத்தி ஆகியவை இதன் காரணமாகவே ஏற்படுகிறது. இயல்பாக ஆண் உயிரணுக்கள் 20 மில்லியன் / மில்லி லிட்டர் முதல் 200 மில்லியன்/மில்லி லிட்டர் என்கிற அளவு இருத்தல் அவசியம். 15 மில்லியனைவிட, இது குறைவாக இருந்தால் ஆணால் கருவை உண்டாக்க முடியாது. அது மட்டுமின்றி, ஆண் கருவில் அமைப்பு குறைபாடு, இயக்கத்தில் குறைபாடு இருந்தாலும் ஆண் மலட்டுத்தன்மை ஏற்படும். விந்து உற்பத்தி குறைபாடும் இந்நிலைக்குக் காரணம். இயல்பு நிலையில் விந்து 1.5 முதல் 7.5 மில்லி லிட்டர் உற்பத்தி ஆக வேண்டும். ஆண் கருவின் இயக்கம் 40 முதல் 80 சதவிகிதம் இருத்தல் அவசியம். கருவின் அமைப்பு 40 சதவிகிதம் இயல்பாக இருக்க வேண்டும். மேற்சொன்னவற்றில் ஏதேனும் குறைபாடு இருந்தால் ஆண் மலட்டுத்தன்மை உண்டாகும்.

பெண்களுக்கு இதைப்போலவே, ‘ஈஸ்ட்ரோஜன்’ (Estrogen), ‘புரோஜெஸ்ட்ரான்’ (Progestron) ஆகிய இரண்டு வகை சுரப்புகளை, அவர்களின் சினைப்பைகள் (Ovaries) சுரக்கின்றன. பெண்கள், பருவமடைவதற்கும், மாதவிலக்கிற்கு ஆளாவதற்கும் இந்தச் சுரப்பிகளே காரணம். பெண்களின் உடலில் ஏற்படும் மாற்றங்களுக்கு ஈஸ்ட்ரஜன் சுரப்பே காரணம்.

கருத்தரித்தல் செயல்முறை

பெண்கள் பருவமடைவதற்கும், சினைப்பையில் பெண் கரு முட்டை உற்பத்தியாவதற்கும் இந்தச் சுரப்பே காரணம். இயல்பாக 10 வயது முதல் 12 வயதிற்குள் பெண்கள் பருவமடைவர். மேற்சொன்ன சுரப்புகளால் கருப்பையில் மாற்றங்கள் உருவாகும். கருவைத் தாங்கிப் பிடிக்கும் வகையில் கருப்பையின் உட்சுவர் மாறும். மாதவிலக்கு நடந்து 14ஆம் நாளில் வளர்ச்சியடைந்த பெண் கருமுட்டை கருப்பையை வந்தடைந்தால், ஆண் கருவோடு கலக்கின்ற வாய்ப்பு ஏற்பட்டால் “கருத்தரித்தல்’’ நிகழும். இல்லையெனில், மேலும் 14 நாள்களில் மாதவிலக்கு ஏற்படும். இதையே ‘மாதவிலக்கு சுழற்சி’(Periods) என்கிறோம். இந்தச் சுரப்புகளில் ஏதேனும் குறைபாடு ஏற்பட்டால் கருமுட்டை உற்பத்தி பாதிக்கப்படும். அதனால் கருவுறும் வாய்ப்பு ஏற்படாது. அதேபோல் கருமுட்டை செல்லும் வழி, கருக்குழாய் (Fellopian tubes)இல், ஏதேனும் அடைப்பு இருப்பின் கருமுட்டை, கருப்பையை அடைய முடியாது. இதுதவிர கருப்பையின் உட்சுவர் (Endometrium) குறைபாட்டுடன் இருந்தாலும் கருவுறுதல் பாதிக்கப்படும். இவையே பெண் மலட்டுத் தன்மைக்குக் காரணம். இந்தக் குறைபாடுக்குக் காரணம் தெரிந்தால், குறையை நீக்குவது எளிதல்லவா? இதைதான் “கருவுறுத்தல்’’ மய்யங்கள் செய்கின்றன. மலட்டு தன்மைக்கான மருத்துவத்திற்கு, மகப்பேறு மருத்துவர்களிடம் முன்பெல்லாம் பெண்களையே அனுப்பி வந்த காலம் மாறிவிட்டது. மருத்துவர்கள் கட்டாயம் கணவர்களையும் சோதிக்க வேண்டும் என கூறுவதால் இருவருமே ஆய்வுக்கு உட்படுத்தப்படுகின்றனர். குறை உள்ளவர் யாரென அறிந்து, அதற்கு, அவருக்கு மருத்துவம் செய்யப்படுகிறது. இதன் மூலம் மகப்பேறுக்கான வாய்ப்பு ஏற்படுகிறது. ஆண்களுக்கு ஆண் கரு உற்பத்தியிலோ, அமைப்பிலோ, எண்ணிக்கையிலோ, நகர்விலோ குறைபாடு ஏன் ஏற்படுகிறது என ஆய்வு நடத்தப்படுகிறது. பெரும்பான்மையான நேரங்களில் ‘டெஸ்டோஸ்டிரான்’ குறைபாட்டால்தான் ஏற்படும். அதை உடலில் செலுத்துவதால் இந்தக் குறைபாடு சரி செய்யப்படுகிறது. அதன் மூலம் கருவை உருவாக்கும் வாய்ப்பு ஏற்பட்டு மலட்டுத் தன்மை நீக்கப்படுகிறது. மகளிருக்கும் இதே போல் பரிசோதனைகள் மேற்கொள்ளப் படுகின்றன. சுரப்பு குறைபாடுகள் இருப்பின், அதனால் கருமுட்டை உற்பத்தி பாதிக்கப்படுகின்றதைக் கண்டறிந்து, அதற்கான மருந்துகளைச் செலுத்துவதன் மூலம், மாதவிலக்குச் சுழற்சி சீராக்கப்பட்டு, சினைப்பையில் தூண்டுதல் ஏற்படுத்தி சினை முட்டை (Ovum) உற்பத்தி சீராக்கப்படுகிறது. இதன் மூலம் ஆண் கருவுடன் சேர்தல் (Ovulation) இயல்பாக்கப் படுவதால், கருவுறுதல்(Fertilisation) நிகழ வாய்ப்பு ஏற்படுகிறது. முட்டை நகரும் கருக்குழாயில் சில காரணங்களால் அடைப்பு ஏற்படலாம். அதனால் கருமுட்டை கருப்பையை அடைய முடியாத நிலையுண்டாகும். முதலில் அந்தக் குழாய் அடைப்பை, சரி செய்ய முடிந்தால் அதை சரி செய்வார்கள். சரி செய்ய முடியாத நிலையில், கரு முட்டையை எடுத்து, சோதனைக் குழாயில் வைத்து, ஆண் கருவோடு கலந்து, சோதனைக் குழாயில் கருவுறுதல் நிகழ்ந்த பின், அந்தக் கருவை, கருப்பையில் செலுத்தி, கருவை நிலைநிறுத்தி, மகப்பேறு வாய்ப்பை உருவாக்குவார்கள். கருப்பையில் சரி செய்யப்படக்கூடிய கோளாறுகளும், சரி செய்யப்படுகின்றன. இதுபோன்று பன்முறை மருத்துவ முறைகளால் பெரும்பாலும் மலட்டுத் தன்மைகள் நீக்கப்படுகின்றன.

கடவுளால் படைக்கப்பட்ட அல்லது விதியால் உருவான கோளாறுகள் மருத்துவர்களால் சரி செய்யப்பட்டு மகப்பேறு ஏற்படும் நிலை உருவாகி உள்ளது. பெண்களை ‘மலடி’ என பழிகூறி, படுத்தி எடுத்த சமூக அவலங்களும் குறையத் தொடங்கியுள்ளன. குடும்பக் கட்டுப்பாட்டு முறைகளால், தேவையான அளவு குழந்தை பெற்றுக் கொள்ளவும், தேவையான நேரத்தில் பெற்றுக் கொள்ளவும் வாய்ப்பு ஏற்பட்டுள்ளதல்லவா?

(தொடரும்...)

- உண்மை இதழ் 16- 31 .12 .19

விதி நம்பிக்கையை விலக்கிய அதி நவீன மருத்துவங்கள்! [2]

மருத்துவம் : 

மரு.இரா.கவுதமன்

 கண் மருத்துவம்

நம் உடல் உறுப்புகளில் கண்கள்தான் பார்வை மூலம் வெளியுலகு தொடர்பை ஏற்படுத்துகிறது. பார்வையின்மை மிகவும் கொடுமையானது. ‘கண்புரை நோய்’ முதியர்களுக்கும், ‘கண் அழுத்த நோய்’ அனைத்து வயதினர்க்கும் குருடாக்கி விடும் தன்மை கொண்டவை. லேசர் ஒளிக்கற்றை மருத்துவம், கண் மருத்துவத்துறையில் பெரிய புரட்சியையே உண்டாக்கியுள்ளது. கோடிக்கணக்கில் நோயாளிகள் இம்மருத்துவத்தால் குருடாகாமல் தப்பியுள்ளனர்.

கண் புரை நோய்:

இதை நோய் என்பதைவிட, முதுமையினால் கண்ணில் ஏற்படும் இயல்பான மாற்றம் என்பதே சரியானதாகும். முதுமையில் வளர்சிதை மாற்றங்களால், விழி லென்ஸில் நாரிழைகள் படர்வதால் பார்வை மங்கும். இதுஅதிகமாகும்பொழுது ஒளி, விழி லென்ஸ் வழியே ஊடுருவது தடைப்படும். அதனால் குருடாகக் கூடிய நிலை உண்டாகும். முன்பெல்லாம், நாரிழை மூடிய விழிலென்ஸ்களை நீக்கிவிடுவர். மொத்தையான கண்ணாடியை நோயாளிகளுக்கு வழங்குவர். இயல்பாக நமக்கு ‘இருவிழிப் பார்வை’(Binocular Vision) இருக்கும். ஆனால், விழிலென்ஸ் நீக்கப்பட்ட இந்நோயாளிக்கு குழாய்ப் பார்வை (Tubular Vision) தான் இருக்கும். இவர்கள் மொத்தையான கண்ணாடிகளுடன், தட்டுத்தடுமாறித்தான் இயங்குவர். இவற்றைப் போக்குவதற்கான ஆய்வின் காரணமாகக் கண்டுபிடிக்கப்பட்டதே ‘உள்விழிலென்ஸ்’ (Intra ocular lens). இந்த லென்ஸைப் பொருத்துவதுதான் நலம். இருவிழிப் பார்வை நோயாளிகள் பெறும் வாய்ப்பு ஏற்பட்டது.

ஆரம்பக் கட்டங்களில் சிறிய மரப்பு ஊசியைக் கண்ணில் செலுத்தி இந்த அறுவை மருத்துவம் செய்யப்பட்டது. சற்று கடினமாக இருந்த இந்த செயற்கை லென்ஸ்கள், இன்று மிகவும் மெல்லியதாக, மென்மையானதாகச் செய்யப்படுகின்றன. இதன் மூலம் மிகவும் எளிமையாக இவை கண்களில் பொருத்தப்படுகின்றன. லேசர் கண்டுபிடிப்பு, இந்த அறுவை மருத்துவத்திற்குப் பயன்படுகிறது. லேசர் மூலம் செய்யப்படுவதால் தற்பொழுது கண்களில் ஊசி போடாமலே இந்த அறுவை மருத்துவம் மேற்கொள்ளப்படுகிறது. ஏறத்தாழ பத்தே நிமிடங்களில் மருத்துவம் முடிவடைந்து விடும். முன்பு இந்த அறுவை மருத்துவம் செய்து கொண்டவர்களுக்கு, கண்ணை மறைக்க துணியாலான ஓர் உறையைக் கொடுப்பர். நோயாளி படிக்கவும், தொலைக்காட்சி பார்க்கவும், தலைக்கு குளிப்பதற்கும் தடை என, பல கட்டுப்பாடுகள் இருக்கும். ஆனால், லேசர் மருத்துவத்தால் பார்வை பெற்றவர்கள் ஒரு சில மணிகளிலே இயல்பு வாழ்க்கைக்குத் திரும்ப முடியும். கண்களில் சொட்டு மருந்துகள் மட்டும் தவறாமல் சில நாள்கள் பயன்படுத்த வேண்டும்.

இதன் செய்முறையைப் பார்ப்போமா? கண்களில் மரப்பு சொட்டு மருந்தை விட்ட உடன் கண்கள் மரத்துவிடும். பின் லேசர் ஊசி (மிகவும் மெல்லியது) மூலம் விழிக் கரும்படலம் (Cornea) வழியே செலுத்தி, விழி லென்ஸை அடைவர். லேசர் மூலமே நூலிழைகளால் அடைப்பட்ட லென்ஸை சிறு துகள்களாக உடைத்து, அதை வெளியேற்றிவிட்டு, புதிய மென்மையான லென்ஸை அந்த இடத்தில் பொருத்தி விடுவர். தையல் எல்லாம் கிடையாது. மிகவும் எளிமையாகவும், விரைவாகவும் செய்யப்படும் இந்த அறுவை மருத்துவத்தால் கோடிக்கணக்கில் கண்பார்வை பெற்றுள்ளனர்.

கண் அழுத்த நோய்(Glaucoma) :

நம் கண்களில் நீர் சுரப்பு தொடர்ச்சியாக இருந்து கொண்டே இருக்கும். கண்களின் உட்பகுதிகளில் சுரக்கும் இந்த நீர் தொடர்ச்சியாக ஒரு வலைப்பின்னல்  (Trabacular meshwork) வழியே கண்ணில் உள்ள அய்ரிஸ்(IRIS) சதையும், விழிக் கரும்படலம் இணையும் இடத்தில் உள்ள கோண வழியே வெளியேறும். இப்படி வெளியேறும் நீர்தான் கண்களைப் பாதுகாக்கின்றன. இயல்பாக கண்கள் உள்ளே சுரக்கும் நீரின் அளவும், வெளியேறும் அளவும் சமமாக இருக்கும். அப்படி இருக்கும் நிலையில் உள் கண் (நீரின்) அழுத்தம் 12 முதல் 22 mm/Hg என்கிற அளவில் இருக்கும். வெளியேறும் நீரின் அளவு தடைப்பட்டால், இந்தச் சமநிலை பாதிக்கப்படும். உள் கண்ணில் ஏற்படும் சுரப்பு குறையாமல் இருக்கும் நிலையில், வெளியேறும் நீரின் அளவு குறைந்தால், உள் கண்ணில் நீரின் அளவு அதிகரிக்கும். இதனால் உள் கண் அழுத்தம் இயல்பான அளவை (22 mm/Hg) விட அதிகரிக்கும். அழுத்தம் மிகவும் அதிகரிக்கும்பொழுது கண் நரம்புகள் அழுத்தப்படும். மூளைக்குச் செல்லும் நரம்புகள் அழுத்தப்படுவதால், பார்க்கும் உணர்வு மூளைக்குச் செல்லாமல் தடுக்கப்பட்டு விடும். இதனால் திடீரென கண் பார்வை இழக்கும் நிலை ஏற்படலாம். கண் அழுத்த நோயால் பார்வை போனால் மீண்டும் எந்த மருத்துவத்தாலும் பார்வை வராது. பெரும்பாலும் 60 வயதிற்கு மேல் இந்நோய் வந்தாலும், எந்த வயதிலும் இந்நோய் வரலாம். அதிக இரத்த அழுத்தம் உள்ளவர்களுக்கு இந்நோய் வர வாய்ப்புகள் அதிகம். இந்நோய்  ‘திறந்த கோண கண் அழுத்த நோய்’  (Open Angle Glaucoma) எனவும், ‘மூடிய கோண கண் அழுத்த நோய்’  (Angle Closure Glaucoma) எனவும் இரண்டு வகைப்படும். திறந்த கோண கண் அழுத்த நோயில் அய்ரிஸ் சதையும், கருவிழி இணையும் கோணமும் திறந்திருக்கும். ஆனால், வலைப்பின்னலில் அடைப்பு உண்டாகி இருக்கும். மூடிய கோண அழுத்த நோயில் அய்ரிஸ் சதைக்கும், கருவிழிக்கும் உள்ள கோண இடைவெளியே அடைபட்டிருக்கும்.

நோயின் அறிகுறிகள்: பல நேரங்களில் கண் பார்வை போனாலும் சில நேரங்களில் முன் அறிகுறிகள்கூட தோன்றக் கூடும். ஆரம்ப நிலையிலேயே நோயைக் கண்டறிந்தால் பார்வையிழப்பு ஏற்படுவதை முழுமையாகத் தவிர்க்கலாம்.

திறந்த கோண கண் அழுத்த நோய்: சிறிய, சிறிய கரும்புள்ளிகள் பார்க்கும்பொழுது தோன்றுதல், கண்ணின் நடுவிலோ, சுற்றியோ இது தோன்றலாம். அழுத்தம் அதிகமாகும்பொழுது “குழாய்ப் பார்வை’’ ஏற்படும்.

மூடிய கோண கண் அழுத்த நோய்: கடுமையான தலைவலி, கண்ணில் வலி, குமட்டல், வாந்தி, மங்கலான பார்வை, கண்கள் சிவத்தல், விளக்கைச் சுற்றி ஒளி வட்டம் ஆகியவை தோன்றும். இரண்டு வகை நோய்களிலும் உடனடியாகவோ, மெதுவாகவோ பார்வை இழப்பு ஏற்படும்.

மருத்துவம்: தொடர் கண் பரிசோதனை மூலம் உள்கண் அழுத்தத்தைக் கண்டறிய முடியும். ஆரம்ப நிலையில் சொட்டு மருந்துகள் மூலம் நோயை கட்டுக்குள் வைக்கலாம். ஆனால், இந்த மருந்துகளை அறிகுறிகள் இல்லாவிடிலும் தொடர்ச்சியாகப் பயன்படுத்த வேண்டும். லேசர் ஒளிக்கற்றைகளைக் கொண்டு கருவிழிகளில் துளையிடும் மருத்துவத்தில் நீர் வெளியேற வழி ஏற்படுத்துவர். திறந்த கோண அழுத்த நோயில் இது பயனளிக்கும். சில நேரங்களில் அறுவை மருத்துவத்தால் இந்நோய் குணமடைய வைப்பர். ஏதாகிலும் ஆரம்ப நிலையில் கண்டறிந்து, மருத்துவம் செய்தால் பலன் உண்டு.

இதேபோல் விழித்திரை பாதிப்பு, மாறுகண், கண் கட்டிகள், கண் நரம்புக் கோளாறுகள் போன்றவை லேசர் மருத்துவம் மூலம் சரியாக்கப்படுகின்றன. கடவுள் சாபத்தால் உண்டானதாக நம்பப்பட்ட “மாறுகண்’’ (Squint),  பார்வை இழப்பு மருத்துவத்தால் சீரானதல்லவா?

(தொடரும்..)

- உண்மை இதழ் 1- 15. 12.19

விதி நம்பிக்கையை விலக்கிய அதி நவீன மருத்துவங்கள்![1]

மருத்துவம் : 

மரு.இரா.கவுதமன்

மருத்துவர் இரா.கவுதமன் சிறந்த பகுத்தறிவாளர். ‘மருத்துவமும் மூடநம்பிக்கையும்’ என்னும் தலைப்பில் உண்மையில் தொடர் கட்டுரை எழுதியவர். தனது மருத்துவ அறிவை துல்லியமாகப் பயன்படுத்தி பல பயனுள்ள மருத்துவச் செய்திகளை இத்தொடர் மூலம் வழங்கியுள்ளார். படித்து பயன் பெறுங்கள்; பகுத்தறிவும் பெறுங்கள்.         

     (ஆசிரியர்)

அறிமுகம்: இன்றைய மருத்துவம், பல புதிய பரிணாமங்களுடன் வெற்றி நடைபெறுகிறது. சுமார் 60 ஆண்டுகளுக்கு முன்பு சராசரியாக 30 ஆண்டுகளாக இருந்த நமது வயதும், வாழ்க்கையும் இன்று 60 ஆண்டுகளாக மாறியது எப்படி? கடவுளின் அருளாளா? விதி வசத்தாலா? மாயத்தாலா? மாந்திரீகத்தாலா? சிந்தியுங்கள்! மருத்துவத்தின் மகத்தான வளர்ச்சியன்றோ இந்த மாற்றத்திற்குக் காரணம். இம்மாற்றங்கள் செய்த மருத்துவப் புரட்சியை உங்களோடு பகிர்ந்து கொள்வதில் பெருமகிழ்வடைகிறேன். இனி கட்டுரைக்குச் செல்வோமா?

பக்கவாதம்:

நம் மூளைதான் நம் உடலின் தலைமைச் செயலகம். நம் உடலின் இயக்கத்தை நரம்பு மண்டலம் மூலம் முழுமையான கட்டுப் பாட்டில் வைத்திருப்பது நம் மூளைதான். மூளை சரியாக இயங்க வேண்டுமானால் தடையில்லாமல் இரத்த ஓட்டம் நிகழ வேண்டும். மூன்று நிமிடங்களுக்கு மேல் இரத்த ஓட்டம் தடைபட்டால் மூளையில் உள்ள திசுக்கள் மரணமடைந்துவிடும். அந்தப் பகுதியிலிருந்து வரும் நரம்புகளும் செயலிழந்து விடும். செயலிழந்த நரம்புகள் செல்லு மிடங்களில் உள்ள திசுக்களும் செயலிழந்து விடும். நம் உடலில் வலப் பக்க இயக்கத்திற்கான மய்யம், மூளையின் இடப் பக்கத்திலும், இடப் பக்க இயக்க மய்யம் வலப் பக்கமும் அமைந்திருக்கும். வலக்கைப் பழக்கம் உடையவர்களுக்கு ‘பேச்சு மய்யம்’ (Speech Centre) இடப் பக்கமும், இடக்கைப் பழக்கம் உடையவர்களுக்கு, இது வலப் பக்கமும் அமைந்திருக்கும். பெரு மூளைக்குச் செல்லும் இரத்தக் குழாய்களில் செல்லும் இரத்த ஓட்டம் தடைபட்டால், எந்தப் பகுதிக்குச் செல்லும் குழாய்களில் பாதிப்பு ஏற்படுகிறதோ அதற்கு எதிர்ப்புறம் உடல் செயலிழந்துவிடும். இதையே ‘பக்கவாதம்’ (Paralysis) என்கிறோம். வலக் கைப் பழக்கக்காரர்களுக்கு, இடப்பக்கம் பாதிக்கப்பட்டால் ‘பேச்சு மய்யமும்’ பாதிக்கப்படும். அதனால் பேச முடியாத நிலை ஏற்படும்.

நீரிழிவு நோய் (Diabetes), மிகு இரத்த அழுத்தம் (Hypertension) ஆகிய நோய்கள் நீண்ட நாள்கள் இருப்பின், நம் இரத்த குழாய்களின் உட்சுவர்களில் மாவுப் பொருள்களோ  (Carbohydrates), உப்புப் பொருள்களோ படிந்து விடும். இதனால் இரத்தக் குழாய்கள் கடினத் தன்மை அடைந்துவிடும். மேற்கண்ட நோய்களைக் கட்டுப்படுத்தாவிட்டால், இந்தப் படிவங்கள் அதிகமாகி, இரத்தக் குழாய்கள் குறுக்களவு சுருங்கிவிடும். அதனால் இரத்த ஓட்டம் குறைந்துவிடும். இதன் காரணமாக ஏற்கெனவே ‘மிகு இரத்த அழுத்தம்’ உள்ளவர்களுக்கு இரத்த அழுத்தம் மேலும் அதிகரிக்கும். அதிக அளவு அழுத்தத்தோடு, குறுகிய பாதை வழியாக இரத்தம் செல்லும்பொழுது, இரத்தக் குழாய்களின் பக்கச் சுவர்களில் படிந்துள்ள பொருள்கள் பிய்த்துக்கொண்டு, இரத்த ஓட்டத்தோடு செல்லும். மூளையின், பெருமூளை இரத்தக் குழாய்கள் பல இடங்களில் மிகச் சிறியதாக இருக்கும். பிய்த்துக் கொண்டு வரும், படிவம் அதைவிட சிறிய அளவு குழாய்க்கு வரும்பொழுது, குழாயை அடைத்துவிடும். அதனால் அந்த மூளைப் பகுதிக்குச் செல்லும் இரத்தம் திடீரென தடைபடும்.

இதை ‘பெருமூளை குழாய் அடைப்பு’ (Cerebral Thrombosis) என்று குறிப்பிடுவர். இரத்த ஓட்டம் நின்ற இடத்தில் இருந்து செல்லும் நரம்பு மண்டலம் முழுமையாகச் செயலிழக்கும். சில நேரங்களில் இரத்த அழுத்தம் மிக அதிகமாகும்பொழுது பெருமூளையின் சிறிய இரத்தக் குழாய்கள் கிழிந்துவிடும் நிலைகூட ஏற்படலாம் (Cerebral Haemorrage). இதனால் மூளைக்குச் செல்லும் இரத்த ஓட்டம் பாதிப்படையும். மேற்சொன்ன காரணங்களால், மூளையின் இரத்த ஓட்டம் பாதிக்கப்பட்டு அதன் விளைவாக, உடலின் செயலிழக்கும் தன்மையையே ‘பக்கவாதம்’ என்கிறோம். முன்பெல்லாம், மூளை, தண்டுவட நீரை (Cerebro-Spinal Fluid), முதுகிலிருந்து எடுத்து பரிசோதிப்பதன் மூலம், மூளை இரத்தக் குழாயில் அடைப்புள்ளதா, அல்லது குழாய் கிழிந்து இரத்தம் வெளியேறுகிறதா என்று கண்டறிவர். ஆனால், இப்பொழுது CT ஸ்கேன், MRI ஸ்கேன் மூலம் எந்த இரத்தக் குழாய் பாதித்துள்ளது என்று துல்லியமாகக் கண்டறிவர். முன்பெல்லாம் குழாய் அடைப்பை அதிகமாகாமல் தடுக்கும் மருந்துகளைத் தருவதன் மூலம், நோயைக் கட்டுப்படுத்துவர். ஆனாலும், செயலிழந்த பகுதியைச் சரி செய்ய முடியாது. பயிற்சி மருத்துவம்  (Physiotherapy) செய்வதன் மூலம், நோயாளிக்கு ஓரளவு இயக்கத்தை கொடுக்க முடியும். ஆனால், இரத்தக் குழாய் கிழிந்து, இரத்தம் வெளியேறும் நிலை ஏற்பட்டால் பெரும்பாலும் மரணமே நிகழும். ஆனால் இன்று! ஆரம்ப அறிகுறிகள் தெரியும்பொழுதே, நரம்பியல் மருத்துவர்களிடம் சென்றால் இந்நோய் முழுமையாகக் குணமடைய முடியும். ஆரம்ப அறிகுறிகள் தோன்றி 5 மணி நேரம் மிகவும் இன்றியமையா நேரம். உடனே மருத்துவமனைக்குச் சென்றால், பரிசோதனைகள், மருத்துவம் செய்து நோயாளியை முழுமையாகச் சரி செய்ய முடியும். சரி! ஆரம்ப அறிகுறிகள் என்ன? பார்ப்போம்!

*          பேச்சு தடைபடும். குழப்பம் ஏற்படும். பேச்சு தடுமாறி, குழம்பிய நிலையில் இருக்கும். புரிதல் குறையும்.

*           முகம், கை, கால், உடலின் ஒரு பகுதி மதமதப்புடன், உணர்விழத்தல், செயல் இழக்கும். இரண்டு கைகளையும் தலைக்கு மேல் உயர்த்த முயன்றால், செயலிழந்த பகுதியில் கையை உயர்த்த முடியாது. புன்னகை செய்ய முயன்றால் வாய் கோணிவிடும்.

*          ஒரு கண்ணில் பார்வை தடைபடும். கண் இமைகள் தானாகவே மூடி பார்வையிட முடியாத நிலை உண்டாகும்.

*             தலைவலி, வாந்தி, தலைசுற்றல், மயக்கம் ஏற்படும்.

*           நடை முழுமையாக பாதிக்கப்படும். கால் சதைகள் பாதிக்கப்படுவதால் முழுமையாக நிற்கவோ, நடக்கவோ இயலாது.

இவையே ஆரம்ப அறிகுறிகள். இந்த அறிகுறிகள் தெரிந்தால் உடனடியாக மருத்துவமனைக்கு நோயாளியைக் கொண்டு செல்ல வேண்டும்.  ஒவ்வொரு நிமிடமும் முக்கியமானது. நேரம் கூடக் கூட மூளையில் பாதிப்பு அதிகமாகிக் கொண்டே இருக்கும். நேரம் அதிகரிக்க, ஆபத்தும் அதிகம். பாதிப்பும் அதிகம். அதனால் உடனடி நடவடிக்கையும், எச்சரிக்கையும் கட்டாய தேவை. ஏறக்குறைய 80 சதம் பக்கவாதம் இரத்தக் குழாய் அடைப்பினால்தான் நிகழ்கிறது. முன்பெல்லாம் அடைப்பை கரைக்கும் மருந்துகளும், பயிற்சி மருத்துவமும் நோயைக் கட்டுப்படுத்தவும், நோயாளிக்கு ஓரளவு இயக்கமும் கொடுக்க உதவின. ஆனால், இன்றோ, நோயை முழுமையாகக் குணப்படுத்துகின்றனர். மூளைக்குச் செல்லும் முக்கிய இரத்தக் குழாய், கேரோட்டிட் தமனி (Carotid Artery) யில் ஏற்பட்டுள்ள அடைப்புகளை ஒரு சிறிய அறுவை மருத்துவம் செய்து, இரத்தக் குழாயில் படிந்துள்ள, படிவுகளை அகற்றுவர். ஆனால், மூளைப் பகுதியில் இந்த மருத்துவம் செய்வது கடினம். காலிலோ அல்லது கையிலோ உள்ள இரத்தக் குழாய் வழியே ஒரு சிறிய ‘துளைக்குழாயை’ (Catheter) செலுத்துவர். அக்குழாய் மூளையை அடைந்ததும், ஒரு நிறமியை  (Dye) செலுத்துவர். அது மூளையில் பரவும் நிலையில், அடைப்பா அல்லது கசிவா என்று முதலில் கண்டுபிடிப்பர். அடைப்பாக இருப்பின், அது கரைய மருந்துகளை அதே குழாய் மூலம் செலுத்துவர். அதன் மூலம் அடைப்பு நீக்கப்பட்டு, மீண்டும் பாதிக்கப்பட்ட மூளைப் பகுதிக்கு இரத்த ஓட்டம் துவங்கும். அடைப்பு மீண்டும் ஏற்படாமல் தடுக்கும் வகையில், ‘ஸ்டென்ட்’ (Stent) என்னும் சுருள் கம்பியை அந்த இடத்தில் அதே குழாய் வழியே பொருத்தி விடுவர்  (Angio-Plasty). இதன் மூலம் அடைப்பு மீண்டும் வராமல் தடுக்கப்படும். அதே போல் இரத்தக் குழாய் கிழிந்து இரத்தக் கசிவு என்று கண்டறிந்தால், அதே குழாய் வழியே கசிவைத் தடுக்கும் மருந்துகளை உட்செலுத்தி, கசிவை கட்டுக்குள் கொண்டு வருவர். இதன் மூலம் அதிகளவு மூளைத் திசுக்கள் சிதைவை முழுமையாகத் தடுத்து விடுவர். பிறகு ஒரு சில மாதங்கள் பயிற்சி மருத்துவம் செய்வதன் மூலம் ஓரளவு நோயாளி இயல்பு வாழ்க்கைக்குத் திரும்ப முடியும். இம்மருத்துவ முறை பக்கவாத நோய் மருத்துவத்தில் ஒரு பெரிய புரட்சியையே ஏற்படுத்திவிட்டது என்றால் மிகையாகாது.

(தொடரும்...)

 - உண்மை இதழ் 16- 30 .11 .19

உயிர் காக்கும் உப்பு, சர்க்கரைக் கரைசல்

நாம் பருகும் ஓஆர்எஸ் கரைசலில் சோடியம் குளோரைடு - 2.6 கிராமும், பொட்டாசியம் குளோரைடு - 1.5 கிராமும், ட்ரைசோடியம் - 2.9 கிராமும் உள்ளதாக மருத்துவ ஆய்வு வல்லுநர்கள் கூறுகின்றனர்.

பருகுபவர்களுக்கு எந்தவிதமான கெடுதலையும் உண்டாக்காதது ஓஆர்எஸ்; இது மருந்துக் கடைகளிலும், மருத்துவமனைகளிலும் கிடைக்கும். தூய்மையான முறையில் இந்த உப்பு மற்றும் சர்க்கரைக் கரைசலை நாமே தயாரிக்கலாம். ஓஆர்எஸ் தயாரிக்க 1 லிட்டர் சுத்தமான தண்ணீர், சர்க்கரை 6 தேக்கரண்டி (ஒரு தேக்கரண்டி - ஐந்து கிராம்), உப்பு அரை தேக்கரண்டி இந்த மூன்றையும் நன்றாகச் சுத்தம் செய்யப்பட்ட பாத்திரத்தில் ஒன்றாகப் போட்டுக் கலந்தால் ஓஆர்எஸ் கரைசல் தயார்.

நமது நாட்டில் 5 வயதுக்கு உள்பட்ட குழந்தைகளில் 10 விழுக்காடு வயிற்றுப் போக்கால் உயிரிழப்பதாக ஒரு புள்ளி விவரம் தெரிவிக்கிறது. கை கழுவாமல் சாப்பிடுதல், நோய்களைப் பரப்பும் ஈ, கொசுக்கள் ஆகியவை மொய்த்த சுகாதாரமற்ற தின்பண்டங்களை உண்ணுதல், அசுத்தமான நீரைக் குடித்தல் போன்றவை உயிரிழப்புக்கு வழிவகுக்கும் வயிற்றுப் போக்குக்குக் காரணமாக அமைகின்றன. வயிற்றுப் போக்கால் உயிரிழப்பதைக் தடுக்க Oral Rehydration Solution (ORS) எனச் சுருக்கமாகக் குறிப்பிடப்படுகிற உப்பு நீர் மற்றும் சர்க்கரைக் கரைசல்.

குழந்தைகளைப் போன்றே முதுமைப் பருவத்தினருக்கும் ஓஆர்எஸ் கரைசல் அவசியம். வயிற்றுப்போக்கு காரணமாக, நீர்சத்து வெளியேறி துன்பப்படும் சிறுவர், சிறுமியருக்கு உடனடியாக சிகிச்சை தரப்படுவது முக்கியமாகும். ஏனெனில், இவர்கள் நீர்ச்சத்தைச் சீக்கிரமாகவே இழந்துவிடுவார்கள். குழந்தைகளுக்கு அவர்களுடைய உடல் எடை அடிப்படையில் இக்கரைசலைக் கொடுப்பது நல்லதென குழந்தை நல மருத்துவர்கள் பரிந்துரைக்கின்றனர். உதாரணத்துக்கு 10 கிலோ உடல் எடை கொண்ட ஒரு குழந்தைக்கு 100 மில்லி கிராம் தரலாம். ஒருவேளை அதில் குணமாகவில்லை என்றால் குழந்தைகள் நல மருத்துவர் ஆலோசனைப்படி இரண்டாம் கட்ட சிகிச்சையாக ஆன்டிபயாடிக் தரலாம்.

உப்பு, சர்க்கரை கரைசல் மற்றும் துத்தநாக (Zinc) மாத்திரைகள் வயிற்றுப் போக்கைத் தடுக்க வல்லன. வயிற்றுப் போக்கால் அவதிப்படுபவர்கள் ஓஆர்எஸ் கரைசலைப் பயன்படுத்தும்போது அளவு விஷயத்தில் மிகவும் கவனமாக இருக்க வேண்டும். ஏனென்றால் மிதமிஞ்சிய சர்க்கரை, நீர்ச்சத்து வெளியேற்றத்தை அதிகரிக்கும். அதிக உப்பால் குழந்தைகள் பாதிப்புக்கு உள்ளாவார்கள். அசுத்தமான நீரில் உப்பு மற்றும் சர்க்கரைக் கரைசலைத் தயாரித்து உபயோகிப்பதால், அதனால் கிடைக்க வேண்டிய பலன்கள் எதுவும் நமக்குக் கிடைக்காது. இக்கரைசலைப் பாதிக்கப்பட்டவர்களுக்குத் தரும் முன் நன்றாகக் கொதிக்க வைத்து அல்லது பலமுறை வடிகட்டித் தருவது எதிர்பார்த்த பலன்களை நமக்குக் கிடைக்கச் செய்யும்.

பொதுவாக மனித உடலில், 60 விழுக்காடும், குழந்தைகள் உடலில் 70 விழுக்காடும் தண்ணீர் காணப்படுகின்றது. நீரிழப்பைத் தொடக்க நிலையிலேயே, கண்டறிந்து ஓஆர்எஸ் கரைசலை எடுத்துக்கொண்டால், இதனைக் கட்டுப்படுத்த முடியும்.

வயிற்றுப்போக்கால் அவதிப்படுகிற குழந்தைகளுக்குத் தாய்ப்பால் கொடுப்பதை எந்தக் காரணத்துக்காகவும் நிறுத்தக் கூடாது. ஏனென்றால், தாய்ப்பாலில் நோய் எதிர்ப்பு சக்தி அதிகளவில் காணப்படுகிறது. தாய்ப்பால் கொடுப்பதோடு, எளிதில் செரிக்கக்கூடிய ஆவியில் வேகவைத்த இட்லி, இடியாப்பம் போன்றவற்றையும் அவர்களுக்குத் தரலாம். நாம் உட்கொள்ளும் உணவில் இருக்கிற நார்ச்சத்து மலம் கழிப்பதைத் துரிதப்படுத்தும். எனவே, வயிற்றுப் போக்கால் அவதிப்படும் காலக்கட்டங்களில் நார்ச்சத்து அதிகம் உள்ள உணவுகளைச் சேர்க்காமல் இருப்பது பாதுகாப்பானது. மாதுளை, ஆப்பிள் முதலான பழவகைகளை உண்பது எதிர்பார்க்கும் பலனைத் தரும்.

-உண்மை இதழ், ஆகஸ்ட், 1 -15 .2019

மருத்துவம் : விதி நம்பிக்கையை விலக்கிய அதி நவீன மருத்துவங்கள்! (11)

மரு.இரா.கவுதமன்

இதயத்தமனி (அடைப்பு) நோய் (coronary artery disease)

மாரடைப்பு (Heart Attack)

நாம் ஏற்கெனவே குறிப்பிட்டபடி, கருவுற்ற எட்டாவது வாரத்தில் இதயம் இரண்டு குழாய்களாக அமைந்து, பிறகு நான்கு அறை கொண்ட இதயமாக மாறுகிறது. அப்பொழுதே துடிக்க துவங்கும் இதயம், நம் மரணம் வரை இடைவிடாது துடித்துக் கொண்டே இருக்கிறது.

இதயம்தான் கருவில் உருவாகும் முதல் உறுப்பு. ஆரம்பத்தில் நிமிடத்திற்கு 120 முதல் 160 வரை இதயம் துடிக்கும், பேறு காலத்தில் துடிப்பு நிமிடத்திற்கு 130 ஆக இருக்கும்.

பின் குழந்தை வளர, வளர நிமிடத்திற்கு 72 முறை துடிப்பாக மாறி நிலை கொள்ளும். இயல்பான நிலையில் நிமிடத்திற்கு 72 முறை,  X ஒரு மணிக்கு 72 X 60 முறை, ஒரு நாளைக்கு 72 X 60 X 24 என்று நாம் வாழும் காலம் முழுதும் இதயம் இயங்கிக் கொண்டே இருக்கும்.

சுருங்கி, விரியும் தன்மையையே நாம் இதயத் துடிப்பாக உணர்கிறோம். அவ்வாறு இடைவிடாமல் இதயம் இயங்க வேண்டுமானால் அதற்கு தேவையான சக்தி இடைவிடாமல் கிடைத்துக் கொண்டே இருக்க வேண்டும். அந்த சக்தி இடைவிடாமல் கிடைக்க வேண்டுமானால் இதயத்திற்கு இரத்த ஓட்டம் தடையின்றி கிடைத்துக் கொண்டே இருக்க வேண்டும். தங்குத் தடையின்றி (ஒரு நிமிடம் கூட நில்லாமல்) கிடைக்கும் இரத்தம் மூலமே இதய இதயத்திற்கு தேவையான உயிர்க்காற்றும் (ஆக்ஸிஜன்), சத்தும் கிடைக்கிறது. அப்படி நில்லாமல் கிடைக்கும் இரத்த ஓட்டம் இதயத் தமனி (coronary Artery) மூலமே, இதயத்திற்கு கிடைக்கிறது.

இதயத் தமனிகள் (Coronary Arteries):

மகாதமனி (Aorta) (இடது வெண்டிரிக்கள், left ventricle) இடது கீழறையிலிருந்து வெளியேறும் இடத்தில், இதயத் தமனி பிரிகிறது. பிரிகின்ற இதயத் தமனிதான் முழு இதயத்திற்கும் தேவையான இரத்த ஓட்டத்தை கொடுக்கிறது.

மகாதமனியிலிருந்து பிரியும் இதயத்தமனி மேலும் இரண்டு பெரிய பிரிவுகளாக பிரிகிறது. இடது பெரும் இதயத் தமனி (left main coronary artery (also called left main track) வயது பெரும் இதயத் தமனி (right coronary artery - RCA) என்று இரு பிரிவுகளாக பிரிந்து இதயத்தின் இடது, வலது புறங்களுக்கு இரத்த ஓட்டத்தை ஏற்படுத்துகிறது. இடது பெரும் இதயத்தமனி மேலும் இரண்டாக பிரிகிறது. இதயச் சுற்றுத் தமனி (circumflex artery) இடது முன் கீழிறக்கத் தமனி (left anterior descending artery - LAD) என்று இரண்டாகப் பிரிகிறது.

சுற்றுத் தமனி, இடது மேலறை, இடது கீழறையின் (Left Ventricle) பக்கவாட்டிற்கும், பின் பகுதிக்கும் இரத்தம் கொண்டு செல்கிறது. முன் கீழறக்கத் தமனி, இடது கீழறையின் முன்புறம், கீழ்புறம், கீழறைகளின் இடைச்சுவர் ஆகிய பகுதிகளுக்கு இரத்தத்தை கொண்டு செல்கிறது. வலது பெரும் இதயத் தமனி (Right Coronary Artery - RCA) வலது ஓரத் தமனி  (Right Marginal Artery), பின் கீழறக்கத் தமனி (Posterior Descending Artery) என்று இரண்டு பிரிவாக பிரிந்து வலது மேலறை, வலது கீழறை, கீழறைகளின் அடிப்பகுதி, இடைச்சுவர்களின் (Septcem) பின்புறம் ஆகிய பகுதிகளுக்கு இரத்தத்தை செலுத்துகிறது. இந்த பிரிகின்ற தமனிகள் எல்லாம் ஒரு வலைப்பின்னல் போல் அமைந்து, இதயத்தின் அனைத்துப் பகுதிகளுக்கும் இரத்த ஓட்டத்தை, இடைவிடாமல் கிடைக்கச் செய்கின்றன.

துணைத் தமனிகள் (Collateral Vessels):

இவை இதயத்தில் அமைந்துள்ள சிறிய தந்துகிகள் (tiny blood vessels - capillaries) ஆகும். இதயம் இயல்பாக செயல்படும் பொழுது, இவை மூடி இருக்கும். இதயத்தமனி சுருக்க நோயில், இவை விரிந்து, இதயத்திற்கு தேவையான இரத்தத்தை செலுத்தத் துவங்கும். அதனால் இதய இயக்கத்திற்கு தேவையான இரத்தம் கிடைக்கும். இதனால் மாரடைப்பு தவிர்க்கப்படும். இனி இதயத் தமனி நோய்களை பார்ப்போம்.

இதயத் தமனி இரத்த ஓட்டக் குறைபாடு (Ischemia) : இதயத் தமனி வழியே இதயத்திற்கு தேவையான இரத்தம் குறைவின்றி தொடர்ந்து சென்று கொண்டே இருக்க வேண்டும். ஏதேனும் காரணமாக இரத்த ஓட்டம் குறைந்தால், இதயத்திற்கு தேவையான உயிர் காற்றும் (Oxygen) சத்தும் கிடைக்காமல் போகும். அதனால் இதயம் நின்று விடும் நிலை ஏற்படும். இதையே “மாரடைப்பு’’ (Heart Attack) என்று கூறுகிறோம். மிகவும் ஆபத்தமான நிலை இது. உடனடியாக மருத்துவம் செய்யாவிடில் மரணம் நிகழக் கூடிய நிலை ஏற்படும். இனி இது எப்படி நிகழுகிறது எனப் பார்ப்போம்.

மாரடைப்பு (Heart Attack): மிகவும் ஆபத்தான இந்நோய் எதிர்பாராமல் ஏற்படும். இதயத்திற்கு செல்கின்ற இரத்த ஓட்டம் திடீரென தடைபடுவதால் இதயம் துடிக்காமல் நின்று விடும். இதயம் செயல்படுவது நின்று போவதால் மூளை போன்ற முக்கிய உறுப்புகளுக்கும் இரத்தம் செலுத்த முடியாத நிலை ஏற்படும். அதனால் உடல் உறுப்புகள் அனைத்தும் செயல்படாமல் நின்று விடும். நோயாளி மரணமடைந்து விடுவார்.

“சற்று முன் கூட பேசிக் கொண்டிருந்தாரே, திடீரென்று சாய்ந்து விட்டார், இறந்து விட்டார்’’ என்றெல்லாம் பல முறை நாம் கேட்டுள்ளோம். இதுபோன்ற நிகழ்வுகளுக்கு பெரும்பாலும் காரணமாக இருப்பது இந்நோயேயாகும். மிகவும் அதிகளவில் மரணம் நிகழ்த்த கூடிய நோய் இது. ஆனால் இந்நோயை கண்டறிவதும், மருத்துவம் செய்வதும் முழுமையாக இந்நோயிலிருந்து நோயாளிகளை மீட்டு, நீண்ட வாழ்வு வாழ வகை செய்யலாம் இந்தியாவில் இந்நோயினால் வருடத்திற்கு ஒரு கோடி மக்கள் பாதிக்கப்படுகிறார்கள். இந்நோய்க்கான காரணங்களை பார்ப்போம்.

“நிலையான மார்பு வலி’’, “நிலையற்ற மார்பு வலி’’ மற்றும் மாரடைப்பு ஏற்பட வாய்ப்புள்ள நோயாளிகள் மிகவும் எச்சரிக்கையாக இருக்க வேண்டும். அவர்கள் சட்டைப் பையில் கீழ்கண்ட 3 மாத்திரைகளை வைத்திருக்க வேண்டும். அவர்கள் புழங்குமிடங்களில் (படுக்கையறை, உணவு உண்ணும் அறை போன்ற இடங்களில்) கைக்கு உடனே எடுக்கும்படியாகவும் இம்மாத்திரைகளை வைத்திருத்தல் நலம் பயக்கும். லேசானா நெஞ்சு வலி ஏற்பட்டாலும் உடனடியாக செய்கின்ற வேலையை, நிறுத்திவிட்டு (நடைப்பயிற்சி செய்து கொண்டிருந்தாலும்) உடனடியாக அருகில் ஓர் இடத்தில் அமைதியாக அமர வேண்டும். படுக்கை இருந்தால் படுத்துக் கொள்ள வேண்டும் உடனடியாக மாத்திரைகளை சாப்பிட வேண்டும். மருத்துவமனைக்கு செல்ல, அனைத்து முயற்சிகளையும் கைக்கொள்ள வேண்டும். தனியாக இருக்கும்பொழுது மார்பு வலி வந்தால், ஆழ்ந்து மூச்சித்திழுத்து, இரும வேண்டும். நெஞ்சுப் பகுதியை கைகளால் பிசைந்து கொடுக்க வேண்டும். மாத்திரைகளையும் உடனடியாக சாப்பிட வேண்டும்.

மார்பு வலியேற்படும் பொழுது உண்ண வேண்டிய மாத்திரைகள்:

ஆஸ்பிரின் 75 mg. (Aspirin 75 mg)

(இம்மருந்து இரத்தம் உறைதலை தடுக்கும்)

எனலார்பில் (Enalarpil - Vaootec)

(இம்மருந்து இரத்தக் குழாய்களை விரித்து கொடுக்கும். அதனால் இரத்த ஓட்டம் அதிக அளவு இதயத்திற்கு செல்லும்.)

ஐசாட்ரில் 5 (Isodril 5)

(இம்மருந்தை நாக்கின் கீழ் வைத்துக் கொள்ள வேண்டும். இதயத் தமனிகளை விரித்து அதிகளவு இரத்தம் இதயத்திற்கு செல்ல வழிவகுக்கும், மருந்து இது.)

 (தொடரும்...)

- உண்மை இதழ் ஜூன் 16 -  ஜூலை 15 .2020