மருத்துவம்: விதி நம்பிக்கையை விலக்கிய அதி நவீன மருத்துவங்கள்! (22) இரைப்பை அழற்சி (GASTRITIS)

Home -> Unmaionline -> 2021 -> ஜனவரி 16-31, 2021 -> 

மருத்துவம்: விதி நம்பிக்கையை விலக்கிய அதி நவீன மருத்துவங்கள்! (22)

 

 

 

 

 

இரைப்பை அழற்சி (GASTRITIS)

மரு.இரா.கவுதமன்

‘இரைப்பை அழற்சி’ (Gastritis) மிகவும் அதிக அளவில் காணப்படும் ஓர் நோய். இந்தியாவில் ஆண்டுக்கு 10 லட்சம் பேர் இந்நோயால் பாதிக்கப்படுகின்றனர். பொதுவாக இரைப்பை அழற்சி பல காரணங்களால் ஏற்படும். இரைப்பைச் சுவர்களில் ஏற்படும் அழற்சியையே (Inflammation of the lining of the stomach) இந்நோய்க்குக் காரணம். இரைப்பைப் புண்கள் ஏற்படக் காரணமான நுண்கிருமிகளே இரைப்பை சுவர் அழற்சிக்குக் காரணிகளாக பெரும்பாலும் உள்ளன. வலி மாத்திரைகள் நீண்ட நாள்கள் பயன்படுத்துதல், மதுப் பழக்கம் போன்றவை இந்நோயை ஏற்படுத்தும். இரைப்பை அழற்சி சிலருக்கு திடீரென ஏற்படலாம். (Acute Gastritis) அல்லது லேசான வயிற்று வலியாகத் துவங்கி, கொஞ்சம் கொஞ்சமாக நாள்பட அதிகமாகலாம் (Chronic Gastritis). சரியான மருத்துவம் உரிய நேரத்தில் செய்யாவிடில், நாளடைவில் இரைப்பையில் புண்கள் ஏற்படும் நிலையிலும் அதுவே பிற்பாடு இரப்பைப் புற்று நோயாகி (Stomach Cancerஷீ) மாறும் நிலைகூட ஏற்படலாம். ஆரம்ப நிலை மருத்துவம் இந்நோயை முழுமையாகக் குணப்படுத்தும். புறக்கணிக்கப்பட்ட அறிகுறிகளும், சரியான மருத்துவம் செய்யாமையுமே நோயை, ஆபத்தான நிலைக்குக் கொண்டு செல்லுமே ஒழிய, பெரும்பாலும் ஆரம்ப நிலையில் எளிதாகவும், முழுமையாகவும் இந்நோயைக் குணப்படுத்த முடியும். இனி இந்நோயைப் பற்றிப் பார்ப்போம்.

நோய்க்கூறு: (Pathogenesis): இரைப்பை அழற்சி, இரைப்பைச் சுவரில் ஏற்படும் மாற்றமேயாகும். இரைப்பைச் சுவரில் ஏற்படும் காயங்களோ (Injury), அல்லது தளர்ச்சியோ (Weakness) அழற்சியை ஏற்படுத்தும். நிறைய காரணங்களாலும், சில வகை நோய்களும் அழற்சியை ஏற்படுத்தும். குரோன் நோய் (Crohn’s Disease), இணைப்புத் திசுப் புற்றுநோய் (Sarcoidosis) போன்றவை இரைப்பை அழற்சியை ஏற்படுத்தும்.

காரணிகள்:

¨           மன அழுத்தம், இரைப்பை அழற்சிக்கு ஓர் முக்கியமான காரணி.

¨           பெரிய அறுவை மருத்துவம், அடிபடுதல், தீக்காயங்கள், நோய்த் தொற்று இவற்றால் ஏற்படும் மன அழுத்தம்.

¨           புகைபிடித்தல்

¨           தன்னுடல் தாக்கு நோய் (Auto-immune Disease) இதை தன்னுடல் “தாக்கு இரைப்பை அழற்சி’’ (Auto immune gastritis) என்று மருத்துவர்கள் குறிப்பிடுவர்.

¨           நம் உடலில் உள்ள உயிரணுக்கள் (cells), இரைப்பையின் சுவர்களில் உள்ள “புறணி’’ (Lining) களைத் தாக்கும். இரைப்பையின் பாதுகாப்பு வளையம் (Protective Barrier) இதனால் பாதிக்கப்பட்டு, இரைப்பை அழற்சி ஏற்படும்.

¨           வேறு வகையான தன்னுடல் தாக்கு நோய்கள் இருப்பினும், அவை இரைப்பை அழற்சியைத் தூண்டி விடும். எடுத்துக்காட்டாக, “ஹெஸிமோட்டோ’’ (Hashimotto disease) நோய், நீரிழிவு நோய் (ஒன்றாம் வகை) (Type 1 Diabetes Mallitus), வைட்டமின் பி12 குறைபாடு (Vitamin B12 deficiency) ஆகியவை இரைப்பை அழற்சியை தூண்டிவிடும்.

¨           மனிதநோய் எதிர்ப்பு குறைபாடு (AIDS) நோய், குரோன்ஸ் (Crohn’s disease), ஒட்டுண்ணி நோய்த் தொற்று (Parasitic Infection) ஆகிய நோய்களும் இரைப்பை அழற்சியை ஏற்படுத்தும் தன்மையுடையவை.

¨           மதுப்பழக்கம்: மது, இரைப்பையின் உட்சுவரை அரிக்கும் தன்மை உடையது. இதனால் இரைப்பையில் சுரக்கும் நொதியங்கள் (Enzymes), இரைப்பையின் வெளிச்சுவர்களில் உள்ள சவ்வுப் படலத்தை (Mucasa) சிதைக்கும். அதனால் ஹைட்ரோ குளோரிக் அமிலம் நேரடியாக இரைப்பைச் சுவரில் படிந்து, இரைப்பை அழற்சியை ஏற்படுத்தும்.

¨           முதுமை (Old age) யில் இரைப்பைச் சுவர் வழமையை விட மெலிந்து விடும். சுவர்களின் பாதுகாப்பு அரண் மெலிந்து விடும். அதனால் எளிதாக எச்.பைலோரி (H. Pylori) என்கிற நோய்த் தொற்று ஏற்படும் நிலை ஏற்படும். முதுமையில் தன்னுடல் தாக்குநோய்களும் எளிதாக வரும் நிலையில் உள்ளதால் இரைப்பை அழற்சி எளிதில் ஏற்படும்.

¨           நோய்த் தொற்று: “ஹெலிகோபேக்டர் பைலோரி’’ (Helicobacter Pylori - H. Pylori) என்ற நுண்கிருமிகள் இரைப்பைச் சுவர்களில் படிவதால், அவை இரைப்பை அழற்சியை ஏற்படுத்தும் நிலை உண்டாகும். இந்நோய்த் தொற்று இரைப்பையிலும், உணவுப் பாதையிலும் பெரும்பாலோருக்கு இருந்தாலும், இரைப்பை அழற்சியை ஒரு சிலருக்கே உண்டாக்கும் தன்மை உடையதாக உள்ளது.

¨           உணவு (Diet): அதிகக் காரமான உணவு, மிக அதிகச் சூடாக தண்ணீர், தேநீர், காஃபி குடிப்பவர்களுக்கு நாளடைவில் இரைப்பையின் பாதுகாப்புத் திசுக்கள் சிதைந்து, அழற்சியை உண்டாக்கும்.

¨           வலி குறைப்பு மருந்துகள்: வலி குறைப்பு மருந்துகளை நீண்ட காலம் பயன்படுத்துபவர்கள் இந்நோயைப் பெறும் வாய்ப்பு அதிகம். இதயத் தமனி அடைப்பு நோய், வேறு இரத்தக் குழாய் அடைப்பு நோய்களுக்கு பயன்படுத்தும் “ஆஸ்பிரின்’’ (Aspirin), புரூஃபன் (Brufen), நேப்ரோக்ஸின் (Naproxin) போன்ற மருந்துகளும், ஸ்டீராய்டு, கலவாத அழற்சி எதிர்வினை மருந்துகள் (Non Steroid anti-inflammatory - NSAID) ஆகியவற்றின் நீண்ட காலப் பயன்பாடு, இரைப்பை அழற்சியை ஏற்படுத்தும்.

அறிகுறிகள்: நோயின் அடிப்படை அறிகுறிகள்:

*          மேல் வயிற்றில் மார்பு எலும்புக்குக் (Sternum) கீழ் வலி ஏற்படுதல்.

*          அடிக்கடி ஏப்பம்.

*          புளித்த ஏப்பம்.

*          நெஞ்சு எரிச்சல்.

*          வயிற்றுப் பகுதியில் எரிச்சல்.

*          வலி உணவு உண்ட பின் சரியாகி விடும்.

*          குமட்டல்.

*          வாந்தி.

*          உணவிற்குப் பின் ஏற்படும் வலி வாந்தி எடுத்த பின்பே சரியாகும்.

*          மேல் வயிற்றில் (Epigastirc) உண்டாகும் வலி, வயிற்றுப் பகுதி முழுவதும் பரவும்.

*          குறைந்த அளவு உணவு உண்டாலே வயிறு நிறைந்தது போன்ற உணர்வு.

*          நோய் அதிகமாகும் பொழுது, இடைவிடாத வலி.

*          இரைப்பையில் புண் ஏற்பட்டுவிட்டால், இரத்த வாந்தி ஏற்படும்.

*          மலம் கருப்பாக (இரத்தம் கலந்து) வெளியேறுதல்.

*          நோய் அதிகமாகும்போது இரைப்பைப் புண்ணாக மாறும் நிலை ஏற்பட்டால் அறிகுறிகள் மேலும் தீவிரமாகும்.

*          புற்று நோயாக மாறினால் அறிகுறிகள் அளவிறந்த தொல்லையாக நோயாளிக்கு உண்டாகும்.

*          உணவு உட்கொள்ள முடியாது.

*          நாள்பட்ட நோய் அருகில் உள்ள உறுப்புகளுக்குப் பரவும்.

                தாங்க முடியாத வலி

*          உடல் மெலிவு

*          பசியின்மை

*          நிமிரக்கூட முடியாத நிலை

*          முடிவாக மரணத்தையும் எதிர்கொள்ளல்.

(தொடரும்)

இரைப்பை, உணவுக்குழாய் பின்னோட்ட நோய் - நவீன மருத்துவங்கள்! (20)

-மரு இரா.கவுதமன்

இரைப்பையும் (Stomach), உணவுக் குழாயும் (Esophagus), நம் உணவு மண்டலத்தின் ஆரம்ப நிலை உறுப்புகளாகும். வாயின் உள்புறம், தொண்டையின் முடிவில் துவங்கி, வயிற்றில் முடியும் உணவுக் குழாய் 10 அங்குலம் (25 செ.மீ) நீளமுடையது. மூச்சுக்குழாய்க்கும், வயிற்றையும் பிரிக்கும் இடைத் தசைச் சுவரின் (Diaphragm - உதரவிதானம்) இடைவெளியின் வழியாகக் (Hiatus) கீழிறங்கி இரைப்பையோடு இணையும். தசைகளால் ஆன இக்குழாய், சுருக்கு தசை (Sphincter) யால் மூடப்பட்டிருக்கும். கீழ்நோக்கி அசையும் அடைப்பிதழ்கள் (Valves)) போல் இது செயல்படும். இதனால் இரைப்பைக்குச் செல்லும் உணவு, மீண்டும் உணவுக் குழாய்க்கு செல்லாது தடுக்கப்படும்.

இரைப்பை, ‘J’ வடிவில் அமைந்துள்ள, தசைகளால் ஆன பை. உணவுக்குழாய், இரைப்பையோடு இணைந்துள்ளதுபோல், இரைப்பை, சிறு குடலின் மேல் பகுதியான மேல்சிறு குடலுடன் இணைந்திருக்கும். (Duodenum) இரைப்பை அளவு உணவு கொள்வதற்கு ஏற்ப மாறுதல் அடைவதால், சரியாகக் கணிக்க முடியாது. இரைப்பையின், உணவுக் குழாய் தொடர்ச்சியில், உள்ளதுபோலவே, மேற்சிறு குடலின் இணைப்பிலும், சுருக்குத் தசைகள் அமைந்திருக்கும். இரைப்பையின் உள் சுவரில், கண்ணுக்குத் தெரியாத, நுண்ணிய நீர்ச் சுரப்பிகள் உள்ளன. எண்ணிக்கை அளவில், இவை 4,00,000 அளவு இருக்கும்.
இவை முதன்மைச் சுரப்பிகள் (Chief Secretory Cells), என்றும், சுவர்ச் சுரப்பிகள் (Parietal Secretory Cells) என்றும் இரண்டு வகைப்படும். முதன்மைச் சுரப்பிகள், நொதியங்களையும், சுவர்ச் சுரப்பிகள், ஹைட்ரோ குளோரிக் அமிலத்தையும் சுரக்கக் கூடியவை. நொதியங்களில், பெப்சின், ரெனின் (Pepsin, Renin) முதன்மையானவை. இரைப்பை இரு வளைவுகளைக் கொண்டது. அவை சிறிய மற்றும் பெரிய வளைவுகளாகும்.

மூன்று பாகங்களைக் கொண்டது. அடிக்குழி (Fundus) உடல் (Body), குடல்வாய்க்குழி (Autrun) என்று மூன்று பகுதிகளாகப் பிரிக்கப்பட்டிருக்கும். இரைப்பை, மேல் சிறு குடலுடன் இணையும் பகுதியில் அமைந்துள்ள சுருக்கு தசைகள், மேல் சிறு குடல் வழியே இரைப்பையிலிருந்து வெளியேறும் உணவின் அளவைக் கட்டுப்படுத்தும். இரைப்பையின் உள் சுவரில் ஏராளமான மடிப்புகள் இருக்கும்.

இவை ரூகே (Rugae) மடிப்புகள் எனப்படும். இரைப்பையில் உணவு சேரும்பொழுது, சுவர்கள் மேலும் விரிந்து அதிக அளவு உணவைக் கொள்ளும். இரைப்பையின் உட்சுவர் உள்ளே சதைப் பகுதி, சுரப்பிகள், வெளியே சவ்வுப் படலம் (Mucousa) ) ஆகியவையால் அமைக்கப்பட்டிருக்கும். உடல் பகுதியில் சுரக்கும் ஹைட்ரோகுளோரிக் அமிலம் ஆக்ஸின்டிக் (Oxyntic) உயிரணுக்களால் சுரக்கப்படுகின்றன. இந்த அமிலத்தால் உட்சுவரில் பாதிப்படையாமல் இருக்க சவ்வுப்படலம் பாதுகாப்பை வழங்கும். உடற்பகுதியில்தான் இந்த உயிரணுக்கள் (அமிலத்தைச் சுரப்பவை) அமைந்திருக்கும்.

அடிப் பகுதியில் பெப்சின், ரெனின் சுரப்பிகள் உள்ளன. நொதியங்கள் (Enzymes) செயல்பாட்டிற்கு ஹைட்ரோகுளோரிக் அமிலம் உதவுகிறது பெப்சின், ரெனின் சுரப்பிகள் உணவு செரிமானத்திற்கு உதவுகின்றன.

இரைப்பை, உணவுக்குழாய் பின்னோட்ட நோய் (Gastro esophageal reflux disease): இது ஒரு நீண்ட கால நோயாகும். இதன்போது இரைப்பையில் இருந்து, உணவுக் குழாய்க்கு இரைப்பைச் சுரப்புகள், உணவுகள் மேல் நோக்கித் தள்ளப்படும். (புளித்த ஏப்பம்). உணவுக் குழாய், இரைப்பை இணையும் இடத்தில் உள்ள சுருக்குத் தசைகள் இளகுவதால் இந்த நிலை உருவாகிறது. இரைப்பைச் சுவரில் உள்ள ஹைட்ரோகுளோரிக் அமிலமும் உணவுடன் சேர்ந்து உணவுக் குழாய்க்குள் வரும். அதனால் அங்கு அமைந்துள்ள சவ்வுப் படலம் பாதிக்கப்படும். இதனால் உணவுக்குழாய் அழற்சி ஏற்படும்.
வாரத்திற்கு இரண்டு முறைக்கு மேல் புளி ஏப்பம் ஏற்பட்டால், இந்நோயின் அறிகுறியாகக் கொள்ளலாம். தேசிய நீரிழிவு, செரிமானம், சிறுநீரக நோய்கள் நிறுவனம், அமெரிக்காவில் 20 சதவிகிதம் மக்கள் இந்நோயால் பாதிக்கப்பட்டுள்ளதாகக் கூறுகிறது. ஏழ்மையும், வறுமையும் கல்வியின்மையும் ஒருபுறம், ஏராளமான கொழுப்புள்ள உணவுகள் எடுத்தல், உடற்பயிற்சியின்மை, ஒரே இடத்தில் அமர்ந்து வேலை செய்தல் போன்றவையும் நம் நாட்டு மக்களிடையே அதிகம் ஏற்டக் காரணமாகின்றது.

அறிகுறிகள்:
நெஞ்சுப் பகுதியில் ஒருவிதமான சங்கடம்.
நெஞ்சு எரிச்சல்.

இந்தச் சங்கடமும், எரிச்சலும் கழுத்துப் பகுதிக்கும் பரவும்.
பொதுவாக இதை இதய எரிச்சல் (Heart burn) எனக் கூறுவர்.
வாயின் உட்புறம் காரம், கசப்பு உணர்வு தோன்றும்.

சில நேரங்களில் புளிப்புச் சுவையோடு கூடிய உணவு வாய் வரையில் வந்து செல்லும்.

சில பொழுதுகளில் உணவு விழுங்குவதில் இடைஞ்சல் ஏற்படும்.
சிலருக்கு மூச்சுத் திணறல் ஏற்படவும் கூடும்.

தொடர் இருமலால்கூட நோயாளி பாதிப்படையும் நிலையும் சில நேரங்களில் ஏற்படும்.

ஆஸ்துமா போன்ற நோய்கள்கூட பின்விளைவாக வரும்.

சரியாக மருத்துவம் செய்யாவிட்டால் நோய் ஆபத்தை உண்டாக்கும் நிலையும் ஏற்படும்.

உணவு இரைப்பையில் இருந்தாலும், இல்லாவிட்டாலும் அடிக்கடி ஏப்பம் வரும். இரைப்பைக் காற்று இயல்பாக அடிக்கடி ஏப்பமாக மாறி வெளியேறுவதை உணவுக்குழாய் சுருக்குத் தசை தடுத்து விடும். அத்தசை இலகுவாகி விடுவதால்தான் இந்நிலை.

சில நேரங்களில் ஏப்பமாகக் காற்று வெளியேறிவிட்டால், அது வெளியேறும் வரை, மூச்சுத்திணறல் கூட ஏற்படும்.
(தொடரும்...)

- உண்மை இதழ், 16- 31 .12 .20

நாள்பட்ட நுரையீரல் அடைப்பு நோய் (Chronic Obstructive Pulmonary Disease)

மருத்துவம் : விதி நம்பிக்கையை விலக்கிய அதி நவீன மருத்துவங்கள்! [19] - 

மரு.இரா.கவுதமன்

 

 

நோயின் அறிகுறிகள்:

¨           இருமல், தொடர்ச்சியான இருமல், வறட்டு இருமலாகவும் (Dry Cough), சளியோடு கூடிய இருமலாகவும் இருக்கக் கூடும்.

¨           சளி அதிகமாக தொண்டையிலும், நுரையீரலிலும் சேரும். சளி, தொண்டையிலும், மூச்சுக் குழலிலும் சேரும்பொழுது, உயிர் மூச்சுக் காற்று நுரையீரலுக்குள் செல்வதற்கு, இடைஞ்சல் உண்டாகும்.

¨           உயிர் மூச்சுக் காற்று (ஆக்சிஜன்) முழு அளவு உள்ளே செல்லாததால் மூச்சிரைப்பு ஏற்படும். இதை “காற்றுப் பசி’’ (Air Hunger) எனக் குறிப்பிடுவர்.

¨           மூச்சிரைப்பு அடுத்த நிலையில் ‘மூச்சுத் திணறலாக’ உருவெடுக்கும்.

¨           உயிர்மூச்சுக் காற்றின் தேவை அதிகரிப்பதால், ”குறுகிய வேகமான மூச்சு’’ (Rapid Breathing) உண்டாகிறது.

¨           காற்று பற்றாக்குறையை சரி செய்ய முடியாத நிலையில நோயாளி ஆழ் மயக்க நிலைக்குச் (Coma) சென்று விடுவார்.

¨           ஆஸ்த்மா என்ற மூச்சிரைப்பு நோயிலும், இதே அறிகுறிகள் இருக்கும். நோயறிகுறிகளை எளிதாகக் கட்டுப்படுத்த முடியும். ஆனால், நுரையீரல் அடைப்பு நோயில் அவ்வாறு கட்டுப்படுத்த முடியாது.

¨           நாள்பட்ட மூச்சிரைப்பு நோயில், நுரையீரல் திசுக்கள் அழிந்து விடுவதால், அவை மீண்டும் சீரடைவதில்லை என்ற நிலை ஏற்படுவதால், அவற்றின் அறிகுறிகள் எளிதில் சீராக்க முடியாத நிலை ஏற்பட்டு, மேலும், மேலும் நோய் முற்றி, முடிவில் நோயாளி மரணமடைந்து விடுவார்.

¨           ஏற்கெனவே இந்நோயால் பாதிக்கப்படுபவர்கள், புகைப்பிடிக்கும் பழக்கத்தைக் கைக் கொண்டிருந்தால் அது மேலும் மிகுந்த பாதிப்பை ஏற்படுத்தும்.

¨           தூசு, காற்றின் மாசு, வேதியியல் வாயு போன்றவையும், இதேபோன்று ஏற்கெனவே பாதித்து, அழிந்த நுரையீரல் திசுக்களை மேலும் அழிவு நிலைக்கே கொண்டு செல்லும்.

¨           ஓரளவு கட்டுக்குள் இருக்கும் நுரையீரல் அடைப்பு நோய், சில நேரங்களில், திடீரென அதிக அளவு மூச்சுத் திணறலை உண்டாக்கும். இதை “தீவிர நோய் தாக்குதல்’’ (Acute exacerebation) என்று குறிப்பிடுவர். இது பெரும்பாலும், நோய்த்தொற்று, காற்று மாசடைந்த இடத்திற்கு திடீரெனச் செல்வதால் ஏற்படுகிறது.

நோய் அறிதல்: (ஆய்வுகள்)

¨           ஊடு கதிர் நிழற்படம் (X-Ray): நுரையீரல் அடைப்பு நோய், நுரையீரலில் உண்டாக்கிய பாதிப்பை இதன் மூலம் அறிய முடியும்.

¨           நுரையீரல் செயல்பாட்டுச் சோதனைகள் (Lung Function Tests): நுரையீரலின் செயல்பாடுகள் இச்சோதனைகளால் அறிய முடியும்.

¨           நுரையீரலின் காற்றுக் கொள்ளளவு, நுரையீரலில் நிகழும் வாயு பறிமாற்றம் முதலியவற்றை இச்சோதனைகள் தெளிவாகக் காட்டும்.

¨           இச்சோதனைகள் சாதாரண நுரையீரல் அடைப்பா அல்லது அடைப்புடன் கூடிய இடைத் திசு காற்றுப் பரவல் (Emphysema) நோயா என்பதையும் இச்சோதனைகள் தெளிவுபடுத்தும்.

¨           கணினி அச்சு வரைவு: (CT-Computerised Tomography) மூலம் நுரையீரல் திசு அழிவினை துல்லியமாக அறிய முடியும்.

¨           காந்த அதிர்வு அலை வரவு: (Magnetic Resonance Imaging - MRI) இச்சோதனை மூலமும் நுரையீரல் திசுக்கள் எவ்வளவு அழிந்துள்ளன என்பதைத் துல்லியமாக அறிய முடியும்.

மருத்துவம்:

முதலில் நோய்க் காரணிகளை அறிய வேண்டும். சோதனைகள் மூலம், நோய்க் காரணம், நோய் பாதிப்பின் அளவு ஆகியவை மருத்துவர்கள் முதலில் முடிவு செய்வர். குறைந்தது மூன்று மாதங்களுக்குச் சளியுடன் கூடிய இருமல் ஏற்பட்டுப் பின்னர், அடுத்த வருடமே, மீண்டும்  அவ்வாறு ஏற்பட்டால், அவருக்கு நாள்பட்ட மூச்சுக் குழலழற்சி இருப்பதாக மருத்துவர்களால் எண்ணப்படுகிறது. அதனால் இதற்கான காரணங்களை முதலில் நீக்க வேண்டும். புகைப்பிடித்தலை அறவே நீக்க வேண்டும். வேறு ஒவ்வாமைக் காரணிகளையும் தவிர்க்க வேண்டும். தூசு, சுற்று சூழல் காற்று மாசு ஆகிய பகுதிகளில் இயங்கும்பொழுது முகக்கவசம் போன்ற பாதுகாப்புச் சாதனங்களைப் பயன்படுத்த வேண்டும். நோய்த் தொற்று ஏற்படாமல் பாதுகாப்புடன் இருக்க வேண்டும். நோய்த் தொற்றின் அறிகுறிகள் தெரியும் ஆரம்ப நிலையிலேயே அதை மருத்துவரிடம் காண்பித்து, தகுந்த ஆய்வுகள் மேற்கொண்டு மருத்துவம் செய்துகொள்ள வேண்டும். இது நுரையீரல் திசுக்கள் அழிவைப் பெருமளவு தவிர்க்கும். சில வகை வைரஸ், நுண் கிருமிகள் நோய்த் தொற்றைத் தவிர்க்க தடுப்பூசிகள் உள்ளன. அவற்றைப் பயன்படுத்துவதால் நோய் வருமுன் காத்துக் கொள்ளலாம். மனநல மருத்துவ அறிவுறுத்தல்கள், யோகா, மூச்சுக் குழல் தளர்த்திகள் (Bronchodialators), அறிகுறிகளை அகற்றும் மருந்துகள் (Symptomatic Drugs), நோயின் தீவிரத் தன்மைகளைக் குறைக்கும். இந்நோயை முழுமையாகக் குணமாக்க முடியாவிடினும், நோயாளியை ஓரளவு, தொல்லைகள் இன்றி வசதியாக வைத்துக் கொள்ளலாம். நீண்ட கால உயிர் மூச்சு மருத்துவம் (Oxygen Therapy), செயற்கை மூச்சுக் கருவிகள் (Ventilators) பயன்பாடு இவை நோயாளியின் வாழ்வை நீட்டிக்கும். எக்மோ (Extra Corporal Membrane Oxygenation - ECMO) கருவியின் மூலமும் மூச்சு நிற்காமல் தடுக்க முயல்வர். அதே சமயம் நுரையீரலைச் சீராக்கவும் முயல்வர். சிலருக்கு மாற்று நுரையீரலையும் பொறுத்தும் மருத்துவமும் செய்யப்பட்டு நலமடையும் நிலையும் ஏற்படும். நுரையீரல் இயங்காவிடில் மரணம் உறுதி என்கிற நிலையை மாற்றி, நுரையீரல் நின்றாலும் மனிதனை வாழவைக்கும் நிலையை மருத்துவம் செய்கின்றது. விதி முடிந்தவனையும், வேளைவந்தால் போக வேண்டும் என்பவனையும் மருத்துவம் காப்பாற்றுகிறது என்றால் மிகையல்ல!

(தொடரும்)

- உண்மை இதழ், 1- 15 .12 .20

விதி நம்பிக்கையை விலக்கிய அதி நவீன மருத்துவங்கள்! (18) நாள்பட்ட நுரையீரல் அடைப்பு நோய் (Chronic Obstructive Pulmonary Disease)

மருத்துவம் : 

மரு.இரா.கவுதமன்

நுரையீரலில் ஏற்படும் நாள்பட்ட நோய்களால், நுரையீரலில் உள்ள திசுக்கள் சேதமடையும். அதனால் நுரையீரல் முழு அளவு காற்று மாற்றம் செய்ய இயலாத நிலை ஏற்படும். இதையே “நாள்பட்ட நுரையீரல் அடைப்பு நோய்’’ (Chronic Obstructive Pulmonary Disease) என்கிறோம்.

ஒரு முறை இந்நோய் வந்து, நுரையீரல் திசுக்கள் அழிந்துவிட்டால், அத்திசுக்கள் மீண்டும் இயல்பு நிலைக்குத் திரும்பாது. மருந்துகளால் நோயின் அறிகுறிகளை மட்டுமே குறைக்க முடியுமே ஒழிய, நோயை முழுமையாகக் குணமாக்க முடியாது. சில நோயாளிகள் இந்நோயோடு, பல ஆண்டுகள் வாழ்கிறார்கள். சிலரோ வாழ்நாள் முழுதும் இந்நோயோடு, போராடிய வண்ணம் உயிர் இருக்கும் வரையில் வாழ்ந்தும் வருகிறார்கள். இன்றைய நிலையில் ஏறத்தாழ 1 கோடிப் பேர் இந்தியாவில் இந்நோயினால் பாதிக்கப்பட்டுள்ளனர். சரியான மருத்துவத்தின் மூலம் இந்நோயின் அறிகுறிகளைக் குறைத்து, ஓரளவு தொல்லைகளோடு வாழ முடியும்.

நோய் காரணிகள்:

நாள்பட்ட எல்லா வகை நுரையீரல் நோய்களும், நுரையீரல் அடைப்பு நோயில் வந்து நிற்கும். “மூச்சுக் குழல் அழற்சி’’, “நுரையீரலில் நீர் கோப்பு’’ (Pulmonary Oedema),  “இடைத் திசுக்களில் காற்று பரவும் நோய்’’ (Emphysema) போன்ற நோய்களால், நுரையீரல் அடைப்பு நோய் ஏற்படும்.

நாள்பட்ட மூச்சுக்குழல் அழற்சி: (Chronic Bronchitis)

புகைப் பிடித்தல், ஒவ்வாமையை உண்டாக்கும் பொருள்கள், தூசு, காற்று மாசு, மூச்சுக் குழல் நோய்த் தொற்று போன்றவை மூச்சுக்குழல் அழற்சியை உண்டாக்கும். மூச்சுக்குழல் வீங்கி, இயல்பான நிலையில் உள்ள திறப்பு, சுருங்கிவிடும். அதனால் காற்று அதன் வழியே நுரையீரலை அடைவதில் குறைபாடு ஏற்படும். இது குறுகிய, அதிவேகமான மூச்சு விடும் சூழலை உண்டாக்கும்.

நுரையீரல் நீர்கோப்பு:

சிறுநீரகக் கோளாறு, இதயக் கோளாறு போன்ற நோய்கள் தீவிரமடைவதால், அதன் பின் விளைவாக நுரையீரலில் நீர் கோத்துக் கொள்ளும். அதனால் நுரையீரல் செயல்பாடு பாதிப்படையும். இதன் காரணமாக மூச்சுத் திணறல், மூச்சிரைப்பு போன்றவை உண்டாகும்.

ஒவ்வாமை (Allergy),

தூசு, காற்று மாசு, வேதியியல் காற்று (Chemical Feemes) போன்றவையும் நாள்பட்ட நுரையீரல் அடைப்பை ஏற்படுத்தும். ஒவ்வாமை உண்டாக்கும் மகரந்தத் துகள்கள், நறுமணப் பொருள்கள் நீண்ட நாள்கள் மூச்சுக் காற்றின் மூலம், மூச்சுக் குழல் வழியே செல்லும்பொழுது, அதன் விளைவாக “மூச்சுக் குழல் இறுக்கம்’’ (Bronchospasam) ஏற்பட்டு, மூச்சு விடுவதில் தொல்லை ஏற்படும்.

டெல்லி போன்ற காற்று மாசு அதிகம் பாதிப்புள்ள நகரங்களிலேயே தொடர்ந்து தங்கி, வாழ வேண்டியவர்களுக்கு, நாளடைவில் இந்நோய் வர வாய்ப்பு ஏற்படும். சிலர் நீண்ட காலம் வேதியியல் தொழிற்சாலைகளில் (Chemical Factories) பணியாற்றும் சூழ்நிலை ஏற்படும். அதேபோல் சிலர் சிமெண்ட் தொழிற்சாலைகளிலும், சிமெண்ட் - அட்டை (Cement & Asbestose) தொழிற்சாலைகளிலும் பணியாற்றுவர். அவர்களுக்கு சிமெண்ட் துகள்கள், நுரையீரலில் ஒட்டிக்கொண்டு, அதன் செயல்பாட்டை குறைக்கும். வண்ணக் கலவை தொழிலாளர்களுக்கும் (Painters) நுரையீரல் பாதிப்பு ஏற்படும்.

நுரையீரல் இடைத்திசுக் காற்று பரவல் (Emphysema):

இது ஒரு நீண்டகால நுரையீரலில் வளர்ச்சியடைந்த நோய். இந்த நிலையில் நுரையீரல் திசுக்கள் அழிக்கப்பட்டிருக்கும். நுரையீரலில் உள்ள மெல்லிய காற்றறைகள் (alveolus) இந்நோயால் சிதைவடைவதால், காற்றறைகளில் உள்ள காற்று, காற்றறைகளின் இடைத்திசுக்களுக்குள் பரவும்.

இதனால் இயல்பாக காற்றறைகளில் ஏற்படும், காற்றுப் பரிமாற்றம் (Gaseous exchange) நிகழும். நுரையீரலுக்கு வரும் காற்று காற்றறைகளை விட்டு வெளியேறி, அதற்கு இடைப்பட்ட திசுக்களில் தேங்கும். இதனால் நுரையீரலின் சுருங்கி (காற்று வெளியேறும்பொழுது), விரியும் (காற்று உள்ளிழுக்கும்போது) தன்மை பாதிக்கப்படும். இதன் விளைவாக மார்பில் இறுக்கம், மூச்சுத் திணறல், மூச்சிரைப்பு, மூச்சடைப்பு போன்றவை ஏற்பட்டு, நுரையீரல் செயல்பாடு முடங்கி விடும் நிலை ஏற்படும்.

நோய் கூற்றியியல்:

நுரையீரல் நோய்கள் நீண்ட நாள்கள் இருக்கும்பொழுது, நுரையீரல் அடைப்பு நோயாக மாறும். முற்றிய, நாள்பட்ட நுரையீரல் அடைப்பு நோயுள்ளவர்களின் நுரையீரல் செயல்பாடு பாதிப்பினால், மூச்சுக் காற்று (ஆக்சிஜன்) இரத்தத்தில் கலப்பது குறைந்து, கரியமில வாயு (கார்பன்_டை_ஆக்ஸைடு)  நுரையீரல் மூலம் வெளியேற முடியாமல், இரத்தத்தில் தேங்கும். சில காலம் கழித்து, திசுக்களுக்கு உயிர் மூச்சுக் காற்று (ஆக்சிஜன்) குறைந்து, திசுக்கள் சோர்வடையும்.

மூளை உறுப்புகளும் முழுமையாகக் களைப்படையும். இதன் விளைவாக, இரத்தத்தில் ஏற்படும் காற்று சமமின்மையால் ‘உணர்விழப்பு’, ‘ஆழ்மயக்கம்’ (Coma) போன்ற நிலைகளுக்கு நோயாளி சென்றுவிடுவார். ‘மூளைச்சாவு’ (Brain Death) அடைந்துவிட்டால், நோயாளி மரணமடைந்து விடுவார்.

- உண்மை இதழ், நவம்பர் 16 -30 .20

இதய, நுரையீரல் பொறி (ECMO)

மருத்துவம்: 

(Heart Lung Machine)

“எக்மோ’’ கருவியைப் பற்றி இப்பொழுது அடிக்கடி படிக்கின்றோம். முன்னாள் முதல்வர் மாண்புமிகு ஜெயலலிதா அவர்களுக்கு எக்மோ ((ECMO- Extra Corporal Membrane Oxygenation) மருத்துவம் செய்ததாக பரபரப்பான செய்தியை நாமறிவோம். சமீபத்தில்கூட பாடகர் எஸ்.பி.பாலசுப்ரமணியம் அவர்களுக்கு இம்மருத்துவம் செய்யப்பட்டதாக நாம் படித்திருக்கிறோம். நுரையீரல் பெரும் பாதிப்பு ஏற்பட்டு, முழுதும் செயலிழந்துவிட்டால் “காற்று மாற்றம்’’ செய்ய இயலாத நிலை ஏற்படும். அவ்வேளைகளில் நுரையீரல் செய்யும் வேலையை, வெளியில் உள்ள ஒரு பொறி செய்யும். எப்படி இதய அறுவை மருத்துவத்தில், இதய, நுரையீரல் பொறி (Heart Lung Machine) வேலை செய்கிறதோ, அதே போல் எக்மோ கருவி, நுரையீரலுக்குப் பதில் வேலை செய்யும். அதன் மூலம் உடலுக்குத் தேவையான உயிர்மூச்சுக் காற்று உடலுக்குள், இரத்தக் குழாய்கள் மூலம் செலுத்தப்பட்டு, இரத்தத்தில் உள்ள கரியமில காற்று உறிஞ்சி வெளியேற்றப்படும். இதன் மூலம் மருத்துவர்களுக்கு நோயை  குணப்படுத்துவதற்கான  நேரம் கிடைக்கும். எக்மோ கருவி நுரையீரல் வேலையை இடைவிடாமல் செய்வதால் நுரையீரலுக்கு ஓய்வு கிடைக்கும். மருத்துவர்களுக்கும் அதை சீராக்கும் வாய்ப்பும், நேரமும் கிடைக்கும். இன்று எக்மோ கருவி பயன்பாட்டால் எத்தனையோ பேர் உயிர் பிழைக்கும் வாய்ப்பும் ஏற்பட்டுள்ளது. மனித உடலின் உறுப்புகளின் செயல்பாட்டை, வெளியிலிருந்தவாறே பொறிகளின் உதவியோடு செயல்படுத்தி, அவ்வேளையில் பாதிப்படைந்த உறுப்புகளைச் சீர் செய்யும் மருத்துவத்தின் சாதனையை எண்ணி வியக்காமல் இருக்க முடியுமா?

பின்குறிப்பு: இதய, நுரையீரல் பொறியை (Heart Lung Machine) கண்டுபிடித்து, இதய அறுவை மருத்துவத்திற்கு அதைப் பயன்படுத்தி, கோடிக்கணக்கானவர்களை வாழ வைத்த மருத்துவ மாமேதைகள் இருவர்.

அவர்கள் இருவரும் கணவன், மனைவி. மருத்துவர் ஜான் ஹேசம் கிப்பன், அமெரிக்காவின், பிலடெல்பியா மாநிலத்தைச் சேர்ந்த அறுவை மருத்துவ நிபுணர். அவரின் இணையர் திருமதி மேரி ஜீன்னே (MarieÿJeanne), மருத்துவர் கிப்பன் ஆய்வுகளுக்கு பேருதவி புரிந்தவர். இவர்களின் முயற்சியால் 1935இல் முதல் இதய _ நுரையீரல் பொறி பயன்பாட்டிற்கு வந்தது. எண்ணற்ற மக்களுக்கு இதய அறுவை மருத்துவம் மூலம் வாழ்வும் நீண்டது.

அதேபோல் மருத்துவர் ராபர்ட் பார்ட்லெட் (Dr. Robert Bartlett) கண்டுபிடித்ததுதான் “எக்மோ’’ (ECMO- Extra   Corporal Membrane Oxygenation) கருவி. 1970இல் இக்கருவி “லோவா பல்கலைக்கழக மருத்துவமனையில் (University of Lova Hospital) வெற்றிகரமாக பயன்படுத்தப்பட்டது. அமெரிக்காவின் கலிஃபோர்னியா மாநிலத்தில் பிறந்த இவரின் கண்டுபிடிப்பான “எக்மோ’’ கருவி இன்ற பலருக்கு மறுவாழ்வு கொடுக்கிறது. மனித குலத்திற்கு இம்மருத்துவ அறிஞர்களின் கண்டுபிடிப்புகள “விதி’’ முடிந்தவர்களையும் வாழவைக்கும் “விநோதம்’’தான் என்னே!

“கடவுளை மற! மனிதனை நினை!!’’

- உண்மை இதழ், நவம்பர் 16 -30 .20

விதி நம்பிக்கையை விலக்கிய அதி நவீன மருத்துவங்கள்! [17] - மூச்சிரைப்பு நோய் (ASTHMA)

மருத்துவம் : 

நாம் அடிக்கடி பார்க்கும் நோயாளிகளில் “மூச்சிரைப்பு’’ நோயாளிகள் அதிக அளவு இருப்பதை அறிவோம். இந்தியாவில் 3.5 கோடிப் பேர் இந்நோயால் பாதிக்கப்பட்டுள்ளனர். மூச்சிரைப்பு நோய் (Asthma) என்பது மூச்சுவிடும் இயல்பான நிலையில் ஏற்படும் பாதிப்பால் ‘இளைப்பு’ (Wheezing) ஏற்படும் தொல்லை தரும் ஒரு நிலையாகும். இந்த மூச்சிரைப்பு பெரும்பாலும் விட்டு விட்டு, மீண்டும் மீண்டும் வரக்கூடிய தொல்லையாகும். ஒரு சிலருக்கு தொடர்ந்து நீண்ட நேரமும் இருக்கக் கூடும். இந்த தொடர் நிகழ்வு, ஆளுக்கு ஆள் வேறுபடும். சிலருக்கு அதிகமான பாதிப்பும், அதிக நேரம் சங்கடமும் ஏற்படும். சிலருக்கோ கொஞ்ச நேரத்தில் குறையக்கூடிய வாய்ப்பும் உண்டு. இந்நோய் எப்பொழுது, எப்படி, ஏன் வருகின்றது என்கிற காரணத்தை அறுதியிட்டு இதுவரை கூற முடியவில்லை. இந்நோய் உயிராபத்தை ஏற்படுத்தாவிட்டாலும் மிகவும் தொல்லையை நோயாளிக்குக் கொடுக்கும். இதுவரை இந்நோயிலிருந்து குணமடைய (Cure) மருந்துகள் கண்டுபிடிக்கப்படவில்லை. ஆனால் நோயை அதன் அறிகுறிகளிலிருந்து, கட்டுப்படுத்தி, நோயாளியை இயல்பு நிலைக்குக் கொண்டு வர பல மருந்துகள் உள்ளன. இந்நோயாளிகளின் ஒரே நம்பிக்கை இந்த மருந்துகள்தாம்.

காரணம்: ஏற்கெனவே குறிப்பிட்டபடி இந்நோய்க்கு என்ன காரணம் என்று அறிய முடியவில்லை. சுற்றுச்சூழல் (Environment Changes), பாரம்பரிய பாதிப்பு (Genes), ஒவ்வாமை காரணிகள் (Allerges). பல நோயாளிகளுக்கு மூச்சிரைப்பைத் தூண்டிவிடும் சிலவகை மகரந்தத் துகள்கள் (Polengrains), காற்றில் கலந்துள்ள ஒவ்வாமை துகள்கள், தூசு, வித்துகள் (Spores), பூச்சிகள், வளர்ப்புப் பிராணிகளின் முடி (Pet dander) ஆகியவை ஒவ்வாமையைத் தூண்டி விட்டு மூச்சிரைப்பை ஏற்படுத்தும். கரப்பான் பூச்சி கழிவுகள், தெள்ளுப்பூச்சுக் கடி போன்றவையும் ஒவ்வாமையை உண்டாக்கி, மூச்சிரைப்பை ஏற்படுத்தும். ஒவ்வாமை காரணிகள்கூட ஒவ்வாமை ஏற்படுத்தும் நிலை மனிதருக்கு மனிதர் வேறுபடும். அதனால் ஒருவருக்கு ஏற்படும் ஒவ்வாமை காரணிகள், மற்றொருவருக்கு இருக்க வேண்டிய நிலைப்பாடும் இல்லை. சிலருக்கு காலநிலை மாறுபாடுகள் (எடுத்துக்காட்டாக -_ பனிக்காலம்) கூட இந்நோயை உண்டாக்கும்.

வகைகள்: பொதுவாக மூச்சிரைப்பு நோய் மூன்று வகைப்படும்.

1.            இரவு நேர மூச்சிரைப்பு: இது இரவுகளில்தான் வரும். நோயாளி, படுக்கையில் படுத்திருப்பதற்குக்கூட கடினமாக இருக்கும். சற்று சாய்வான நிலையில் அமர்ந்து இருந்தால் நோயாளிக்கு மூச்சு விடுதல் எளிதாக இருக்கும். பெரும்பாலான நோயாளிகள், இந்த வகை நோயால்தான் பாதிக்கப்படுவர்.

2.            உடற்பயிற்சி உண்டாக்கும் மூச்சிரைப்பு நோய்: சிலருக்கு உடற்பயிற்சி செய்யும் பொழுதோ, கடினமான உடல் உழைப்பு செய்யும்பொழுதோ, பல மாடிகள் நடந்து ஏறும்பொழுதோ, பெருமூச்சாகத் துவங்கி, மூச்சிரைப்பாக மாறிவிடும்.

3.            ஒவ்வாமை உண்டாக்கும் மூச்சிரைப்பு: ஒவ்வாமை காரணிகளால் ஏற்படும் மூச்சிரைப்பு இது.

அறிகுறிகள்: நோயின் அறிகுறிகள், ஒருவருக்கொருவர் மாறுபடும். சிலருக்கு எப்பொழுதாவது வரும். சிலருக்கு அடிக்கடி இவ்வறிகுறிகள் வெளிப்படும். சிலருக்கு ஒரு குறிப்பிட்ட வேளையில் வரும். சிலருக்கு இரவு நேரத்தில் மட்டும் வரும். சிலருக்கு உடல் உழைப்பாலோ, உடற்பயிற்சி செய்யும்பொழுதோ வரும். சிலருக்கு மழைக்காலத்தில் வரும். சிலருக்கோ பனிக்காலத்தில் வரும். ஒரு சிலருக்கு கோடைக்காலத்தில் கூட வரலாம். சிலருக்கு அதிகமாக வியர்க்கும் பொழுது கூட வரும் நிலை உண்டு. சிலருக்கு குளிர்ந்த உணவுகள், குளிர்ந்த நீர், குளிர்ந்த பழரசம் கூட மூச்சிரைப்பை உண்டாக்கும். நோய் தாக்குதலின் தன்மைக்கேற்ப அறிகுறிகள் தெரியும். சிலருக்கு மிக அதிகமாகவும், சிலருக்குக் குறைவாகவும் அறிகுறிகள் தெரியலாம். மூச்சிரைப்பு நோய்க்கு ஆளானவர்களுக்கு பொதுவான அறிகுறிகளாக கீழ்க்கண்ட அறிகுறிகள் தெரியலாம். அவற்றைப் பார்ப்போம்.

*           குறுகிய மூச்சு (Shortness of Breath) முழுமையாக மூச்சு இழுத்து காற்றை வெளியேற்ற முடியாத நிலை.

*           மார்புப் பகுதியில் இறுக்கம்

*          மார்பு தசைகளில் வலி. இயல்பு நிலையில் 20 முறை மூச்சு இழுத்து விடுவதற்குப் பதில், குறுகிய மூச்சு விடுவதால், மார்புத் தசைகளும், மார்புக்குக் கீழ் உள்ள “உதரவிதானம்’’ (Diaphragm) பகுதியும் அதிக முறை செயல்படுவதால் மார்புப் பகுதியில் வலி ஏற்படும்.

*          மூச்சுக் காற்றை வெளியேற்றும்பொழுது, இளைப்பு ஏற்படும். குழந்தைகளுக்கு இது அதிகளவு வெளிப்படும்.

*          தூங்கும்பொழுது, இளைப்பு ஏற்பட்டு, உறக்கம் கெடல், படுக்கையில் படுத்திருக்கும் நிலையில் இளைப்பு அதிகம் ஏற்படும். சற்று சாய்ந்து உட்கார்ந்த நிலை, நோயாளிக்கு வசதியாக இருக்கும்.

*           இருமல்.

*           இளைப்பு (Wheezing)

*           மூச்சுக்குழாய் வைரஸ் தொற்று, இளைப்பை அதிகமாக்கும்.

*           சளி பிடித்தல்; ஃபுளு காய்ச்சல் போன்றவை ஏற்பட்டால், மூச்சிரைப்பு நோயும் உண்டாகி, நோயாளி அதிகம் தொல்லைப்படுவார்.

*           மூச்சிரைப்பும், இளைப்பும் ஏற்படும் பொழுது நோயாளி மூச்சுத் திணறல் ஏற்பட்டு தொல்லைப்படும் நிலையும், சில நேரங்களில் ஏற்படும்.

*           சிலருக்கு கடினமான உடல் உழைப்பினால் ஏற்படும் நோய், ஓய்வு எடுத்து நீண்ட நேரத்திற்குப் பின்பே குறையும்.

*           சில தொழிற்சாலைகளில் ஏற்படும் காற்று மாசு ஏற்படுத்தும் இளைப்பு, அந்த வேலையை விட்டால் சரியாகி விடும் (சிமென்ட் விரிப்பு (Asbestoes) தொழிற்சாலை, வண்ணங்கள் உற்பத்தி செய்யும் தொழிற்சாலை போன்றவற்றில் தொழிலை மேற்கொள்ளும் தொழிலாளர்கள் இந்நோயினால் பாதிக்கப்படுவது மிக அதிகம்.

*           திடீரென்று நீண்ட நாள் மூச்சிரைப்பு நோயாளிக்கு, “தொடர் இளைப்பு’’ (Status Asthmaticus) ஏற்படும். நோயாளி மிக அதிகமாகத் தொல்லைப்படுவார். லேசான உடல் உழைப்பில்கூட இந்த நிலை ஏற்படும். உடனடியாக இளைப்பைக் குறைக்கும் மருந்துகளாலும், மூச்சிரைப்பு குறையாது. மிக வேகமாகவும், நோயின்போது, இயல்பாக ஏற்படும் இளைப்பைவிட அதிகமாக இருக்கும். அதிக அளவு குறுகிய மூச்சு ஏற்படும்.

*          உடனடியாக அவசரமாக மருத்துவம் செய்ய வேண்டிய நிலை இது. மருத்துவம் செய்யாவிடில், நோயாளி மூச்சுத் திணறியே மரணமடையவும் கூடும்.

நோயறிதல்:

*           இரத்தப் பரிசோதனை: ஈசனோஃபில் (Eosonophiles) அளவை கண்டுபிடித்தல் ஒரு முக்கிய ஆய்வு.

*           மார்பு ஊடு கதிர் (X Ray - Chest)

*           சிடி ஸ்கேன் - கதிரியக்க ஊடுருவல் (CT Scan): நுரையீரலின் பாதிப்பை இச்சோதனையால் அறிய முடியும்.

*          ஒவ்வாமை காரணிகளை (Allergens) ஆய்வு செய்தல். இதன் மூலம் எந்தக் காரணி மூச்சிரைப்பு ஏற்படுத்துகிறது என கண்டறிய முடியும். “ஒவ்வாமை மருத்துவமனை’’ (Allergy Clinic)யில் இதை ஆய்வு செய்வர். காரணியை அறிந்து, அதைத் தவிர்ப்பதால் இளைப்பை தவிர்க்கலாம்.

மருத்துவம்: மருத்துவர் அறிவுறுத்தலின் படியே மூச்சிரைப்பு நோய்க்கு மருந்துகள் எடுத்துக் கொள்வது நலம் பயக்கும். மருத்துவம் நோயாளியின் நிலை, நோயின் தன்மை ஆகியவற்றிற்கு ஏற்ப மாறுபடும். பெரும்பாலான நோயாளிகள், வீட்டில் இருந்தபடியே இளைப்பு உண்டானவுடன் மருந்துகளை எடுத்துக் கொள்வர். மருந்து எடுத்துக் கொண்டு சிறிது நேரத்தில் இளைப்பு குறைந்து விடும். நோயாளிகள் பெரும்பாலோனோர் இளைப்பின் அறிகுறிகள் வரும் என்பதை முன்னறிந்தேகூட மருந்துகளை எடுத்துக் கொள்வர். சில நோயாளிகள் இளைப்பு துவங்கியதுமே மருந்துகளை எடுத்துக் கொள்வர். ஆரம்ப நிலையில் மருத்துவம் செய்து கொண்டால், நோய் முற்றாமல், அதன் விளைவாகநு

நுரையீரல் திசுக்கள் அதிக அளவு அழிவுறாமல் தவிர்க்க முடியும். அதனால் லேசாக இளைப்பு ஏற்படும்பொழுதே மருத்துவ அறிவுரை பெற்று, மருந்துகள் எடுத்துக் கொள்வது நலம் பயக்கும்.

அதனால் நுரையீரல் அதிகம் சேதமடைவதைத் தவிர்க்க முடியும். மூச்சிரைப்பு நோயை முழுமையாகக் குணப்படுத்த முடியாது. அறிகுறிகளைத்தான் கட்டுப்படுத்த முடியும். ஆனால், நோயைக் கட்டுப்படுத்த மிகவும் சிறந்த மருந்துகள் உள்ளன. மருத்துவரின் அறிவுரைப்படி அம்மருந்துகளை உண்பது நோய் அறிகுறிகளைக் குறைத்து விடும்.

ஆரம்ப நிலை மருத்துவம், நுரையீரல் பாதிப்பைத் தவிர்த்து, உயிராபத்தைக் கூட தவிர்க்கும். அறிகுறிகள் வழமையான மருந்துகளால் குறையாவிடில், வீட்டிலேயே இருக்காமல் உடனடியாக மருத்துவரை அணுக வேண்டும். சில நேரங்களில் மூச்சுக்காற்று மருத்துவம் (Oxygen Therapy) கூட தேவைப்படும்.

உயிராபத்து ஏற்படும் வேளைகளில் செயற்கை மூச்சுப்பொறி (Ventilators) இணைத்து மூச்சு விடும் நிலைகூட ஏற்படலாம். அதனால் எச்சரிக்கையாக இருக்க வேண்டும். பொதுவாக தொடர் மூச்சிரைப்பு மிகவும் அபாயம் நிறைந்த நிலை. உடனடியாக மருத்துவம் செய்தல் அவசரம். அதன் மூலம் உயிராபத்தைத் தவிர்க்கலாம். புகைப்பிடித்தலை முழுமையாகத் தவிர்க்க வேண்டும்.

மூச்சுப் பயிற்சி (Breathing Exercise) நல்ல பலனைத் தரும். மூச்சுக்குழாய் விரிவாக்க மருந்துகள் (Bronchodialators), அழற்சி முறிப்பான்கள் (Anti Allergic drugs) போன்றவையும், ஸ்டீராய்டு மருந்துகள் (Steroids) நல்ல வண்ணம் நோயைக் கட்டுப்படுத்தும்.

- உண்மை இதழ், அக்டோபர் 1 -15 .20

.

விதி நம்பிக்கையை விலக்கிய அதி நவீன மருத்துவங்கள்! (16)நுரையீரல் அழற்சி (PNEUMONIA)

மருத்துவம் :

இதயம் கைப்பிடி அளவிலேயே உள்ள ஓர் இன்றியமையாத - ஓய்வில்லாமல் வேலை செய்யும் - உடல் பொறி. ஆனால் இதயத்தை ஒட்டியுள்ள நுரையீரல் இதயத்தைக் காட்டிலும் பல மடங்கு பெரிதான, ஓய்வில்லாமல் உழைக்கும் இன்னொரு உடல்பொறி, நமது மார்புப் பகுதி முழுவதும் பரவியுள்ள நுரையீரல், விலா எலும்புகளால் பாதுகாக்கப்படுகிறது. இதயத்தைப் போல் கடுமையான தசைகளால் உருவாகாமல், மிகவும் மென்மையான காற்றழைகளால் உருவானதே நுரையீரல் (Lungs)  நுரையீரல் அடிப்படைச் சொல் பல்மோ என்னும் இலத்தின் மொழியிலிருந்து உருவானது. அதே போல் கிரேக்கச் சொல்லானா நியுமோ (Prneumo) என்பது காற்று என்ற பொருளுடன் இணைந்துள்ள உறுப்பான நுரையீரலைக் குறிக்கும். மூக்கின் வழியே நாம் உள்ளிழுக்கும் (Inspiration) காற்று செல்வதும், அதன் வழியே காற்று வெளியேறும் செயல்பாட்டையே மூச்சுவிடுதல் (Respiration) என்கிறோம். மூச்சுக்குழாய் இரண்டாகப் பிரிந்து வலப்பக்க, இடப்பக்க என இரண்டு பக்க நுரையீரல்களுக்கும் காற்றுப் பரிமாற்றத்திற்கு உதவும். இந்த  மூச்சுக்குழாய் மேலும் பல நுண்ணிய சிறு, சிறு குழாய்களாக (Bronchioles) மாறும். நுரையீரல் வலப் பக்கம் மூன்றுபிரிவுகளாகவும் (Lobes), இடப் பக்கம் இரண்டு பிரிவுகளாகவும் இருக்கும். நுரையீரல் பல லட்சக்கணக்கான நுண் காற்றறைகளால் (alveolus) ஆனது. மூச்சுக்குழாய், மூச்சுக் கிளைக் குழாயாக (Bronchus) மாறி ஒவ்வொரு நுண்காற்றறையிலும் காற்றுப் பரிமாற்றம் நிகழும். இந்த நுண் காற்றறைகள், நுண் மூச்சுக்குழாய் வழியே வரும் காற்றிலிருந்து உயிர் மூச்சுக் காற்றை (ஆக்சிஜன் - Oxygen) உறிஞ்சு கொண்டு, உடலில் உற்பத்தியாகும் கரியமிலக் காற்றை (Co2) - கார்பன் - டை - ஆக்சைடு) வெளியேற்றும். இதையே மூச்சுவிடுதல் என்கிறோம். ஒரு நாளைக்கு சுமார் 22000 முறை மூச்சுவிடும் நாம், 9000 கன அடி காற்றை உள்ளிருந்து வெளிவிடுகிறோம். உறங்கும் போதும், இயங்கும் போதும் இடைவிடாமல் இந்தச் செயல்பாடு நிகழ்ந்து கொண்டேயிருக்கும். ஒரு நிமிடத்திற்கு 20 முறை இவ்வாறு நாம் மூச்சு விடுகிறோம். இதயத்தின் வலப்பக்க கீழறையிலிருந்து புறப்படும் நுரையீரல் தமனி, நுரையீரலில் உள்ள இந்தக் காற்றறைகளுக்கு இரத்தத்தைக் கொண்டு வரும். கழிவுப் பொருள்கள் கலந்த கெட்ட இரத்தமே அது. நுரையீரல் தமனி, மேலும், மேலும் சிறிய, சிறிய குழாய்களாக மாற்றி, தந்துகிகளாக (capillaries) மாறி, இரத்தத்தை நுரையீரலில் உள்ள நுண்காற்றறைகளுக்குக் கொண்டு செல்லும். இந்தத் தந்துகளில் வந்த கரியமிலக் காற்று கலந்த இரத்தத்திலிருந்து, அதை வெளியேற்றி, உயிர் மூச்சுக்காற்றை (ஆக்சிஜன்) இரத்தக் குழாய்களுக்குள்  செலுத்தி, அதை நல்ல இரத்தமாக மாற்றி அனுப்பும். இதையே காற்றுப் பரிமாற்றம் (Gaseous exchange) என்கிறோம். இப்படி பல லட்சம் நுண் காற்றறைகளிலிருந்து வெளியேறும் கரியமிலக் காற்று மூச்சுக்குழாய்கள் வழியே வெளியேற்றப்படுகின்றது. சுத்திகரிக்கப்பட்ட நல்ல இரத்தம் தந்துகளின் வழியே, சிறிய, பெரிய இரத்தக் குழாய்களில் செலுத்தப்பட்டு, முடிவில் நுரையீரல் சிரை வழியே இதயத்தின் இடப்பக்க மேலறைக்கு  (Left auricle) வரும். அங்கிருந்து கீழறைக்கு செலுத்தப்படும் நல்ல உயிர் மூச்சுக்காற்று கலந்த (Oxygenated blood) இரத்தம் உடல் முழுவதும் செலுத்தப்படும் . இதன் மூலம் நம் உடலில் உள்ள ஒவ்வொரு செல்லும் இயங்கத் தேவையான உயிர்மூச்சுக்காற்றைப் பெறும். குருதியில் கலந்துள்ள ஊட்டச்சத்துக்கள் (Nutrients) உயிர் மூச்சுக்காற்று (Oxygen), இயக்கு நீர்கள் (Hormones) இரத்த அணுக்கள் (Blood Cells)  கலந்து உடலின் பல பாகங்களிலிருக்கும் உயிரணுக்களுக்கு  (Cells) செலுத்தும். இதன் மூலம் உடலில் உள்ள ஒவ்வொரு உயிரணுவிலும் இயக்குதல் நிகழும். இதனால் நோய் எதிர்ப்பாற்றல், உடல் வெப்பநிலை சீரமைத்தல் (Thermoregulation) உடல்நீர்ச் சமநிலை  (Homeostasis) போன்றவை சரியான முறையில் நிகழும். எப்படி இதயம் ஓய்வின்றி தன் வேலையைச் செய்யுமோ, அதே போல்தான் நுரையீரலும்  தன் வேலையை ஓய்வின்றி நாள் முழுதும் செய்து கொண்டேயிருக்கும்.

நுரையீரலைச் சுற்றி வெளிப்படலம், உள்படலம் என இரண்டு உறைகள் உள்ளன (Pleura). இந்த இரண்டு படலங்களுக்கும் இடையில் ஒரு திரவம் இருக்கும். மூச்சு விடும் பொழுது, நுரையீரல் படலம் நுரையீரலைப் பாதுகாக்கிறது. மூளையில் உள்ள முகுளம் தான் (Medulla Oblongata) இந்த மூச்சு விடுதலை முழுமையாகக் கண்காணித்து, செயல்பட வைக்கிறது.

நம் மூக்கிலிருந்து துவங்கும் மூச்சுக்காற்று மண்டலம், நுரையீரல் செயல்பாட்டின் மூலம் நிறைவடைகிறது. மூக்கில் இருக்கும் முடிகள், மூலம், தூசு, தும்புகள், வடிகட்டப்படுகின்றன. மூச்சுக்குழாய்களில் சுரக்கும் சளி போன்ற நீர்மம் தூசுகள், நுண்துகள்கள், நுண்கிருமிகளையெல்லாம் வெளியேற்றும்.

நுரையீரல் அழற்சி  (PNEUMONIA)

நுரையீரல் அழற்சி பற்றி நாம் அடிக்கடி கேள்விப்பட்டுள்ளோம். நிமோனியா என்னும் சொல் நம் காதில் அடிக்கடி விழும் சொல்லாகும். இனி அந்நோயைப் பற்றி நோக்குவோம்.

நோய் காரணிகள் : நுரையீரல் அழற்சி 95 சதவிகிதம், நோய்க் கிருமிகளாலும், (Bacterias) நுண்ணியிரியான வைரஸ்களாலும், பூஞ்சான்களாலும் (Fungus) ஏற்படுவதாகும். வெகுஅரிதாக மார்பில் ஏற்படும் காயங்களால், விலா எலும்பு முறிந்து நுரையீரலை பாதிப்பதால் ஏற்படும். நீமோகாக்கஸ் நிமோனியே  (Pneumococcas pneumonia) என்ற நோய்க்கிருமியே பெரும்பாலும் இந்நோய்க்குக் காரணமாகக் கருதப்பட்டது. ஆனால் இப்பொழுது பல வைரஸ்களாலும், பூஞ்சைகளாலும், மருத்துவமனை நோய்த் தொற்றாலும் (Hospital Cross Infection) இந்நோய் வரும் என நிரூபணமாகியுள்ளது.

நோய்க் கூறியியல் : நோய்த் தொற்று, நுரையீரலில் ஏற்படும்போது, நுரையீரலில் உள்ள நுண்ணறைகள் அனைத்திலும் கிருமிகள் பரவும். உடன் அழற்சிக்கான மாற்றங்கள் நுரையீரலில் ஏற்படும். அதன் விளைவாக நுரையீரலின் நுண்ணறைகளில் நீர் சுரக்கும். காற்றைவிட, நீர் அடர்த்தியினால் நீர், நுரையீரலின் கீழறைகளில் சேர்ந்துவிடும். அதனால் மூச்சுவிடுவதில் இடைஞ்சல் ஏற்படும். இதுவே நுரையீரல் அழற்சியால் ஏற்படும் அறிகுறிகளுக்கு அடிப்படை.

நோயின் அறிகுறிகள் : நுரையீரல் அழற்சி, குழந்தைகளுக்கு ஏற்படும் நோய்த் தொற்றில் மிகவும் அதிகளவில் ஏற்படும் நோய்த் தொற்றாகும். மேல் மூச்சு உறுப்புப் பாதையில் ஏற்படும் நோய்த்தொற்றே இதற்குக் காரணம். நாளடைவில் கீழ் மூச்சுப் பாதை வழியே நோய்த் தொற்று, நுரையீரலின் அடிப்பகுதி வரை பரவும். அதனால் நோய்கிருமிகள் ஏற்படுத்தும் விளைவுகளால், நுரையீலின் அடிப்பகுதியில் நீர்சேரும். இதனால் நுரையீரலின் முழு அளவு காற்றுப் பரிமாற்றம் ஏற்பட முடியாத நிலை ஏற்படும். இதன் விளைவாக மூச்சிறை, மூச்சுவிடுவதில் சிக்கல் உண்டாகும். நோய்த் தொற்றினால் மேலும் பல அறிகுறிகளும் தெரியும். றகடும் காய்ச்சல்

*இருமல், தொடர்ச்சியான இருமல்

*தொண்டை கரகரப்பு, தொண்டை வலி றசளி, மூக்கு ஒழுகுதல்

*கெட்டியான சளி

*பசியின்மை

*வாந்தி

*தொடர்ச்சியான இருமலினால், மார்பு வலி

*அடிவயிற்றில் வலி

*மூச்சு விடுவதில் தொல்லை

*அசதி, களைப்பு

*மூச்சுத்திணறல்

*மூச்சுத்திணறலால் படுக்கையில் வசதியாக படுக்க முடியாது

*உட்கார்ந்து இருப்பதே வசதியாகக் தெரியும்

சில வேளைகளில் மூச்சுத்திணறலால், உடனடி மருத்துவம் செய்ய வேண்டிய நிலைமையும் ஏற்படும்.

நோய் ஆய்வு : மருத்துவர்கள் சில சோதனைகளை மேற்கொள்வர். இதில் இரத்தப் பரிசோதனை மிக முக்கிய பங்கு வகிக்கிறது. சளி பரிசோதனை செய்யப்படுகிறது.

*மார்பு எக்ஸ்ரே - ஒரு முக்கிய ஆய்வு

*கணினி ஊடுகதிர் நிழற் வரைவு (C.T.Scan)

*காந்த அதிர்வலை ஊடுகதிர் நிழற் வரைவு (M.R.I) மேற்கண்ட ஆய்வுகள் மூலம் நோயின் தன்மை, பாதிப்பின் அளவு, எவ்வகை நோய்க்கிருமிகள் தாக்கியுள்ளன. அவை எந்த மருந்துகளால் கட்டுப்படுத்தப்படும். மேலும்   ஏதாகிலும்  ஒவ்வாமை உள்ளதா என்பவற்றை வெகு துல்லியமாக அறிய முடியும். மருத்துவமுறைகளையும், நோயின் அறிகுறிகளுக்குகேற்பவும் அதன் தீவிரத் தன்மைக்கேற்பவும் மருத்துவர்கள் முடிவு செய்வர். ஆரம்ப நிலையிலேயே செய்யப்படும் மருத்துவம் சிறந்த பலனைத் தரும். நாள்பட்ட நோய், தீவிர மருத்துவம் மூலமே குணமாகும்.

மருத்துவம்: இந்நோய் வருமுன் காக்கும் தடுப்பு மருந்துகளும் உள்ளன. ஆனால், எல்லா நோய்களுக்கும் தடுப்பு மருந்து பயன்படாது. வைரஸ்களால் உண்டாகும் மூச்சு நோய்களுக்குத்தான் தடுப்பு மருந்து பயன்படும். பெரும்பாலான நுண் கிருமிகளால் (Bacteria) ஏற்படும் நோய்களுக்கு, நுண்ணுயிர் கொல்லிகள் ..(Anti - Biotics) சிறந்த பலனைத் தரும். நோயின் அறிகுறிகள் கடுமையாக இருந்தால் மருத்துவமனையில் சேர்ந்து, மருத்துவம் பார்க்க வேண்டிய நிலையும் ஏற்படும். மூச்சுத்திணறல் அதிகமாக இருக்கும் நிலை ஏற்பட்டால் உயிர் மூச்சுக்காற்று (Oxygen Therapy) மருத்துவமும் தேவைப்படலாம். இதன் அளவு (இயல்பாக sPo2) அளவு  85 முதல் 95 வரை இருக்க வேண்டும். சில நேரங்களில் செயற்கை மூச்சுப் பொறியையும்  (Ventilator) பயன்படுத்தும் நிலையும்  ஏற்படலாம். எந்த வகையான மருத்துவம் என்பதை தேவைக்கேற்ப மருத்துவர் முடிவு செய்வார். பெரும்பாலும் இந்நோய்  நன்றாகும் வாய்ப்புகளே அதிகம். புகைபிடிப்பவர்கள் அதை முழுமையாகத் தவிர்க்க வேண்டும். புகைப் பழக்கம் நோயின் தொல்லைகளை அதிகமாக்கும்.

(தொடரும்...)

- உண்மை இதழ், 16-31.10.20

விதி நம்பிக்கையை விலக்கிய அதி நவீன மருத்துவங்கள் (14)இதயத்தமனி (அடைப்பு) நோய்

மருத்துவம் - 

மரு.இரா.கவுதமன்

 

மருத்துவம்: பொதுவாக இந்நோய்க்கான மருத்துவம், அதன் தன்மைக்கேற்பவே மருத்துவர் முடிவு செய்வார். நெஞ்சு வலி எதனால் வருகிறது என முதலில் முடிவு செய்ய வேண்டும். “வாயுத் தொல்லை’’ என குறிப்பிடும் இரைப்பையில் (stஷீனீணீநீலீ) ஏற்படும் அழற்சியால் (stomach) கூட நெஞ்செரிச்சல், நெஞ்சு வலி வரலாம்.

ஆனால் நெஞ்சுவலி வந்தால், மருந்துக் கடைக்குச் சென்று நாமே மருந்து வாங்கி உண்பது ஒரு தவறான செயல். எதனால் வலி வருகிறது என மருத்துவ ஆலோசனை பெறுவது ஒரு கட்டாயத் தேவை. பல நேரங்களில் மார்பு வலியை, இரைப்பை அழற்சி என ஏமாறும் நிலை ஏற்பட்டு அதனால் உயிரிழக்கும் நிலை ஏற்படக்கூடும். அதனால்தான் நெஞ்சு வலி என்றால் மருத்துவ ஆலோசனை பெற வேண்டும். மருத்துவம், நோயின் தீவிரத் தன்மையை முன்னிட்டு மாறுபடும்.

நிலையான மார்பு வலிக்கு பெரும்பாலும் மருந்துகள் உட்கொள்வதால் நோயை கட்டுக்குள் வைத்திருக்க முடியும். ஆனால் நிலையற்ற மார்பு வலி இருப்பின், அதில் ஆபத்து அதிகம் என்பதால் வேறு மருத்துவம் தேவைப்படலாம். எந்த வகை மருத்துவம் தேவை என்பதை, பரிசோதனைகள் செய்து மருத்துவர்தான் முடிவு செய்வார். நோய்க்கான காரணங்களான, நீரிழிவு நோய், உயர் இரத்த அழுத்தம் போன்றவற்றையும் கண்டறிந்து, அதற்கான மருத்துவம், மார்பு வலி மருந்துகளுடன் எடுத்துக் கொள்ள வேண்டும். நீரிழிவு நோய், உயர் இரத்த அழுத்தம் போன்றவை நோயின் தீவிரத் தன்மையை அதிகரிக்கும். பொதுவாக மருந்துகளால் சீராக்க முடியாத நிலையில் நிலையற்ற மார்பு வலிக்கும், மாரடைப்பிற்கும் மருத்துவ முறைகள் ஒரே தன்மையுடையவைதான். அவற்றைக் காண்போம்.

குருதிக் குழாய் சீரமைப்பு (Angioplasty) : குருதிக் குழாய் அடைப்பைச் சீராக்கும் இம்மருத்துவ முறை, மாரடைப்பு ஏற்பட்ட உடன் செய்யப்பட்டால், இதயத்திற்குச் செல்லும் இரத்த ஓட்டம், சீராக இதயத்திற்குச் செலுத்தப்படும் நிலை ஏற்பட்டு, உயிராபத்து நீங்கும். விரைவான மருத்துவம், நல்ல பயனைத் தரும். நாம் ஏற்கெனவே குறிப்பிட்டபடி கால்களில் உள்ள தமனி வழியே ஒரு வடி குழாயைச் செலுத்தி, அதை இதயத்தமனியில் அடைப்பு உள்ள பகுதி வரை கொண்டு சென்று, அங்கு வடிகுழாயோடு இணைந்துள்ள “பலூனை’’ ஊதி, அடைப்பை அழுத்தச் செய்து, இரத்த ஓட்டத்தைச் சீராக்குவர். “பலூன் சீரமைப்பு’’ (Baloon Angioplasty) என்று இம்முறை அழைக்கப்படும். ஆனால் பெரும்பாலும் “உறைகுழாய்’’ (stent) என்னும் பொருளை அடைப்பு ஏற்படும் இடத்தில் நிலைநிறுத்தி, இரத்த ஓட்டம் தடைபடாமல் இதயத்திற்குச் செல்ல வைப்பர். இதன் மூலம் மரண ஆபத்து விலகும். இந்த உறை குழாய் உலோகத்தாலோ (metal) நெகிழிப் பொருளாகவோ (Biodegradable) இருக்கும். இப்பொழுது மருந்து பூசிய உறை குழாய்கள் (medicated stents) தான் பெரும்பாலும் பயன்படுத்தப்படுகின்றது. நிலையற்ற மார்பு வலிக்கும், மாரடைப்பு ஏற்பட்ட உடன் செய்யப்படும் மருத்துவத்தில், இந்த உறை குழாய் மருத்துவம் சிறந்த பலனை தரும். பெரும்பாலும், இதயத் தமனிகளில், இரண்டு தமனிகள் (two vessel disease) பாதிக்கப்பட்டிருந்தால் உறை குழாய் மருத்துவம் நல்ல பலனைத் தரும்.

இதயத் தமனி மாற்று வழி அறுவை மருத்துவம் (Coronary Artery Byepass Grafting - CABG) :

மாரடைப்பு நோய்க்கு மிகச் சிறந்த மருத்துவ முறையாக, இம்முறை இன்று கையாளப்படுகிறது. ரெனே பேஃவரோலா என்னும் அர்ஜென்டினாவைச் சேர்ந்த மருத்துவரால் கண்டுபிடிக்கப்பட்ட மருத்துவ முறை இது. “கால் பெருஞ்சிரை’’ (Long Dephanous Vein) யை எடுத்து, பாதிக்கப்பட்ட இதயத் தமனிகளில் பாதிக்கப்பட்ட பகுதிக்கு மேல் புறமும் கீழ்ப்புறமும், பொருத்தி இதயத்திற்கு இரத்தம் தடைபடாமல் கிடைக்கும் மருத்துவ முறை இது. சில நேரங்களில் “உள்மார்பு தமனி’’ (Long Dephanous Vein) யையும், கால் பெரும் சிரைக்குப் பதில் பயன்படுத்துவர்.

இன்றைக்கு 99% வெற்றிகரமாகச் செய்யப்படும் அறுவை மருத்துவம் இது. இதைச் செய்து கொண்டவர்கள் ஒரு சில வாரங்களிலே இயல்பு வாழ்க்கைக்குத் திரும்ப முடியும். எந்த வித தயக்கமுமின்றி உடல் உழைப்புடன் கூடிய பணிகளையும் செய்ய முடியும். பல ஆண்டுகள் எந்தத் தொல்லையுமின்றி உயிர் வாழ முடியும். இது கண்டுபிடித்து, செய்யத் துவங்கிய கால கட்டத்தில் இதயத்தை சுமார் 40 நிமிடங்கள் செயல் இழக்கச் செய்து, அறுவை மருத்துவம் செய்வர். பின் அறுவை மருத்துவம் முடிந்ததும், மின்சார தூண்டுதலால் மெல்ல இயங்க வைத்து (20 முறை), மருத்துவம் (Internal Thoracic Artery) செய்கின்றனர். இதயத்தை நிறுத்தாமல், மருத்துவம் முடிந்ததும், மருந்துகள் மூலம் இதயத்தை மீண்டும் இயல்பாக இயங்க வைப்பர்.

நுண்துளை இதயத் தமனி மாற்று வழி அறுவை மருத்துவம் (Minimally invasive coronary artery surgery ) :

மார்புக் காம்பின் கீழ் 3 அங்குலம் திறந்து, விலா எலும்புகளின் இடையே இதயத்தை அடைந்து, இதயத் தமனிகளைச் சீராக்கும் மருத்துவ முறை இது. இதில் இரத்தப் போக்கு இல்லை. அதனால் இரத்தம் கொடுக்க வேண்டியதில்லை. காயம் சிறிதானதால் எளிதில் ஆறி விடும். அறுவை மருத்துவம் முடிந்து, ஓரிரு நாள்களிலே வீடு திரும்பலாம்.

*        மேற்சொன்ன மருத்துவ முறைகள் மாரடைப்பால் ஏற்படும் மரணத்தை முழுமையாக தவிர்த்துவிடும்.

*        சரியான நேரத்தில், எடுக்கப்படும் சரியான மருத்துவமுறை நம் வாழ்நாளை நீடிக்கச் செய்யும்.

*        நெஞ்சு வலி வந்தால் அலட்சியமாக எண்ணாமல், மருத்துவ ஆலோசனை பெறுதல் சரியான வழிமுறை.

*        மாரடைப்பிற்கும், மார்பு வலிக்கும் காரணமான நோய்களை (நீரிழிவு, உயர் இரத்த அழுத்தம்) கட்டுக்குள் வைத்திருக்க வேண்டியது கட்டாயம்.

*        புகைப்பிடித்தல், மது அருந்துதல் போன்றவற்றை முழுமையாக நிறுத்த வேண்டும்.

*        பரப்பரப்பான வாழ்க்கை முறையை மாற்றிக் கொள்ள வேண்டும்.

*        சோம்பலான வாழ்க்கை முறையை மாற்றிக் கொள்ளல் வேண்டும்.

*        நல்ல உணவு, சீரான உடற்பயிற்சி, மருத்துவ ஆலோசனை, மருந்துகள் மூலம் மாரடைப்பு என்னும் கொடிய நோயிலிருந்து தப்பித்து நீண்ட வாழ்வு வாழ முடியும்.

(தொடரும்)

- உண்மை இதழ் செப்டம்பர் 16-31.9.20

விதி நம்பிக்கையை விலக்கிய அதி நவீன மருத்துவங்கள்! [13] இதயத்தமனி (அடைப்பு) நோய் (Coronary Artery Disease)

மருத்துவம் : 

நோயின் அறிகுறிகள் - மார்பு வலி (Angina Pectioris) :

நாம் ஏற்கெனவே குறிப்பிட்டபடி ‘மார்பு வலி’, இதயத்திற்கு செல்லும் இரத்தம் குறைவதால் ஏற்படுவதாகும். பொதுவாக மார்பு வலியை, “நிலையான மார்பு வலி’’ (stable angina) “நிலையற்ற மார்பு வலி’’ (unstable angina) என இரு வகைப்படும். நெஞ்சு வலி என்பது நிறைய பேர்கள் அனுபவிக்கும் ஓர் அறிகுறியாகும். ஆனால் எல்லா நெஞ்சு வலியும் (Chest pain) இதயத் தமனிக் கோளாறினால் உண்டாவதற்காக எண்ணக் கூடாது. மார்பு சதை பிடிப்பு, வயிற்று கோளாறு, இரைப்பையழற்சி (Gastritis) ஆகியவை கூட நெஞ்சு வலியை ஏற்படுத்தலாம். அதனால் நெஞ்சு வலி ஏற்பட்டால் மருத்துவ ஆலோசனை பெறுதல் நன்று.

நிலையான மார்பு வலி (stable angina) :

* அதிகளவு உடலுழைப்பு இருக்கும்பொழுது, இதயம் கடுமையாக செயல்படும் நிலை ஏற்படும். அதற்கு அதிக அளவு இரத்த ஓட்டம் தேவைப்படும். இதயத்தமனி குறுகிய நிலையில் உள்ள போது, இதயத்திற்கு (அதிக உழைப்பின் பொழுது) தேவையான இரத்தம் செல்லாததால் மார்பு வலியாக வெளிப்படும்.

* இந்த வலி ஒரு சில நிமிடங்களிலேயே நின்று விடும் (பெரும்பாலும் 5 நிமிடங்கள்).

* வலி சாதாரணமாக ஏற்படும் நெஞ்சு வலி (Chest Pain) போன்றே இருக்கும்.

* வலி வந்த உடன் ஓய்வெடுத்தால் வலி நீங்கி விடும்.

* மன உளைச்சல் (Stress), அதிகக் குளிர்ச்சி, வயிறு புடைக்க உண்பது (அதிலும் இரவு உணவு), புகை பிடித்தல் போன்றவை மார்பு வலியை உண்டாக்கலாம்.

* களைப்பு, தலை சுற்றல், குமட்டல்

* மூச்சு திணறல், வியர்த்தல் போன்றவையும் ஏற்படலாம்.

இவ்வகை நிலையான மார்பு வலி மிகவும் சாதாரணமானது. ஆனால் இதுபோன்ற அறிகுறிகள் இருந்தால் கட்டாயம் மருத்துவ ஆலோசனை பெற வேண்டும்.

நிலையற்ற மார்பு வலி (unstable angina) : பொதுவான மார்பு வலி அறிகுறிகளான

* களைப்பு

* தலைசுற்றல்

* குமட்டல்

* மூச்சுத் திணறல்

* வியர்வை

* நெஞ்சு வலி

* நெஞ்சில் ஏற்படும் வலி இடது கையில் பரவும், வலது கையிலும் பரவலாம்

* முதுகில் வலி பரவும், தோள் பட்டையில் பரவலாம்

* கீழ்த்தாடையில் வலி ஏற்படலாம்

* நெஞ்சை அமுக்குவது போன்ற உணர்வு நெஞ்சில் இருக்கும்

* நெஞ்சு எரிச்சல்

போன்ற அறிகுறிகள் எந்தவித முன்னறிவிப்பும் இன்றி திடீரென தோன்றும். மேற்சொன்ன அறிகுறிகள் அனைத்துமோ, அல்லது ஒரு சிலதோ தோன்றலாம். ஆனால் நிலையற்ற மார்பு வலி ஓய்வில் கூட ஏற்படும் வலியும் அதிகமாக இருக்கும். 30 நிமிடங்களும், அதற்கு மேலும் கூட வலி தொடரலாம். மருந்துகள் உண்பதாலோ, முழு ஓய்வு எடுப்பதாலோ வலி குறையாது. சரியாக மருத்துவம் செய்து கொள்ளா விட்டால் மாரடைப்பு (heart attack) ஏற்படும் நிலை உண்டாகும். நெஞ்சில் இறுக்கம், நெஞ்சை அமுக்குவது போன்ற உணர்வு, நீண்ட நேர நெஞ்சு வலி வியர்வை, மருந்துகளால் அறிகுறிகள் குறையாமை போன்றவை இருப்பின் கட்டாயம் அவசர மருத்துவம் தேவைப்படும். உடனே மருத்துவமனைக்கு சென்றால் உயிர் ஆபத்து ஏற்படாமல், தப்பிப் பிழைக்க முடியும்.

“மாரடைப்பு” (heart attack - இதயத் திசு அழிவு - myocardial infarction):

உடனடியாக மருத்துவம் செய்ய வேண்டிய ஓர் அவசர நோய் மாரடைப்பு. இல்லாவிடில் நிமிடங்களில் மரணம் நிகழும். உறைந்த இரத்தத் துகள், இதயத் தமனியை அடைப்பதால் இதயத்திற்கு செல்லும் இரத்தம் தடைபடும். இரத்தம் ஓட்டம் தடைப்பட்ட இதயப் பகுதி, மூச்சுக் காற்று (ஆக்ஸிஜன்) கிடைக்காமல் செயலிழந்து, மரணித்து விடும். உடன் நோயாளி மரணமடைவார். ஆரம்ப அறிகுறிகள் தோன்றி சற்றேறத்தாழ 20 நிமிடங்களில் நோயாளி மரணமடைந்து விடுவார். ஓரளவு இரத்த ஓட்டம் இதயத் திசுக்களுக்கு இருந்தால் 10 நிமிடங்களில் மார்பு வலி குறையலாம்.

நோயின் அறிகுறிகள்:

* மார்பு வலி

* மார்பு இறுக்கம்

* மார்பை கசக்கி பிழிவது போன்ற உணர்வு

* மார்பை அழுத்துவது போன்ற உணர்வு

* மார்பில் தோன்றும் வலி கழுத்து, கைகள், முதுகு, கீழ்த்தாடை போன்ற இடங்களுக்கு பரவுதல்.

* நெஞ்சு எரிச்சல்

* தலைசுற்று

* கிறக்கம்

* குமட்டல்

* அதிக அளவு வியர்த்தல்

* மூச்சுத் திணறல்

* (மார்பு வலி மிகக் கடுமையாக இருக்கும்)

மேற்கண்ட அறிகுறிகளில், சில அறிகுறிகள் தெரிந்தாலும் மருத்துவ ஆலோசனை பெறுதுல் இன்றியமையாததாகும்.

நோயறிதல் (பரிசோதனைகள் மூலம்):

* இதய மின் பதிவு (ECG)

* எதிரொலி இதய மின்பதிவு (Echocardiogram)

* ஓடுபொறி சோதனை (Treaduil test)

* இதயத் தமனி இரத்த ஓட்ட வண்ணப் பதிவு (Colour doppler)

* குருதிக் குழாய் வரைவி (Angiogram)

போன்ற பரிசோதனைகள் மாரடைப்பு நோய்க்குச் செய்யும் பரிசோதனைகள் ஆகும். இதயத் தமனிகளில் ஏற்படும் அடைப்பை மிகத் துல்லியமாக இச்சோதனைகள் மூலம் அறிய முடியும்.

1. இதய மின் பதிவு (Electro-cardio-gram) : இதயம் இயங்கும் பொழுது, ஏற்படும் மின்சார செயல்பாட்டை பதிவு செய்தல். மின் பதிவில் ஏற்படும் மாற்றங்களை வைத்து நோயை அறிய முடியும்.

2. எதிரொலி இதய மின் பதிவு (Echo Cardiogram) : ஒலி அலைகளை, இதயத் தசைகளில் செலுத்தி, அதன் எதிரொலியை பதிவு செய்யும் முறை. இதயத் தசைகளின் செயல்பாட்டை இப்பதிவின் மூலம் அறிய முடியும்.

3. ஓடு பொறி சோதனை (Treadmill test) : இதயத்தின் செயல் அறிய செய்யப்படும் சோதனை இது. இயல்பான நிலையில் இதயத்தின் செயல்பாட்டில் துவங்கி, உடற்பயிற்சியின் போது இதயம் செயல்படுவதை பதிவு செய்யும் முறை இது. ஓய்வில் இதயம் துடிக்கும் பொழுது, இதயத்திற்கு செல்லும் இரத்த ஓட்டத்தை விட, பயிற்சியின் போது, இதயம் வேகமாக செயல்படும். அப்பொழுது இதயத்திற்கு அதிக அளவு இரத்தம் செல்லும். உடற் பயிற்சியின் பொழுது, அதிக அளவு இரத்தம் செல்லாமல் (இதயத் தமனிகளில் அடைப்பு இருப்பின்) இருந்தால் இதயத்தின் செயல்பாட்டில் குறை ஏற்படும். அதை வைத்து அடைப்பு உள்ளதா என்று அறிய முடியும்.

4. இதயத் தமனி இரத்த ஓட்ட வண்ணப் பதிவு (Coronary Artery colour doppler study) : இதயத் தமனி வழியே செல்லும் இரத்த ஓட்டத்தை பதிவு செய்யும் முறை. இதயத் தமனிகளில் படிந்துள்ள, படிவங்களை இதன் மூலம் அறியலாம்.

5. குருதிக் குழாய் வரைவு (Angiogram) : இதயத் தமனிகளின் அடைப்பை மிகத் துல்லியமாக பதிவு செய்யும் முறை இது. காலில் உள்ள தமனி வழியே ஒரு நுண்ணிய வடிகுழாயை செலுத்தி, அதை இதயத் தமனிகள் வரை கொண்டு சென்று, ஒரு “நிறமி’’ (Dye) யை செலுத்துவர். அதை வெளியில் கணினி மூலம் கண்காணிப்பர். இதன் மூலம் இதயத் தமனியில் ஏற்பட்டுள்ள அடைப்பை துல்லியமாக அறிந்து, அதற்கு தகுந்த முறையில் மருத்துவ முறைகளை முடிவு செய்வர்.

மேற்சொன்ன பரிசோதனைகள் தவிர, இதய செயல்பாட்டிற்கான புரத நொதியங்களான “டிராபோனின்’’, “கிரியேட்டின் கினேஸ்’’, “எடிபேஸ்’’ ஆகியவற்றின் அளவீடுகளில் மாற்றம் இருந்தாலும், மாரடைப்பை கண்டுபிடிக்க உதவும்.

- உண்மை இதழ், ஆகஸ்ட் 16 - செப்டம்பர் 15. 2020

விதி நம்பிக்கையை விலக்கிய அதி நவீன மருத்துவங்கள்! (12) இதயத்தமனி (அடைப்பு) நோய்

மருத்துவம் : விதி நம்பிக்கையை விலக்கிய அதி நவீன மருத்துவங்கள்! (12)

 இதயத்தமனி (அடைப்பு) நோய்

(Coronary Artery Disease)

மரு.இரா.கவுதமன்

மாரடைப்பு காரணிகள்: (1) பரம்பரை நோயாக வரலாம். (2) அதிக மன அழுத்தம் (stress) (3) நீரிழிவு நோய் (diabetes) (4) அதிக அளவு கொழுப்பு சேர்தல் (Triglycerides) (5) அதிக குளிர்ச்சியில் தாக்கப்படும் நிலை (உயரமான இடங்களுக்கு செல்லும் நிலையில் - High attitude) (6) கடுமையான அலைச்சல் (7) அதிகமான உடல் உழைப்பு (அ) உடற்பயிற்சி போன்ற காரணங்களால் திடீரென்று மாரடைப்பு ஏற்படும். யாருக்கு அதிகளவில் இந்நோய் வரும் என்று பார்த்தால், புகை பிடிப்போர், மது அருந்துவோர், உயர் இரத்த அழுத்தம் (Hypertension) இதயத் தசை அழற்சி (myocarditis), உடல் உழைப்பே இல்லாமல், சோம்பல் வாழ்க்கை முறை (Sendentary life style) பரபரப்பான வாழ்க்கை முறை (stressful life style) முதியவர்கள், திடீரென செய்கின்ற கடுமையான உழைப்பு ஆகிய காரணங்களாலும் மாரடைப்பு ஏற்படும்.

இனி மேற்கண்ட காரணிகளால் நோய் ஏற்படுவதை காண்போம். நீரிழிவு நோயாளிகளின் இரத்தக் குழாய்களில் சர்க்கரை, குழாய் சுவர்களில் படிந்திருக்கும். உயர் இரத்த அழுத்த நோயாளிகளின் இரத்தக் குழாய் சுவர்களில் கொழுப்பு படிந்திருக்கும். இந்த படிதல்களால் இரத்தக் குழாய்கள் இயல்பாக இல்லாமல் குறுகிவிடும். இதனால் இதயத் தமனிகள் வழியே இதயத்திற்கு செல்லும் இரத்தத்தின் அளவு குறைந்துவிடும். புகைப்பிடிப்பவர்களின் இதயத் தமனிகளில் ‘நிகோடின்’ படிந்து மேற்சொன்ன குறைபாட்டையே உண்டாக்கும். அதிக உயரமான (high attitude) இடங்களுக்கு (மலை பகுதிகள்) செல்பவர்கள், அங்கு இயல்பாக உள்ள அதிக குளிரால் தாக்கப்படுவர். அதிகக் குளிர்ச்சியில் தமனிகள் சுருங்கும். அதனால் இரத்த ஓட்ட குறைபாடு இதயத்திற்கு ஏற்படும் நிலை, நீரிழிவு நோய், உயர் இரத்த அழுத்த நோய் உள்ளவர்களுக்கு ஏற்கெனவே தமனிகள் சுருங்கி இருக்கும் நிலையில் இந்த பாதிப்பு இன்னும் அதிகமாகி மாரடைப்பு ஏற்படும் நிலை ஏற்படும். கடுமையான அலைச்சல், அதிக உடலுழைப்பு போன்றவை இதயத்தின் செயல்பாட்டை அதிக அளவு ஏற்படுத்தி, இதயம் களைப்புற்று நின்று விடும் நிலை ஏற்படலாம்.

சோம்பல் வாழ்க்கை முறை (sedentary life style) இதய இயக்கத்தை குறைத்து, நாளடைவில் இதயம் நின்று விடும் நிலைக்கு தள்ளிவிடும். பரபரப்பான வாழ்க்கை முறை (stressful life)யில் ஏற்படும் அதிக உணர்ச்சி வசப்படுதல், கோபம், பயம், கவலை, விரக்தி (depression) ஆகியவையும் மாரடைப்பு ஏற்பட வழி வகுக்கும். மேற்கண்ட நிலைகளில் ‘அட்ரினல்’ சுரப்பு ஏற்பட்டு, இரத்தக் குழாய்களில் பாதிப்பை உண்டாக்கி மாரடைப்புக்கு வழி வகுக்கும். முதியவர்களுக்கு இரத்தக் குழாய்களில் சுருங்கி விரியும் தன்மை குறைவதால் இரத்த ஓட்ட பாதிப்பை உண்டாக்கி மாரடைப்பிற்கு வழி வகுக்கும். சில பேர்கள், பரம்பரை, பரம்பரையாக இந்நோயில் பாதிக்கும் நிலையும் ஏற்படும்.

நோய் கூற்றியல்: நீரிழிவு நோயில், இதயத் தமனியின் உட்சுவர்களில் சர்க்கரை, கொழுப்புப் படிவங்கள் படர்ந்து, நாளடைவில் கெட்டிப் பட்டு விடும். அதனுடன் சுண்ணச் சத்தும் (calcium) நாளடைவில் படிந்து அதிகம் கெட்டிப்பட்டு விடும். அதிக இரத்த அழுத்தத்திலும் கொழுப்பு இதே போல் தமனியில் படிந்துவிடும். இதனால் இதயத் தமனி குறுகிவிடும். இதயத்திற்கு தேவையான இரத்தம் செல்வதும் சிறுக, சிறுக குறைந்து கொண்டே வரும். (மருத்துவர்கள் இதயத் தமனியில் ஏற்படும் குறுகலைத்தான் 20%, 30%, 40%, 50% அடைப்பு என்றெல்லாம் குறிப்பிடுவர்) ஒரு சில நேரங்களில் இரத்த ஓட்ட வேகத்தில், இதயத் தமனியில் படிந்துள்ள இந்த பொருள், பிய்ந்து கொண்டு இரத்த ஓட்டத்தோடு சென்று சிறிய இரத்தக் குழாயை அடைத்து விடும். இந்த குழாய்கள் மூலம் இரத்தம் பெறும் இதயப் பகுதி, செயலிழந்துவிடும். இப்படி பிய்த்துக் கொண்டு செல்லும் “இரத்த உறை கட்டி’’ (thrombus) அளவில் பெரிதாக இருந்தால் பெரிய குழாயையே அடைத்து, உடனடி மரணம் நிகழும் பெரிய இரத்த குழாய் அடைபடும் பொழுது அது பரவும் இதயத்தசை முழுவதும் இரத்த ஓட்டம் தடைப்பட்டு, அந்த பகுதியில் உள்ள திசுக்கள் அழிந்து விடும். இதையே “இதயத் திசு அழிவு’’ (Myocardial Infarction) என்று மருத்துவர்கள் அளவுக்கு மேல் இரத்த ஓட்டம் தடைபட்டால், மார்பில் வலி ஏற்படும் (Angina Pectoris) உடன் உடல், தன்னை காத்துக் கொள்ளும் வகையில் சில நொதியங்களை சுரக்கச் செய்து, இரத்தக் குழாய்களை விரிவுபடுத்த முயலும். அப்பொழுது வலி விட்டு விடும். இதே போன்ற நிலை பிற காரணங்களாலும் (மன அழுத்தம் போன்றவை) ஏற்பட்டு, இதயத்திற்கு செல்லும் இரத்தம் குறைந்து “மார்பு வலி’’ (Angina Pectoris)யை ஏற்படுத்தும்.

(தொடரும்)

“மாரடைப்பு’’, “இதய முடக்கம்’’: (Heart attack, Cardiac Arrest):

மாரடைப்பு: இதயத்திற்கு, இதயத் தமனி வழியே செல்லும் இரத்த ஓட்டம், திடீரென்று உண்டாகும் அடைப்பினால், முழுமையாக தடைபடும். இதனால் இதயம் செயல்படாமல் நின்றுவிடும். மரணமும் நிகழும். இதையே மாரடைப்பு என்கிறோம்.

இதய முடக்கம்:(Cardiac Arrest): இதயம் சுருங்கி விரிவதாலும் மத்திய நரம்பு மண்டலம் (Central Nervous system) மூலமும் மின்னோட்டம் ஏற்படுகிறது. இம்மின்னோட்டம்தான் இதய செயல்பாட்டை முழுமையாக கட்டுப்படுத்துகிறது. இந்த மின்னோட்டத்தில் ஏதேனும் குறைபாடு ஏற்பட்டால், இதயத்தின் மேலறைகள், கீழறைகள் சீரான இயக்கத்தில் கோளாறு ஏற்படும். இதே போன்று மற்ற சில இதய நோய்களாலும் இதயம் பலம் குன்றியிருக்கும். அதுபோன்ற நோயாளிகளுக்கு சற்றும் எதிர்பாராமல் இதய முடக்கம் ஏற்பட்டு, இதயம் நின்று விடும். பொது இடங்களில் இது நிகழ்ந்தால், பாதிக்கப்பட்டவர் திடீரென்று சரிந்து, விழுந்து மயங்கி, மரணமடைவர். மாரடைப்பில், நோயாளி உயிரோடு இருப்பார். உணர்வோடு இருப்பார். இதயம் செயல்படும். மார்பு வலி இருக்கும். ஆனால் இதய முடக்கத்திலோ இதயம் எந்த வலியுமின்றி, திடீரென்று நின்று விடும். அருகில் இருப்பவர்கள் “இதய, மூச்சு மீறுயுர்ச்சி’’ (cardio - Pulmonary resuscitation) முறையை மேற்கொள்ள வேண்டும். இதயத் துடிப்பு நின்று விட்ட ஒருவருக்கு, இதயப் பகுதியில், மார்பின் மேல் இரு கைகளையும், ஒன்றின் மீது ஒன்றை வைத்து அழுத்த வேண்டும், வாயின் மேல் வாய் வைத்து மூச்சு விடுவதை தூண்ட வேண்டும். மூன்று நிமிடங்களுக்கு மேல் மூளைக்கு இரத்தம் செல்லாவிட்டால் மூளையில் உள்ள பகுதிகள் செயலிழந்து இறக்க நேரிடும். மார்புப் பகுதியை நொடிக்கு ஒரு முறை அழுத்த வேண்டும். 20 முறை முதல் 30 முறை அழுத்தியதும், வாய் மூலம் மூச்சு செலுத்த வேண்டும். இதன் மூலம் பல முறை இதயம் மீண்டும் செயல்படத் துவங்கும். நோயாளியை மருத்துவமனைக்கு கொண்டு செல்ல ஏற்பாடு செய்ய வேண்டும். விரைவு ஊர்தியிலேயே (ஆம்புலன்ஸ்) “இதய உதறல் நீக்கி’’ (Defibrlator) கருவியை மார்பில் வைத்து, இதயத்தை இயக்க செவிலியர்கள் முயல்வர். மருத்துவமனையில் உடனடியாக சேர்க்கப்படும் நோயாளிகள் பலர் பிழைத்துக் கொள்ளவும் வாய்ப்பு ஏற்படுகின்றது.

- உண்மை இதழ், 16-31.7.20

விதி நம்பிக்கையை விலக்கிய அதி நவீன மருத்துவங்கள்! (11)இதயத்தமனி (அடைப்பு) நோய்

மருத்துவம் : 

மரு.இரா.கவுதமன்

இதயத்தமனி (அடைப்பு) நோய் coronary artery disease)

மாரடைப்பு (Heart Attack)

நாம் ஏற்கெனவே குறிப்பிட்டபடி, கருவுற்ற எட்டாவது வாரத்தில் இதயம் இரண்டு குழாய்களாக அமைந்து, பிறகு நான்கு அறை கொண்ட இதயமாக மாறுகிறது. அப்பொழுதே துடிக்க துவங்கும் இதயம், நம் மரணம் வரை இடைவிடாது துடித்துக் கொண்டே இருக்கிறது.

இதயம்தான் கருவில் உருவாகும் முதல் உறுப்பு. ஆரம்பத்தில் நிமிடத்திற்கு 120 முதல் 160 வரை இதயம் துடிக்கும், பேறு காலத்தில் துடிப்பு நிமிடத்திற்கு 130 ஆக இருக்கும்.

பின் குழந்தை வளர, வளர நிமிடத்திற்கு 72 முறை துடிப்பாக மாறி நிலை கொள்ளும். இயல்பான நிலையில் நிமிடத்திற்கு 72 முறை,  X ஒரு மணிக்கு 72 X 60 முறை, ஒரு நாளைக்கு 72 X 60 X 24 என்று நாம் வாழும் காலம் முழுதும் இதயம் இயங்கிக் கொண்டே இருக்கும்.

சுருங்கி, விரியும் தன்மையையே நாம் இதயத் துடிப்பாக உணர்கிறோம். அவ்வாறு இடைவிடாமல் இதயம் இயங்க வேண்டுமானால் அதற்கு தேவையான சக்தி இடைவிடாமல் கிடைத்துக் கொண்டே இருக்க வேண்டும். அந்த சக்தி இடைவிடாமல் கிடைக்க வேண்டுமானால் இதயத்திற்கு இரத்த ஓட்டம் தடையின்றி கிடைத்துக் கொண்டே இருக்க வேண்டும். தங்குத் தடையின்றி (ஒரு நிமிடம் கூட நில்லாமல்) கிடைக்கும் இரத்தம் மூலமே இதய இதயத்திற்கு தேவையான உயிர்க்காற்றும் (ஆக்ஸிஜன்), சத்தும் கிடைக்கிறது. அப்படி நில்லாமல் கிடைக்கும் இரத்த ஓட்டம் இதயத் தமனி (coronary Artery) மூலமே, இதயத்திற்கு கிடைக்கிறது.

இதயத் தமனிகள் (Coronary Arteries):

மகாதமனி (Aorta) (இடது வெண்டிரிக்கள், left ventricle) இடது கீழறையிலிருந்து வெளியேறும் இடத்தில், இதயத் தமனி பிரிகிறது. பிரிகின்ற இதயத் தமனிதான் முழு இதயத்திற்கும் தேவையான இரத்த ஓட்டத்தை கொடுக்கிறது.

மகாதமனியிலிருந்து பிரியும் இதயத்தமனி மேலும் இரண்டு பெரிய பிரிவுகளாக பிரிகிறது. இடது பெரும் இதயத் தமனி (left main coronary artery (also called left main track) வயது பெரும் இதயத் தமனி (right coronary artery - RCA) என்று இரு பிரிவுகளாக பிரிந்து இதயத்தின் இடது, வலது புறங்களுக்கு இரத்த ஓட்டத்தை ஏற்படுத்துகிறது. இடது பெரும் இதயத்தமனி மேலும் இரண்டாக பிரிகிறது. இதயச் சுற்றுத் தமனி (circumflex artery) இடது முன் கீழிறக்கத் தமனி (left anterior descending artery - LAD) என்று இரண்டாகப் பிரிகிறது.

சுற்றுத் தமனி, இடது மேலறை, இடது கீழறையின் (Left Ventricle) பக்கவாட்டிற்கும், பின் பகுதிக்கும் இரத்தம் கொண்டு செல்கிறது. முன் கீழறக்கத் தமனி, இடது கீழறையின் முன்புறம், கீழ்புறம், கீழறைகளின் இடைச்சுவர் ஆகிய பகுதிகளுக்கு இரத்தத்தை கொண்டு செல்கிறது. வலது பெரும் இதயத் தமனி (Right Coronary Artery - RCA) வலது ஓரத் தமனி  (Right Marginal Artery), பின் கீழறக்கத் தமனி (Posterior Descending Artery) என்று இரண்டு பிரிவாக பிரிந்து வலது மேலறை, வலது கீழறை, கீழறைகளின் அடிப்பகுதி, இடைச்சுவர்களின் (Septcem) பின்புறம் ஆகிய பகுதிகளுக்கு இரத்தத்தை செலுத்துகிறது. இந்த பிரிகின்ற தமனிகள் எல்லாம் ஒரு வலைப்பின்னல் போல் அமைந்து, இதயத்தின் அனைத்துப் பகுதிகளுக்கும் இரத்த ஓட்டத்தை, இடைவிடாமல் கிடைக்கச் செய்கின்றன.

துணைத் தமனிகள் (Collateral Vessels):

இவை இதயத்தில் அமைந்துள்ள சிறிய தந்துகிகள் (tiny blood vessels - capillaries) ஆகும். இதயம் இயல்பாக செயல்படும் பொழுது, இவை மூடி இருக்கும். இதயத்தமனி சுருக்க நோயில், இவை விரிந்து, இதயத்திற்கு தேவையான இரத்தத்தை செலுத்தத் துவங்கும். அதனால் இதய இயக்கத்திற்கு தேவையான இரத்தம் கிடைக்கும். இதனால் மாரடைப்பு தவிர்க்கப்படும். இனி இதயத் தமனி நோய்களை பார்ப்போம்.

இதயத் தமனி இரத்த ஓட்டக் குறைபாடு (Ischemia) : இதயத் தமனி வழியே இதயத்திற்கு தேவையான இரத்தம் குறைவின்றி தொடர்ந்து சென்று கொண்டே இருக்க வேண்டும். ஏதேனும் காரணமாக இரத்த ஓட்டம் குறைந்தால், இதயத்திற்கு தேவையான உயிர் காற்றும் (Oxygen) சத்தும் கிடைக்காமல் போகும். அதனால் இதயம் நின்று விடும் நிலை ஏற்படும். இதையே “மாரடைப்பு’’ (Heart Attack) என்று கூறுகிறோம். மிகவும் ஆபத்தமான நிலை இது. உடனடியாக மருத்துவம் செய்யாவிடில் மரணம் நிகழக் கூடிய நிலை ஏற்படும். இனி இது எப்படி நிகழுகிறது எனப் பார்ப்போம்.

மாரடைப்பு (Heart Attack): மிகவும் ஆபத்தான இந்நோய் எதிர்பாராமல் ஏற்படும். இதயத்திற்கு செல்கின்ற இரத்த ஓட்டம் திடீரென தடைபடுவதால் இதயம் துடிக்காமல் நின்று விடும். இதயம் செயல்படுவது நின்று போவதால் மூளை போன்ற முக்கிய உறுப்புகளுக்கும் இரத்தம் செலுத்த முடியாத நிலை ஏற்படும். அதனால் உடல் உறுப்புகள் அனைத்தும் செயல்படாமல் நின்று விடும். நோயாளி மரணமடைந்து விடுவார்.

“சற்று முன் கூட பேசிக் கொண்டிருந்தாரே, திடீரென்று சாய்ந்து விட்டார், இறந்து விட்டார்’’ என்றெல்லாம் பல முறை நாம் கேட்டுள்ளோம். இதுபோன்ற நிகழ்வுகளுக்கு பெரும்பாலும் காரணமாக இருப்பது இந்நோயேயாகும். மிகவும் அதிகளவில் மரணம் நிகழ்த்த கூடிய நோய் இது. ஆனால் இந்நோயை கண்டறிவதும், மருத்துவம் செய்வதும் முழுமையாக இந்நோயிலிருந்து நோயாளிகளை மீட்டு, நீண்ட வாழ்வு வாழ வகை செய்யலாம் இந்தியாவில் இந்நோயினால் வருடத்திற்கு ஒரு கோடி மக்கள் பாதிக்கப்படுகிறார்கள். இந்நோய்க்கான காரணங்களை பார்ப்போம்.

“நிலையான மார்பு வலி’’, “நிலையற்ற மார்பு வலி’’ மற்றும் மாரடைப்பு ஏற்பட வாய்ப்புள்ள நோயாளிகள் மிகவும் எச்சரிக்கையாக இருக்க வேண்டும். அவர்கள் சட்டைப் பையில் கீழ்கண்ட 3 மாத்திரைகளை வைத்திருக்க வேண்டும். அவர்கள் புழங்குமிடங்களில் (படுக்கையறை, உணவு உண்ணும் அறை போன்ற இடங்களில்) கைக்கு உடனே எடுக்கும்படியாகவும் இம்மாத்திரைகளை வைத்திருத்தல் நலம் பயக்கும். லேசானா நெஞ்சு வலி ஏற்பட்டாலும் உடனடியாக செய்கின்ற வேலையை, நிறுத்திவிட்டு (நடைப்பயிற்சி செய்து கொண்டிருந்தாலும்) உடனடியாக அருகில் ஓர் இடத்தில் அமைதியாக அமர வேண்டும். படுக்கை இருந்தால் படுத்துக் கொள்ள வேண்டும் உடனடியாக மாத்திரைகளை சாப்பிட வேண்டும். மருத்துவமனைக்கு செல்ல, அனைத்து முயற்சிகளையும் கைக்கொள்ள வேண்டும். தனியாக இருக்கும்பொழுது மார்பு வலி வந்தால், ஆழ்ந்து மூச்சித்திழுத்து, இரும வேண்டும். நெஞ்சுப் பகுதியை கைகளால் பிசைந்து கொடுக்க வேண்டும். மாத்திரைகளையும் உடனடியாக சாப்பிட வேண்டும்.

மார்பு வலியேற்படும் பொழுது உண்ண வேண்டிய மாத்திரைகள்:

ஆஸ்பிரின் 75 mg. (Aspirin 75 mg)

(இம்மருந்து இரத்தம் உறைதலை தடுக்கும்)

எனலார்பில் (Enalarpil - Vaootec)

(இம்மருந்து இரத்தக் குழாய்களை விரித்து கொடுக்கும். அதனால் இரத்த ஓட்டம் அதிக அளவு இதயத்திற்கு செல்லும்.)

அய்சாட்ரில் 5 (Isodril 5)

(இம்மருந்தை நாக்கின் கீழ் வைத்துக் கொள்ள வேண்டும். இதயத் தமனிகளை விரித்து அதிகளவு இரத்தம் இதயத்திற்கு செல்ல வழிவகுக்கும், மருந்து இது.)

 (தொடரும்...)

- உண்மை இதழ், ஜூன் 16 - ஜூலை 15.20

விதி நம்பிக்கையை விலக்கிய அதி நவீன மருத்துவங்கள்! (10)

மருத்துவம் : 

இதய நோயும் மருத்துவமும்

மரு.இரா.கவுதமன்

ஆபத்தான நிலை: இயங்கிக் கொண்டே இருக்கும் இதயத்தில் திடீரென மின்னோட்டம் நின்று விடக்கூடும். இதை “இதயத்துடிப்பு முடக்கம்” (Sudden Cardiac Arrest) என்று கூறுவர். திடீரென ஏற்படும் இந்த நிலையில் இதயம் முழுமையாக நின்றுவிடும். இதனால் இரத்த ஓட்டமும் நின்று, மரணம் நிகழும். தொடர்ச்சியாக 10 நிமிடங்களுக்கு மேல் மூளைக்கு இரத்தம் செய்யாவிட்டால் மூளை செயலிழந்து விடும். (Brain Death). இதயத் துடிப்பு முடக்கம் மிகவும் ஆபத்தானது. எந்த அறிகுறியும் உண்டாகாமல், பாதிக்கப்பட்டவர் திடீரென மயங்கி தரையில் சாய்ந்து, மயக்கம் அடையலாம்.  அது போன்ற நிலையில் யாரையேனும் காண நேரிட்டால், முதலில் நாடித்துடிப்பு இருக்கிறதா என்று பார்க்க வேண்டும். இதயத்திலிருந்து இரத்தம் செல்லுவது நின்று விட்டால் நாடித்துடிப்பு இருக்காது. இரண்டு உள்ளங்கைகளையும், பாதிக்கப்பட்டவரின் இடது மார்பில் வேகமாக அழுத்தவும். இரண்டுமுறை அழுத்தியதும், வாயோடு வாய் வைத்து செயற்கை மூச்சை செலுத்த வேண்டும். பின் மீண்டும் மார்பை அழுத்த வேண்டும். மருத்துவ உதவி வரும் வரை தொடர்ச்சியாக இதை செய்ய வேண்டும். (Cardio-Pulmonary Resuscitation)  சில நேரங்களில், இந்த மருத்துவ முறையிலேயே, மருத்துவ உதவி வருவதற்குள்ளேயே நோயாளியின் இதயம் மீண்டும் செயல்படத் துவங்கவும் கூடும். இம் முதலுதவி பல பேர் உயிரைக் காப்பாற்றியுள்ளது. தொடர்ந்து தரப்படும். மருத்துவம் மூலம் அவர் முழுமையாக குணமடையும் வாய்ப்பு ஏற்படும். (விதிமுடிந்து இதயம் நின்று போய், ஏறத்தாழ மரணம் அடைந்தவரை, முதலுதவியும், மருத்துவமும் எப்படி காப்பாற்றுகிறது!)

பிற மருத்துவ முறைகள்: இதய மேலறை உதறல் துடிப்பு (Atrial Fibrilation) சிலருக்கு இருக்கும். பெரும்பாலும் மருந்துகள் மூலமே இதை சரியாக்க முடியும். இதைப் போன்றே “கீழறைகள் மிகு இதயத் துடிப்பு” (Ventricular Tachyeardia)  சிலருக்கு ஏற்படலாம். இது மிகவும் ஆபத்தானது. இதனால் இதயத்தில் “குறு நடுக்கம்” (Fibrillation) ஏற்பட்டு, இதயம் நின்று விடலாம். இதை “குறு நடுக்க தடுப்பு” (Defibrillation) முறை மூலம் சரி செய்ய முடியும். சிலருக்கு அடிக்கடி இந்நோய் வரலாம். அவர்களுக்கு உடலிலேயே இக்கருவியை பொருத்திவிடுவதன் மூலம், இதயத்துடிப்பில் மாறுபாடு உண்டாகும் பொழுது தானாகவே செயல்பட்டு இதயத் துடிப்பை சீராக்கி விடும். இதே போன்று “இதயத் துடிப்பு சீர்மைக் கருவி” (Pace Maker) ஓர் அரிய கண்டுபிடிப்பு. இதயத் துடிப்புக் கோளாறுக்கான அடிப்படைக் காரணிகளை முதலில் கண்டறித்து அதை சீராக்குவர். இதில் நோயை சரியாக்க முடியாவிட்டால், நிரந்தரத் தீர்வாக இக்கருவியை பயன்படுத்துவர். இக்கருவி “மின்கலங்களால்” (Battery) இயக்கப்படுகிறது. இக்கருவியை தேவைக்கேற்ப தற்காலிகமாகவோ, நிரந்தரமாகவோ உடலில் பொருத்திவிடுவர். தற்காலிக கருவி உடலின் வெளிப்புறம் அமைந்திருக்கும். அதிலிருந்து, மின் இணைப்பு இதயத்திற்கு கழுத்துச் சிரை மூலமோ, தொடைச் சிரை வழியோ செலுத்துவர். கருவியிலிருந்து புறப்படும் மின் தூண்டல் இதயத் துடிப்பைச் சீராக்கும். நிரந்தர சீர்மைக் கருவியை காரை எலும்பிற்கு (Clavicle) கீழ் உடலில் நிரந்தரமாக பொருத்திவிடுவர். ஒரு சிறிய அறுவை மருத்துவம் மூலம், தோலுக்கு அடியில் இக்கருவி பொருத்தப்படும். இதிலிருந்து, கழுத்துச் சிரை வழியே இதயத்திற்கு தொடர்பு உண்டாக்குவர். இக்கருவி ஒரு கடிகாரம் போல் இயங்கும். எத்தனை முறை இதயத்தை துடிக்க வைக்க வேண்டும் என்று இதில் முறைப் படுத்தப்பட்டிருக்கும். இதனால் இதயத்துடிப்பு மாறுபாட்டால், உடன் இக்கருவி இயங்கி, இதயத் துடிப்பைச் சீராக்கும். மின் தூண்டல் தொடர்ச்சியாக இக்கருவி செய்வதால், இதயம் சீராக இயங்கும், தேவைக்கேற்ப மின் தூண்டலை வெளியிலிருந்தே மாற்றியமைக்கலாம். ஒரு முறை பொருத்தப்படும் இக்கருவி குறைந்தது 10 ஆண்டுகள் நல்ல நிலையில் இயங்கும். இப்பொழுது கம்பியற்ற சீர்மைக் கருவிகள் வந்துவிட்டது. அறுவை மருத்துவமின்றியே இதை பொருத்த முடியும்.

இதயத் துடிப்பு கோளாறுகளை மருத்துவம் மூலம் முழுமையாகக் கட்டுப் படுத்தலாம். ஆரம்ப நிலையில் எளிதாகக் கட்டுப்படுத்தலாம். நோய் முற்றிய பின்பும் இந்நோயை குணப்படுத்தாவிடில், மெதுவாக “இதயச் செயலிழப்பு” (Heart Failure) “இதயத் துடிப்பு முடக்கம்” (Cardiac Arrest) போன்ற நிலைகள் ஏற்படலாம்.

(தொடரும்...)

 

பதற்றம்: நான் ஒரு நிமிடம் பதறி விட்டேன் என நாமும் பலமுறை கூறியுள்ளோம். பலர் கூறவும் கேட்டுள்ளோம். பதற்றம் என்றால் என்ன? ஏன் ஏற்படுகிறது? காண்போமா? தேர்வு எழுதும் முன்போ, நேர்முகத் தேர்வுக்கோ, வேறு ஏதாவது காரணங்களால் பய உணர்வு தோன்றும் போதோ பதற்றம் ஏற்படுவதை நாம் அறிவோம். இது ஏன் நிகழ்கிறது என எப்போதாவது நாம் சிந்தித்திருக்கிறோமா? நம் உடல் ஒரு முக்கிய நிகழ்வை எதிர்நோக்க நம்மை ஆயத்தப்படுத்துகிறது. இத்தனை நடுக்கத்தோடு ஒரு வேளையை தொடங்கும் பொழுது, ஏற்படும் பதற்றம், வேலையில் மூழ்கியதும் கொஞ்சம், கொஞ்சமாகக் குறைந்து, நாம் இயல்பு நிலைக்கு திரும்புவோம். இந்த பதற்றம் நம்மை எச்சரிக்கை செய்து, மேலும் சிறப்பாக பணியாற்றச் செய்கிறது. ஆனால் சிலரோ, தங்கள் கவலைகளை கட்டுப்படுத்த முடியாமல் ஒரே பதற்றமான நிலையில் இருப்பதை நாம் அறிவோம். அவர்களால் தினசரி பணிகளைக் கூட சரியாக செய்ய முடியாமல் இருப்பதையும் நாம் அறியலாம். இது “பதற்றக் குறைபாடு” என்ற நோயாக இருக்கலாம். நாம் அனைவரும் ஏதோ ஒரு வகையில் பதற்றத்திற்கு ஆளாவதுண்டு. ஆனால் எதற்கெடுத்தாலும் பதற்றபடுவதும், பதற்றத்தோடு காலம் கழிப்பதும் ஆன நிலையில் உள்ளவர்கள் மனநல நிபுணரிடம் ஆலோசனை பெறுவது நல்லது.

பதற்றக் குறைப்பாட்டின் பொதுவான அறிகுறிகள்: வேகமான இதயத் துடிப்பு, மூச்சிறைத்தல், தசைகள் இறுக்கமாதல், மார்பு இறுகுதல், காரணம் சொல்ல முடியாத கவலைகளும், சமநிலையற்ற உணர்வும் தொடர்ந்து வருதல் தேவையற்ற செயல்களை எண்ணி, எண்ணி கவலைபடுதல் போன்றவை ஏற்படலாம்.

மருத்துவம்: பதற்ற குறைபாடு அறிகுறிகள் யாருக்காவது தொடர்ச்சியாக இருப்பது அறிந்தால் மன நல மருத்துவரிடம் ஆலோசனை பெறுதல் நல்ல பலனைத் தரும். யோகாவும் சிறந்த முறையில் பயனளிக்கும்.

பதற்றக் குறைபாட்டின் காரணிகள்: குடும்ப வரலாறு, பணியிட அழுத்தம், அன்பிற்குரியவரின் திடீர் மரணம், தைராய்டு, ஆஸ்துமா, நீரிழிவு நோய், இதய நோய்கள் போன்றவற்றால் கூட பதற்றக் குறைபாடு ஏற்படலாம். போதை பொருள்கள், மது போன்றவையும், சமூக பயம் ஆகியவையும் பதற்றக் குறைபாட்டை உண்டாக்கலாம்.             

சென்ற (ஏப்ரல் 16 - மே 15) 2020 இதழில் 35ஆம் பக்க மருத்துவரின் நேர்காணலில் எம்.பி.பி.எஸ் எனத் தவறுதலாக வெளியிடப்பட்டது. அதனை எம்.டி.எஸ் என மாற்றிப் படிக்குமாறு கேட்டுக் கொள்கிறோம்.

விதி நம்பிக்கையை விலக்கிய அதி நவீன மருத்துவங்கள்!

மருத்துவம் : 

 மரு.இரா. கவுதமன்

இதயத் துடிப்பு சீரின்மை (Arrhythmia) நோய்கள்:

இதயம் தன்னிச்சையாக செயல்படக் கூடியது. கண், கை, கால்கள் போல் இதயத்தை நமது விருப்பத்திற்கு இயக்க முடியாது. இதயத்தின் இயக்கத்தை கட்டுப்படுத்த தனிப்பட்ட நரம்பு மண்டலம் உள்ளது. இதற்கு “தன்னியக்க நரம்பு மண்டலம்’’ (Autonomous Nervous System) என்று பெயர். இந்நரம்பு மண்டலம் தவிர “உயிரி சுரப்பு நீர்’’களும் (Cardiac Enzymes) இதயத்தின் செயல்பாட்டை கட்டுப்படுத்துகின்றன. இதயத்தை கட்டுப்படுத்தும் நரம்புகளில் இரண்டு பிரிவுகள் உள்ளன. ஒரு பிரிவு (Sympathetic Nervous System)  இதயத் துடிப்பை அதிகமாக்கும். மற்றொரு பிரிவு இதயத் துடிப்பை குறைக்கும் ( Para Sympathetic Nervous System). “அட்ரினல்’’ (Adrenaline) சுரப்பும், தைராக்சின் சுரப்பும், இதயத் துடிப்பை அதிகமாக்கும். சிரைகளின் வழியே இதயத்திற்கு வரும் இரத்தம் அதிகமானாலும் இதயத் துடிப்பு அதிகமாகும்.

இதயத் துடிப்பு ஏற்படும் விதம்:

இதயத்திற்கு வரும் நரம்புகள் மூளையிலிருந்தும், தண்டு வடத்திலிருந்தும் (Spinal Cord) வருகின்றன. இவை இதயத்தின் முழு பகுதிகளிலும் பரவியுள்ளன. இவை இதயத்தின் வலது மேல் அறையில் உள்ள “மின் குமிழில்’’ (Sino Auricular Node) குவியும். இதிலிருந்து தொடர் மின்னோட்டம் ஏற்படும். இம்மின்னோட்டம் “மேலறை, கீழறை மின் குமிழு’’க்கு (Auriculo- Ventricular Node) பரவும். அங்கிருந்து பிரியும் நரம்பிழைகள் மூலம் வலது, இடது கீழறைகளுக்கு மின்னோட்டம் பரவும். இந்த மின்னோட்டமே இதயத் துடிப்பை உண்டாக்குகிறது. இதயச் சதைகள் சுருங்கி விரியவும், அடைப்பிதழ்கள் மூடி, திறக்கவும் இம்மின்னோட்டமே காரணமாகிறது. மின்னோட்டம் சீராக செயல்பட்டால், மேலறைகள் சுருங்கி, ஈரிதழ், மூவிதழ் அடைப்பிதழ்கள் திறந்து, இரத்தம் கீழறைக்குச் செல்லும். அப்பொழுது கீழறைகள் விரியும். கீழறை மீண்டும் சுருங்கும்பொழுது அங்குள்ள இரத்தம் நுரையீரல் தமனி வழியேயும், பெருந்தமனி (Aorta) வழியேயும் வெளியேறும். மேலறைகளும், கீழறைகளும் இப்படி மாறி, மாறி சுருங்கி, விரிதலை இம்மின்னோட்டமே முழுமையாகக் கட்டுப்படுத்துகிறது. இயல்பான நிலையில் மேலறை மின் குழியில் (Sino-Auricular Node) 72 முறை மின்னோட்டம் ஏற்படும். இந்த சுருங்கி, விரியும் செயல்பாட்டில் ஏற்படும் அடைப்பிதழ்கள் திறந்து, மூடும் வேளையில் ஏற்படும் ஒலியையே நாம் “இதய ஒலி’’ (Heart Sound) என்கிறோம்.

நன்றாக வேலை செய்யும் ஒரு நிமிடத்திற்கு 72 முறை துடிக்கும். இதையே “சீரான இதயத் துடிப்பு’’ (Rhytham) என்கிறோம். இதயத் துடிப்பு உடற்பயிற்சியின்போதும், கருத்தறித்த பெண்களுக்கும், கோபம், பயம், அதிர்ச்சி போன்ற உணர்ச்சிகளுக்கு ஆளாகும்போதும், உடலின் வெப்பநிலை அதிகரிக்கும்போதும் அதிகரிக்கும். சற்று நேரத்தில் இயல்பான நிலைக்கு (72 முறை) திரும்பி விடும். தூங்கும்பொழுதும், நீண்ட நேரம் ஓய்வெடுக்கும்பொழுதும் இதயத் துடிப்பு குறையும். சில நேரங்களில் இதயத் துடிப்பு 90 முறைக்கும் அதிகமாக இருக்கும். இதை “மிகை இதயத் துடிப்பு’’ (Tachycardia) என்றும், 60ற்கும் கீழாக போனால் “குறை இதயத் துடிப்பு’’ (Bradycardia) என்றும் மருத்துவர்கள் சொல்வார்கள். இந்த மின்னோட்டத்தில் ஏதாவது குறைபாடு ஏற்பட்டால், “இதயத் துடிப்பு சீரின்மை’’ (Arrhythmias) நோய்கள் ஏற்படும்.

                இதயத் துடிப்பை பொதுவாக 4 வகையாகப் பிரிக்கலாம். சீரான இதயத் துடிப்பு (Normal Heart Beat Regular), சீரற்ற இதயத் துடிப்பு (Irregular Beat Regular), சீரான, சீரற்ற இதயத் துடிப்பு (Regularly Irregular Beat Regular), சீரற்ற, சீரற்ற இதயத் துடிப்பு (Irregularly, Irregular Beat Regular) என மருத்துவர்கள் வகைப்படுத்துவர். இதில் சீரான இதயத் துடிப்பை பற்றி ஏற்கெனவே பார்த்தோம். மற்ற மூன்ற வகை இதயத் துடிப்பையும் “இதயத் துடிப்பு சீரின்மை நோய்’’ (Cardiac Arrhythmia) என மருத்துவர்கள் வகைப்படுத்துவர். இந்த நிலை மிகவும் ஆபத்தானது. ஆனால், மருந்துகள் மூலம் பெரும்பாலும் குணப்படுத்தலாம். இதயத்தில் செயல்படுகிற மின்னோட்டத்தில் குறைபாடு உண்டானால் இந்த நிலை ஏற்படும். மின் குமிழ்களில் மின்னோட்டம் உற்பத்தியாவதிலும், சீராக கடத்தப்படாததாலும், மேலறை, கீழறைகளின் சுருங்கி விரியும் தன்மையில் ஒழுங்கற்ற நிலை ஏற்படும்.

காரணிகள்:

நீண்ட நாள் மிகு இரத்த அழுத்தம் (Hypertension), புகை பிடிப்பது, குடிப்பழக்கம், இதய இரத்தக் குழாய் நோய்கள், இதய அடைப்பிதழ் நோய்கள், இதயத் தசை நோய்கள் போன்ற காரணங்களால் இதயத் துடிப்பு சீரின்மை நோய்கள் ஏற்படலாம்.

அறிகுறிகள்:

படபடப்பு, நாடித்துடிப்பில் ஒழுங்கின்மை, தலைபாரம், தலைச்சுற்றல், தளர்ச்சி, களைப்பு, மூச்சு வாங்குதல், மயக்கம் வருவது போன்ற நிலை, மயக்கம் போன்றவை ஏற்படும். கைக்குழந்தைகள் உடல்நிறம் நீலநிறமாக (Blue Baby) மாறும்.

தொடர் நிகழ்வுகள்:

பலநேரங்களில் இந்நோயின் அறிகுறிகள் வெளியே தெரியாமலே இருக்கும். நோய்க்கான அறிகுறிகள் ஏதும் தெரியாமலேயே பலர் வாழ்ந்து வருகின்றனர். மேற்குறிப்பிட்ட நோய்க்கான காரணிகள் மூலம் பலருக்கு இந்நோய் வெளிப்படும். நீண்ட நாட்கள் இருந்துவரும் இந்நோய் சில நேரங்களில் ஆபத்தை உண்டாக்கக் கூடும். முறையான இதய இயக்கம் (துடிப்பு) இல்லாத போது இதயத் தசைகளே பாதிப்படையும். மூளை, நுரையீரல், கல்லீரல், சிறுநீரகம் போன்ற முக்கிய உறுப்புகளுக்கு போதுமான அளவு இரத்தம் செல்லாத நிலை ஏற்படும். இதனால் அந்த உறுப்புக்களும் பாதிப்படையும். இதனால் “பக்கவாதம்” (Hemiplegia) சிறுநீரக செயலிழப்பு, செரிமானக் கோளாறுகள், முகம், கணுக் கால்களில் வீக்கம், மூச்சு திணறல், சோர்வு, செயல் பாடின்மை போன்ற கோளாறுகள் ஏற்படும். இரத்த சோகை போன்ற குறைபாடுகளும் ஏற்பட்டு மேலும் உடல் நிலையை மோசமாக்கும்

நோயறிதல்:

இதயத் துடிப்பு சீரின்மையை மருத்துவர்கள் நாடித் துடிப்பை கவனித்தே அறிவர். இதய “மின்னலைப் பதிவு” (Electro -Cardio-gram- ECG) மூலம், இதயத்துடிப்பு சீரின்மையை எளிதில் அறியலாம். சில நேரங்களில் மருத்துவரிடம், நோயாளிகள் “நெஞ்சு படபடப்பு அதிகம்” என்ற குறையோடு வருவர். மருத்துவரிடம் ஆலோசனை பெறுவதற்குள் இதயத் துடிப்பு இயல்பான நிலைக்கு வந்து விடலாம். அது போன்ற நேரங்களில் இதய மின்னலை பதிவு சரியாக இருக்கும். அவ்வகை நோயாளிகளுக்கு, 24 மணி நேர மின்னலை பதிவின் மூலம் நோயறிய முடியும். இது தவிர, எதிரொலி மின்னலைப் பதிவு (Echo Cardiogram) மூலமும் கோளாறை கண்டு பிடிக்க முடியும். இதயத் தசைகளில் ஏற்படும் மாற்றத்தை துல்லியமாக இச்சோதனை மூலம் அறியலாம். துடிப்பு குறைபாட்டையும், காரணத்தையும் கண்டறிய மார்பு ஊடுகதிர் நிழற்படம் (X-Ray), ‘டிரெட்மில் சோதனை’  (TMT), “ஹோல்டர் மானிட்டர் பரிசோதனை” (Holter Monitor Test), சாய்வு மேசை சோதனை (Tilt Table Test) என பல சோதனைகளை இதய நோய் நிபுணர்கள் செய்வர். இதன் மூலம் மிகு துல்லியமாக நோய் ஏற்படும் பகுதியை கண்டுபிடித்து விடுவர். நோயின் காரணங்களையும், அதன் விளைவுகளின் அடிப்படையிலும் மருத்துவ முறைகள் முடிவு செய்யப்படும்.

மருத்துவம்:

பொதுவாக எந்த வகை துடிப்புக் கோளாறு உள்ளதோ, அதற்கு ஏற்ப மருத்துவமுறை மாறுபடும். அதனால் நோயின் தன்மையிருந்த மருத்துவம் மேற்கொள்ளப்படும். மருந்துகள், ஊசி, இதயமின் அதிர்ச்சி மருத்துவம், உயிர்க்காற்று (Oxygen), சிரை வழி நீர்மங்களையும், மருந்துகளையும் செலுத்துதல், வடிகுழாய் ஆய்வு (Angiogram), மின்னோட்ட தடையை உண்டாக்கும் தேவையற்ற வளர்ச்சியை வடிகுழாய் மருத்துவம் மூலம் (Cardiac Ablation) சீராக்குதல், (பேஸ் மேக்கர்) இதயத் துடிப்பை சீர்மைக் கருவி (Pace-Maker) பொருத்துதல் போன்ற பல வகை மருத்துவங்கள், நோயின் தன்மைக்கேற்ப செய்யப்படுகின்றன. இவ்வகை மருத்துவமுறைகள் மிகச் சிறந்த பலனை தருகின்றன. கோடிக்கணக்கான நோயாளிகள் இதனால் பயனடைந்து நீண்ட வாழ்வு வாழ்கின்றனர்.

(தொடரும்)

 - உண்மை இதழ், 1-15.4.20